LIVEBLOG: SC Hearrenfean kin gjin fûst meitsje tsjin Ajax

20 okt 2018 - 22:00

Sportklup Hearrenfean wachtet sneontejûn in flinke opdracht thús yn it Abe Lenstra Stadion. De nûmer twa fan Nederlân, Ajax Amsterdam, komt op besite op It Hearrenfean. De earedifyzjewedstriid fan SC Hearrenfean is de 'Wedstriid fan de wike' by Omrop Fryslân. De partij sels, mar ek de oanrin nei de wedstriid, is de hiele jûn te folgjen fia dit liveblog.

22:37
Ein fan it liveblog

Oant safier ek dit liveblog fan Omrop Fryslân fan de wedstriid Sportklup Hearrenfean tsjin Ajax. Hâld ús webside en mobile app jûn noch yn 'e gaten foar de reaksjes fan de spilers en trainer fan de Feansters. Tige tank foar it folgjen en graach oant in oare kear!

22:38
Foto: Orange Pictures
22:33
SC Hearrenfean ferliest mei 4-0 fan Ajax

Skiedsrjochter Pol van Boekel fluitet foar de lêste kear yn it Abe Lenstra Stadion. SC Hearrenfean ferliest mei 4-0 fan Ajax. Yn de earste helte skoarden Lasse Schøne en Hakim Ziyech foar de Amsterdammers. Yn de twadde helte diene Dusan Tadic, út in dubieuze strafskop, en Kasper Dolberg dat. Ajax is in maatsje te grut foar Hearrenfean.

22:31
Huntelaar rekket de latte

Klaas-Jan Huntelaar koe dêr hast ek noch in doelpunt meipikke. Syn ynset giet op 'e latte. Gjin doelpunt dus foar de âld-Hearrenfean-spits, dy't in grut applaus krige doe't er ynfoel.

22:28
De wedstriid giet út as in nachtkears

Der bart de lêste minuten neat mear. De wedstriid giet as in nachtkears út. Ajax leaut it wol en sparret him foar de Champions League-wedstriid tsjin Benfica. Hearrenfean kin net in soad oanrjochtsje foaryn. Mitchell van Bergen krige niiskrekt noch wol in skotkâns, mar dy koe op 'e nij pakt wurde troch André Onana. Noch ien minút te gean, plus blessueretiid.

22:24
Van Amersfoort mei noch efkes meidwaan

Pelle van Amersfoort krijt ek noch wat minuten fan Jan Olde Riekerink. Hy ferfangt Sam Lammers yn de einfaze. Noch in goeie fiif minuten te spyljen yn it Abe Lenstra Stadion.

22:20
Dolberg en Hoegh yn duel
Foto: Orange Pictures
22:16
Hearrenfean-publyk sjongt foar Allbäck

It fanatike Hearrenfean-publyk lit him net kenne en bliuwt sjongen. No dogge se dat foar Marcus Allbäck, de âld-spits dy't de twadde helte út Nieuw-Noord wei belibbet. De Sweed is noch altyd in held foar de Feanster fans. 'Allbäck is een super-Fries', klinkt it.

22:11
Ajax wikselet foar de lêste kear

Ek Erik ten Hag grypt yn. De Ajax-trainer hellet Frenkie de Jong, de talintfolle middenfjilder, nei de kant. Foar him mei Zakaria Labyad ynfalle. Efkes dêrfoar krijt David Neres de earste giele kaart fan de wedstriid. Hy hâldt Arber Zeneli beet en krijt dêrfoar giel fan skiedsrjochter Pol van Boekel.

22:10
Opnij in wiksel by Hearrenfean

Nei 69 minuten wikselet Jan Olde Riekerink foar de twadde kear dizze wedstriid. Mitchell van Bergen komt yn it fjild foar de tsjinfallende Yuki Kobayashi. Kin de rappe oanfaller noch wat dwaan oan de skoare?

22:07
Foto: Orange Pictures
22:05
It kommentaar by de 4-0 fan Ajax

It kommentaar fan ferslachjouwer Roelof de Vries by de 4-0 fan Ajax

22:04
Vlap der út, Kongolo der yn

Jan Olde Riekerink wikselet foar de earste kear. Michel Vlap wurdt nei de kant helle, foar him yn it fjild komt Rodney Kongolo.

