Wurk oan spoar soarget kommende moannen foar oerlêst reizgers

09 okt 2018 - 17:09

Om't de treinen tusken Ljouwert en Grins hieltyd drokker wurde, komt der in ekstra sneltrein yn de oere op it trajekt te riden. Mar dêrfoar moat der wol in soad oan it spoar ferboud wurde.

Dy wurksumheden binne nedich om de feiligens te garandearjen. In ekstra trein betsjut in swierdere belesting fan it spoar, wêrtroch't de regels ek stranger wurde. Om dêr oan te foldwaan, wurde by Grins en Hurdegaryp de spoaroergongen hielendal ferfongen troch tunnels.

Dêrneist komt der tusken Grins en Zuidhorn op in stik fan acht kilometer in dûbeld spoar, dêr't treinen elkoar passearje kinne. Yn Zuidhorn sels komt der ek noch in nije betonnen spoarbrêge. Op de âlde, stielen brêge wie gjin romte foar twa spoaren en mei dizze betonnen oplossing wurdt ek de lûdsoerlêst fermindere.

in trein rydt by de wurksumheden yn Hurdegaryp del - Foto: Jeroen Boersma, Omrop Fryslân

Troch de wurksumheden giet it spoar de kommende moannen ek in skoft op slot. Dat is net foar te kommen, om't guon dielen fan it spoar hielendal fuorthelle wurde moatte by de wurksumheden.

De data wêrop't de treinen net ride tusken Grins en Ljouwert:

  • Zuidhorn - Hoogkerk: 15 - 29 oktober 2018
  • Zuidhorn - Grins: 17 - 29 oktober 2018
  • Ljouwert - Hurdegaryp en Hurdegaryp - Feanwâlden: 23 - 25 febrewaris 2019
  • Ljouwert - Hurdegaryp en Hurdegaryp - Feanwâlden: 2 - 4 maart 2019
  • Zuidhorn - Hoogkerk: 8 - 11 juny 2019
  • Ljouwert - Grijpskerk: 13 - 23 july 2019
  • Zuidhorn - Hoogkerk: 23 - 29 oktober 2019

Op dizze data wurde bussen ynset troch Arriva.

Trefwurden: 
trein ProRail sneltrein
(advertinsje)
(advertinsje)