Hearrenfeanfroulju kinne oerwinning op Ajax krekt net oer de streek lûke

Nei goed tsien minuten wie de earste grutte kâns yn de wedstriid foar Hearrenfean. Spits Fenna Kalma stuts Tiny Hoekstra fuort, dy't fan de râne fan it strafskopgebiet ôf úthelle. Ajax-doelfrou Lize Kop koe de bal krekt oer de latte hinne tikje.

Dêrnei besocht Ajax it mei wat skotsjes, mar dy waarden net gefaarlik. Hearrenfean wie sekuerder: Hoekstra waard djipstjoerd, kaam ien-op-ien mei Kop en skeat troch de fuotten fan de doelfrou raak.

Dêrnei hie Ajax it measte balbesit, mar skoare tsjin Hearrenfean-keepster Devi Venema slagge net.

Nei it skoft gie it spul lange tiid gelyk op, mar de grutste kânsen wienen earst foar Hearrenfean. Fenna Kalma kopte njonken nei in foarset fan Hoekstra en letter kaam Hoekstra allinnich op Kop ôf. In identike sitewaasje as by de 1-0, mar diskear pakte Kop de balle.

Hoe letter yn de wedstriid, hoe gefaarliker Ajax waard. Earst skeat Ellen Jansen foardel en fiif minuten foar tiid kaam ynfalster Soraya Verhoeve krekt tekoart om de gelykmakker binnen te glydzjen.

Yn de blessueretiid kaam Ajax dochs op 1-1. Ellen Jansen stie each yn each mei Venema en se skode de bal ûnder de Hearrenfean-doelfrou troch.