22:02
It kommentaar by de 3-0 fan Ajax

It kommentaar fan ferslachjouwer Roelof de Vries by de 3-0 fan Ajax

22:00
Vlap ticht by in treffer

It sit SC Hearrenfean net mei: Michel Vlap kin fan in meterke as tsien ôf úthelje, mar troch in goeie rêding fan André Onana wurdt it gjin 4-1.

21:59
Strafskop of net?

Ek âld-fuotballer en analist Kees Kwakman sprekt him út oer de strafskopsitewaasje by de 3-0.

21:57
It wurdt nóch slimmer: 4-0 foar Ajax

Kasper Dolberg makket der nei 56 minuten 4-0 fan foar Ajax. De oanfaller komt foar Daniel Høegh en tikket de 4-0 binnen. It is fuortendaliks syn lêste aksje: hy wurdt wiksele foar Klaas-Jan Huntelaar. Ek Hakim Ziyech giet derút, foar him komt David Neres.

21:53
Ajax komt op 3-0

Dusan Tadic skoart de strafskop en set Ajax op in 3-0 foarsprong. Hiel nuver dat de fideoskiedsrjochter Pol van Boekel hjir net nei sjen lit. Warner Hahn is kânsleas by de bal fan Tadic.

21:51
Strafskop Ajax

Strafskop foar Ajax! In flater fan skiedsrjochter Pol van Boekel, dy't in penalty jout foar in skoudertriuw fan Daniel Høegh. In fierstente swiere beslissing. Of grypt de fideoskiedsrjochter yn?

21:50
Oef! Dit wie dé kâns...

Nee! Sam Lammers hie de oanslutingstreffer op 'e fuotten. De spits wachtet krekt te lang, wêrtroch't Matthijs de Ligt de bal fan rjochting feroarje kin en Lammers der gjin 2-1 fan makket. Dit hie de goal wêze moatten foar Hearrenfean...

21:46
We binne wer los!

De twadde helte is úteinset yn it Abe Lenstra Stadion. Gjin feroarings oan beide kanten, wol rinne der by Ajax inkele spilers waarm. De Amsterdammers spylje takom wike foar de Champions League thús tsjin Benfica en dus is de ferwachting dat Ajax-trainer Erik ten Hag, hielendal mei dizze tuskenstân, spilers sparje sil aansen.

21:30
It is skoft!

It is skoft yn it Abe Lenstra Stadion. Troch goals fan Lasse Schøne en Hakim Ziyech stiet SC Hearrenfean op in 2-0 efterstân. It wurdt in hiele opjefte foar de Feansters om dit yn de twadde helte om te bûgjen.

21:29
It kommentaar by de 2-0 foar Ajax

Harkje nei it kommentaar fan ferslachjouwer Roelof de Vries by de 2-0 foar Ajax

21:27
Ziyech set Hearrenfean op in 2-0 efterstân

Wat in tsjinfaller foar SC Hearrenfean, krekt foar it skoft. Hakim Ziyech sjit de 2-0 binnen yn de 43ste minút. It is de rebound op in skot fan Frenkie de Jong. Dy poging koe Warner Hahn noch keare, mar dat slagge net by de ynset fan Ziyech. De âld-Hearrenfean-spiler ferdûbelet de marzje: 2-0 foar Ajax.

21:26
Einfaze fan de earste helte

Noch fiif minuten oant it skoft. SC Hearrenfean komt stadichoan wat better yn de wedstriid, mar is oanfallend ûnmachtich. Grutte mooglikheden hat de ploech fan trainer Jan Olde Riekerink ek noch net hân.

21:15
Dolberg sjit neist

Nei de iepeningstreffer foel Ajax efkes wat werom, mar fia Kasper Dolberg litte de Amsterdammers har wer efkes sjen. De spits, dy't Klaas-Jan Huntelaar op 'e bank hâldt, sjit de bal in meterke neist. De Feanster definsje is warskôge.

