Rûzich begjin fan earste dei A7-rjochtsaak

De rjochter joech in algemiene skets fan de oanrin nei 18 novimber 2017. De rol fan Jenny Douwes waard apart behannele. De rjochtbank sette de posts en berjochten fan Douwes op in rychje. De lêste post fan Douwes waard hurdop foarlêzen. Dy pleatste Douwes op 18 novimer: 'Hou het rustig, geen ongelukken veroorzaken'.

Dêrnei naam rjochter Lootsma de gong fan saken op 18 novimber troch. Om 09.45 oere kamen de bussen mei demonstranten út Hollân wei Fryslân yn. De bussen waarden ôfsnien troch in wite bestelbus en letter ek in swarte motor. Ien fan de bussen moast abrupt remje. Ien fan de passazjiers seit dat er dêrtoch syn holle stompte en letsel oprûn.

Neffens tsjûgen wiene der letter slingerjende auto's en agressive mannen by de bussen. Se bonkten ek op de ramen fan de bussen. De bussen koene net fierder ride. De plysje naam gjin aksje, om't se de boel net eskalearje litte woene. Tsientallen minsken rûnen op de dyk om.

In froulike bussjauffeur fan ien fan de bussen naam it beslút om werom te riden. Sy hat nei ôfrin bot lêst hân fan de blokkade. In moanne letter wurke se noch net. Ek moast se gûle by it ferhoar.

Nei de blokkade is der in sletten WhatsApp-groep makke foar de A7-blokkearders. Dy groep wie allinnich foar dejingen dy't by de blokkade wiene. "Alleen voor de echten."

De rjochter hat har ferhaal basearre op 112-meldingen, ferskate bylden fan it barren, oanjeftes en tsjûgen. De ferhoaren fan de blokkearders binne middeis begûn. De earste fertochte wie frij lakonyk oer de blokkade. Hy wie byrider en seit dat hy net presys wist wat der barre soe. It waard in dreech ferhoar. De fertochte beropt him op syn swijrjocht. Hy seit wol dat hy in goed gefoel oerhâlden hat oan de aksje.