Hoe faak hat de wolf al taslein yn Fryslân?

It lêste slachtoffer fan in wolf like by boer Sander de Jong yn Toppenhuzen te wêzen. De kop fan ien fan syn skiep wie hielendal ferfretten. Mar nei ûndersyk fan it Faunafûns die bliken dat it bist net troch in wolf oanfallen is, mar dat it om in stel foksen giet.

Earder dit jier wie de wolf wol de dieder fan it deabiten fan skiep. In oersjoch:

It earste gefal wie yn april, doe't de wolf tasloech yn Appelskea/Boyl en twa skiep deabiet.

In moanne letter waarden mar leafst trettjin skiep it slachtofffer. By De Knipe gie it om sân bisten en yn Langsweagen gie it om seis bisten.

Wer in moanne letter, yn juny, wie de wolf aktyf op trije plakken yn de provinsje. Yn Rinsumageast/Westergeast pakte it bist ien skiep, en yn Aldlemmer en yn Driezum gie it yn beide gefallen om twa skiep.

De provinsje hat in Faunafûns ynsteld foar skeafergoeding. Dêr falt skea troch de wolf ek ûnder. Inkeld by de skiep yn De Knipe is de skea fêststeld. It gie om in bedrach fan hast tûzen euro.

Skieppehâlders ha earder dit jier al oanjûn dat se benaud wienen foar de komst fan de wolf doe't de wolf foar it earst sinjalearre waard.

Ut ûndersyk fan de Ryksuniversiteit Grins kaam nei foaren dat it foar de natoer in goeie saak wêze soe, as der wolven nei Fryslân kamen. Yn Poalen hie de oanwêzigens fan wolven positive effekten op jonge beamkes. "Het angsteffect dat de wolven hebben, kan zorgen voor een grotere variatie. Als hier een wolf zich vestigt en er een roedel komt, dan krijg je op den duur wel een andere bosstructuur," seit ûndersiker Christian Smit.

Neffens boskwachter Roel Vriesema is de komst fan de wolf in nije faze dêr't we mei leare moatte om te gean. Neffens him hoege minsken net benaud te wêzen. "De wolf is yn prinsipe minskeskou, dy siket de rêstige gebieten op."