21:12
Mear ûnder de yndruk fan Sam Lammers

Se binne der mear dy't ûnder de yndruk binne fan de Hearrenfeanspits: "Sam Lammers is in sjeny", wurdt der skreaun op Twitter.

21:10
Sam Lammers sjit wer

SC Hearrenfean-spits Sam Lammers lit dêr wer efkes syn klasse sjen. Hy kapt en draait him tusken twa Ajax-ferdigeners troch en komt ta in skot, dat pakt wurde kin troch keeper André Onana fan de Amsterdammers. De bewegings diene tinken oan de earste goal dy't Lammers tsjin De Graafschap makke, doe't er ek meardere spilers útspile.

21:01
It kommentaar by de 1-0 fan Ajax

Harkje nei it kommentaar fan ferslachjouwer Roelof de Vries by de 1-0 foar Ajax

20:55
Stânbyld foar Johan Cruijff?

De Hearrenfean-fans sprongen foar de wedstriid yn op de aktualiteit fan dizze wike. Der waard bekend dat Johan Cruijff in stânbyld krije sil foar de Johan Cruijff Arena. By Hearrenfean stiet der al langer in stânbyld fan harren klupikoan.

20:53
Gelok foar Hearrenfean

Oef... Dêr hawwe de Feansters gelok! Ajax-middenfjilder Donny van der Beek skoot de bal in pear sintimeterkes njonken. Hy lit nei om Ajax op 2-0 te setten.

20:51
Earste kânske foar Hearrenfean

De earste mooglikheid foar Hearrenfean ûntstiet nei sa'n seis minuten. Sam Lammers krijt tiid om út te heljen, mar syn skot giet krekt njonken. De spits fan de Feansters soarget foar it earste gefaar fan de thúsploech.

20:48
Schøne sjit Ajax al gau op foarsprong

Wat in beroerd begjin foar SC Hearrenfean... Lasse Schøne sjit Ajax al nei trije minuten op foarsprong. It skot fan de middenfjilder, fan sa'n 30 meter ôf, giet oer Hearrenfean-keeper Warner Hahn hinne. Ajax komt op 1-0 yn it Abe Lenstra Stadion.

20:47
Minút stilte

Foardat de wedstriid úteinsette, wie der in minút stilte foar Germ Hofma. De âld-spiler fan SC Hearrenfean ferstoar dizze wike.

20:46
De wedstriid is los!

Ut namme fan SC Hearrenfean hat Ben Rienstra de ôftraap naam en dat betsjut dat de wedstriid tsjin Ajax úteinset is!

19:47
De basisalve fan de Feansters:

Hahn, Floranus, Hoegh, Pierie, Thorsby, Lammers, Rienstra, Zeneli, Bulthuis, Vlap, Kobayashi.

18:57
Wedstriid begjint om 20.45 oere

De wedstriid fan Sportklup Hearrenfean tsjin Ajax yn it Abe Lenstra Stadion begjint aansten om 20.45 oere.

18:31
De foarbeskôging live op Facebook
18:23
Lêste oerwinning tsjin Ajax

"De lêste kear dat SC Hearrenfean thús fan Ajax wûn, is tsien jier lyn", sa seit sportferslachjouwer Andor Faber. Op 30 desimber 2005 lei it fjild yn it Abe Lenstrastadion fol mei snie doe't Ajax op besite kaam.

18:01
De 'Wedstriid fan de wike'

Omrop Fryslân hat elke wike de 'Wedstriid fan de wike'. Alle wiken stiet op radio, telefyzje en online in bysûndere sportwedstriid sintraal. Fan kuorbal oant amateurfuotbal en fan betelle fuotbal oant shorttrack: alles komt foarby. Der wurdt yn de oanrin ekstra omtinken jûn oan de wedstriid, dy't ferkeazen is ta 'Wedstriid fan de wike'. De úteinlike grande finale, de wedstriid sels, is online te folgjen op Omropfryslan.nl en yn de Omrop-app. Somtiden live en oars as gearfetting werom te sjen.

17:47
SC Hearrenfean tsjin Ajax
Foto: Omrop Fryslân
(advertinsje)