LIVEBLOG: De rjochtbank docht útspraak yn de saak fan de A7-blokkearders

Advokaat Tjalling van der Goot is teloarsteld oer fûnis fan de Ljouwerter rjochtbank. Van der Goot is de advokaat fan 33 fan de 34 blokkearders en Jenny Douwes. Hy tinkt deroer nei om yn heger berop te gean.

Even alle straffen dy't de rjochter oplein hat op in rychje:

Sjoch foar in gearfetting fan de rjochtsaak en de straffen dy't de rjochter oplein hat op ús webside.

De útspraak is dien. Reaksjes fan de belutsenen, de parse-rjochter en it Iepenbier Ministearje komme letter

Krekt lykas de eask krijt Douwes in straf fan 240 oeren wurkstraf. Neffens de rjochtbank is sy as opruiier mei-ferantwurdlik foar de folsleine blokkade.

De man dy't op de A7 syn bleate kont sjen liet, krijt in hegere straf as dat der yn earste ynstânsje easke wie. Dit wurdt net dien om't hy syn billen sjen liet, mar om't syn rol yn de blokkade grutter wie as dy fan de oare blokkearders. De man wie belutsen by ynsidinten op de A6 en A7. Hy krijt dêrfoar 180 yn stee fan 150 oeren wurkstraf.

Twa fan de fertochten krije in swierdere straf. De eask wie 150 mar se krije yn stee dêrfan 180 oeren.

De earste groep heart dat se in wurkstraf krije fan 120 oeren. Of ter ferfanging in 60 dagen lange selstraf. Dat is konform de eask

"Eigenrichting moet niet worden getolereerd." It giet dan ek om swiere feiten, sa seit de rjochtbank. In jildboete docht gjin rjocht oan de feiten. Sjoen de eftergrûn fan de minsken komt der gjin 'voorwaardelijke straf'.

"Het moet niet lonen om door te dreigen een demonstratie te voorkomen." De rjochtbank fynt dat in demonstraasje net samar ferbean wurde mei. As der in gefaarlilke sitewaasje driget dan moat der earder mear plysje ynset wurde. In demonstraasje hoecht net 'leuk' te wêzen. De rjochtbank wiist dêrby nei it stik fan de Nasjonale Ombudsman: "Demonstreren, een schurend grondrecht?"

De rjochtbank is no ta oan in oersjoch fan alles wat der barde yn oanrin nei de yntocht fan Sinterklaas ferline jier. Hjirnei wurdt dúdlik wat de strafmaat wurdt.

Jenny Douwes wurdt troch de rjochter fan de measte feiten frijsprutsen. Wat stean bliuwt foar har is dus opruiïng. En it belemmerjen fan de frijheid fan mieningsutering fan de minsken fan KOZP. It is neffens de rjochtbank net sa dat de útlittingen fan Douwes sjoen wurde kinne as ûnderdiel fan it debat.

De fertochten moatte in skeafergoeding betelje. Under oare foar it ynhieren fan de bus en it rút dat stikken gien is. Se hoege net in kursus te folgjen by de Stichting Nederland Wordt Beter. Dat wie ien fan de easken fan de wurdfierder fan KOZP.

Douwes wurdt net feroardiele foar it "opruien en verhinderen van een betoging met geweld of door middel van geweld." De rjochtbank fynt net dat Douwes in grutte rol spile hat by it opsetten fan de blokkade sels. Douwes moat frijsprutsen wurde fan de blokkade fan de A7. Bliuwt stean: Opruiing.

Fan twa fertochten kin bewiisd wurde dat se har skuldich makke hawwe oan bedriging. Dêrnjonken stiet neffens de rjochter ek fêst dat se mei geweld drige hawwe om de bussen ta stilstân te bringen.

It is neffens de rjochter ek bewiisd dat de fertochten de minsken yn de bus twongen hawwe te akseptearjen dat se net demonstrearje koene yn Dokkum.

"Mede-plegen van het versperren van de A7 is bewezen", seit rjochter Lootsma. Wêr is gjin bewiis foar it ôfsnijen fan de bussen. Ek net dat der geweld oan te pas kaam. Fertochten wurde frijsprutsen foar geweld en bedriging mei geweld..

Neffens de rjochter binne de minsken yn de auto's, de bestjoerders en byriders, bewust de dyk op gien om te blokkearjen. "Dat hebben ze bewust opgezocht." It doel wie om se tsjin te hâlden en tiid te rekken. De byriders binne hjir mei-ferantwurdlik foar.

Rjochter Jolanda Lootsma leit út dat se in gearfetting jaan sil fan it fonnis. As earste giet se yn op de 'ontvankelijkheid'. Troch de ferdigening is oanhelle dat yn oare saken it IM net ferfolging ynsteld hat. Lootsma seit dat de saken net te fergelykjen binne. It IM mei dus ferfolgje. Ek as it giet om Jenny Douwes.

Rjochter Jolanda Lootsma is binnen. Se begjint mei de fraach hokker fan de fertochten oanwêzich binne.

Seal A sit yntusken fol mei alle fertochten. De advokaten Tjalling van der Goot en Wim Anker sitte te plak. It is no wachtsjen op de rjochter.

De Hulp-Sinteklaas dy't freedtemoarn fuortstjoerd is by de rjochtbank, moat in ferklearring ôfjaan by de plysje. De man mocht allinnich nei binnen as er syn Sinteklazeklean út die. De rjochtbank seit dat it tsjin de húsregels is om yn sa'n outfit de rjochtbank yn te gean. De man wie it dêr net mei iens en gie mei de befeiliging yn diskusje. "Nu moet ik in de blote kont naar binnen."

Seal A fan de rjochtbank rint stadichoan fol. De rjochter begjint om 13.00 oere mei de útspraak. De ferwachting is dat dit sa'n fiif kertier duorje sil.

Ferslachjouwer Auke Zeldenrust is by de rjochtbank en sjocht dêr in grut tal sympatisanten stean. Guon mei in spandoek as in Fryske flagge, mar ek ien mei in Grinslanner flagge. "It is hjir aardich drok. De minsken mei it spandoek wiene hjir al betiid, mar se moasten fan de plysje fuort fanwege de merke dy't op it Saailân organisearre wurdt." Ien fan de demonstranten is dêr net sa wiis mei, want no binne se minder goed te sjen: "Wij moesten vijf tot tien meter opschuiven."

Foar de rjochtbank binne fansels ek in tal fan de fertochten. Germ Kees Lei, is dêr ien fan: "Wy wachtsje it ôf, wy sjogge wol wat der bart", sa seit er. Tsjin him is 120 oeren wurkstraf easke, mar hy is net senuweftich. "Wy moatte it mar sjen."

Ek op de dei fan de útspraak steane der sympatisanten fan de A7-blokkearders mei in spandoek by de rjochtbank.