Fertraging by gebietsûntwikkeling om Sintrale As hinne
De PvdA yn Provinsjale Steaten hat noed oer de gebietsûntwikkeling by de Sintrale As, de dyk tusken Dokkum en Nyegea. Der is in grutte fertraging, te min jild en der binne kapasiteitsproblemen by amtners, seit steatelid Douwe Hoogland.
Deputearre Johannes Kramer stelt dat de provinsje in soad realisearre hat, mar dat it ek ôfhinklik is fan de meiwurking fan eigeners fan de grûn.
Kramer erkent de soarch oer it lânskipsplan. Ek it ferrin fan de amtners mei in soad kunde is in probleem, sa tinkt Kramer. Neffens him is it wol sa dat de gebietsûntwikkeling yn 2019 sa goed as klear wêze sil. Saken dy't langer trochrinne, moatte no goed regele wurde, seit Kramer.
By de gebietsûntwikkeling om de Sintrale As hinne binne ûnder mear fyts-, kuier- en ruterpaden oanlein. Ek is natuer oanlein, lykas de foar de regio kenmerkjende ikesingels.
