Tuinenga slút lêste frije formaasjepartij passend ôf

02 sep 2018 - 18:00

It partoer fan Ilse Tuinenga, Sjanet Wijnia en Manon Scheepstra hat har seizoen op passende wize ôfsletten: de PC-winners wûnen yn Wergea de lêste frije formaasjepartij fan it jier. Yn de spannende finale wûnen Tuinenga-en-dy mei 5-5 en 6-4 fan Nynke Sybrandy, Wiljo Sybandy en Marrit Zeinstra.

Foto: Henk Hempenius

Op de earste list stie in werhelling fan de PC-finale: Tuinenga tsjin it trio Anne Monfils. De winner wie ek itselde: Tuinenga wie mei 5-2 en 6-2 te sterk. De oare finalist, Sybrandy-en-dy, hoegde op de earste list mar ien earst ôf te stean oan Tineke Dijkstra.

Yn de heale finale wûn Tuinenga mei 5-2 en 6-2 fan Nynke Sinnema, dy't ynfoel foar Sietske Okkema. De susters Sybrandy en Marrit Zeinstra hellen de finale troch mei 5-1 en 6-2 te winnen fan Elly Hofman.

Spannende finale

De finale wie spannend. Nei't Ilse Tuinenga de keats kearde op 2-1 en 6-4, naam har partoer even ôfstân, mar Sybrandy-en-dy kamen goed werom. Nei trije earsten op rige kaam it partoer fan Sybrandy sels op 4-3. Troch in boppeslach fan Sjanet Wijnia kaam it trio Tuinenga werom ta 4-4.

Op 4-4 en 6-6 sloech Nynke Sybrandy op. De bal kaam werom, mar Nynke Sybrandy koe sels de bal foar de keats keare en sa har partoer wer op foarsprong sette. Even letter hie in opslach fan Sybrandy op 5-4 en 2-6 minder sukses: dy gie bûten en sa moast it alfde earst de beslissing bringe yn de lêste partij.

It lêste en wichtichste earst wie foar Ilse Tuinenga-en-dy. Oant 4-4 gie it lykop, mar nei in bal oer de boppe fan Manon Scheepstra stienen Sybrandy-en-dy op 'e dea. Ilse Tuinenga makke sels dien wurk troch op 5-5 en 6-4 in sitbal te slaan.

Lytse preemje foar Hofman

De lytse preemje wie foar Elly Hofman, Marte Altenburg en Martzen Deinum. Dy wûnen de striid om it tredde plak yn in allyksa spannende wedstriid tsjin Sinnema-en-dy. Yn dy wedstriid wie it alles oan de hang.

Trefwurden: 
keatsen Ilse Tuinenga Wergea
(advertinsje)
(advertinsje)