LIVEBLOG: ONS Snits - Harkemase Boys

15 sep 2018 - 19:07

It is op it stuit dé wedstriid yn it Fryske fuotbal. No't Cambuur en Hearrenfean mekoar net tsjinkomme, giet de Fryske fuotbalderby tusken ONS Snits en Harkemase Boys. De wâldpiken tsjin de Snitser stedsjers. It is de wedstriid fan de wike by Omrop Fryslân. Folgje alles live yn dit blog. De ôftraap is om 18:00 oere.

20:09
Ein LIVE-blog

Hjirmei binne wy oan de ein kaam fan dit liveblog. Letter op de jûn kinne jo op omropfryslan.nl en op de omrop app reaksjes en bylden ferwachtsje fan dizze wedstriid. Foar no in moaie jûn!

19:54
Harkemase Boys wint Fryske derby fan ONS Snits

It is dien! Harkemase Boys wint de Fryske derby fan ONS Snits. Yn de twadde helte iepene Henny Bouius de skoare foar Harkemase Boys. Martijn Barto makke fuortendaliks de lykmakker. Matchwinner waard Robert Stelpstra. Hy kopte yn de 73ste minút de winnende 2-1 tsjin de touwen.

19:49
Blessueretiid giet yn

De 90 minuten sitte derop en dus giet de blessueretiid yn. Mar hoefolle minuten komme derby? Der is gjin fjirde official en dus wit allinne skiedsrjochter Nick Smit hoefolle ekstra tiid der komt.

19:47
Harkemase Boys wikselt foar it earst

Mei noch twa minuten te gean wikselt Harkemase Boys-trainer Tieme Klompe foar it earst. Jari Slort, de man fan de assist by de 1-2, makket plak foar Pier Veldman. Kinne de Snitsers it de Harekiten noch dreech meitsje yn de slotminuten?

19:43
Jansema hâldt syn ploech yn libben

Oef... Wat is Harkemase Boys-keeper Erick Jansema dêr belangryk foar syn ploech. Hy moat rêding bringe op de ynset fan Genridge Prijor. Noch fiif minuten te gean yn Snits en Harkemase Boys noch altyd op foarsprong: 1-2.

19:40
ONS-trainer Raveneau bringt Snitser Dommerholt

Foar de slotfaze bringt ONS-trainer Paul Raveneau syn lêste wiksel yn it fjild. De berne Snitser Jan Dommerholt mei syn keunsten fertoane yn stee fan Curty Gonzales, dy't derút giet. Efkes foar de wiksel krige Harkemase Boys-oanfierder Henny Bouius in sjitkâns, mar ONS-keeper Barry Ditewig reagearre goed.

19:34
Ramos mist mooglikheid op 2-2

Oei... Yume Ramos wie der hiel ticht by de lykmakker. Fuortendaliks nei de goal fan Harkemase Boys krijt de ynfaller fan ONS in goeie mooglikheid, mar syn skot wurdt pakt troch Harkemase Boys-keeper Erick Jansema. Efkes letter giet in frije traap fan Samir Merraki twa meter njonken.

19:32
HARKEMASE BOYS SKOART!

Wauw! Wat in prachtich doelpunt fan Harkemase Boys. In foarset fan Jari Slort wurdt nei 73 minuten hiel moai binnenkopt troch spits Robert Stelpstra. 2-1 foar Harkemase Boys!

19:30
Doelpuntemakker Barto falt út

Min nijs foar ONS Snits. Martijn Barto, makker fan de iepeningstreffer foar de Snitsers, moat it fjild blessearre ferlitte. Yume Ramos is de ferfanger fan de spits. It is de twadde wiksel by ONS: yn it skoft bleaun Ale de Boer al efter yn de klaaikeamer. Hy is ferfong troch Samir Merraki.

(Advertinsje)
(Advertinsje)