LIVEBLOG: Hjitte yn Fryslân

26 jul 2018 - 11:50

It is al dagen hjit en drûch yn Fryslân. Dat is ek fan ynfloed op ferskate eveneminten, dy't ôfsein of wizige binne. Yn dit liveblog hâlde we dy op de hichte fan alles yn Fryslân wat mei de waarmte te krijen hat.

17:27
Wetterwille yn Snits

Wetterwille by Snits, wêr't bern wetterskye kinne.

16:48
Vitens ropt op ta sunich wetterferbrûk

Fryske boargers moatte sunich wêze mei drinkwetter en dêr net de tún mei sproeie. Dat seit wetterliedingbedriuw Vitens. De lêste wiken is benammen jûns it wetterferbrûk yn Frsylân wol sa'n 30 oant 40 persint heger as oars. In grut part fan dat wetter wurdt brûkt om de tún fan wetter te foarsjen. Vitens, wetterskip Fryslân en de provinsje Fryslân roppe de minsken op om dat net mear te dwaan.

13:46
Wetterwille by Snits
12:36
Sympatike aksje skoalbern
Foto: Ypie Veenstra-Postmus

Esther, Anouk, Femke, Heleen en Jannet út Surhústerfean hawwe tongersdeitemoarn betiid op eigen inisjatyf in soad iistee makke yn wensoarch-kompleks it Suyderhuys. De famkes woene sa op dizze waarme dei wat dwaan foar de 86 bewenners fan it Suyderhuys. Frou Veenhuizen, de beppe fan fjouwer fan de famkes, mocht as earste fan de iistee priuwe.

12:02
Hjittestress by de juwelier

Hjittestress by juwelier Kooi yn Burgum fan 'e moarn, troch it waarme waar bruts de kaai ôf, wêrtroch't de doar net mear iepen koe. Op Facebook wurdt yntusken meld dat de helptroepen de doar fan de saak wat 'oanpast' hawwe, wêrtroch't de meiwurkers it gebou wer yn kinne.

Foto: Juwelier Kooi
11:14
Vitens warskôget
De wetterkraan - Foto: Omrop Fryslân, Timo Jepkema

Ynwenners fan Fryslân, Oerissel en de gemeente Meppel moatte dizze wike rekken hâlde mei legere wetterdruk, benammen yn de jûntiid. Vitens ropt minsken op om sunich mei wetter om te gean, en jout ferskate tips:

- Dûs salang't dyn favorite ferske duorret, faak is dat twa as trije minuten (dus net Bohemian Rhapsody of Stairway to Heaven útsykje)
- Waskje de auto de kommende wike net, of doch it mei in hiel lyts bytsje wetter
- Set in bak yn de goatstien, dêr't wetter yn komt as de hannen of griente wasken wurdt. Dit wetter kin dêrnei brûkt wurde om de planten wetter te jaan.
- Lit net in bad folrinne, mar stap ûnder de dûs, en doch dat wêr as it kin mei-inoar.

11:09
Wat is it hjitste plakje yn Fryslân?
Foto: ANP

Omrop Fryslân siket op dizze ekstreem waarme dei nei it hjitste plakje fan de provinsje. Om mei te dwaan meitsje kinne jo in foto meitsje fan in âlderwetske termometer op it plakje dêr't je binne. Dus net in foto of screenshot fan de mobile telefoan mei in waar-app, mar echt sa'n moaie kwiktermometer of in digitale op bygelyks in muorre of by in tankstasjon. Jo kinne dizze foto stjoere fia de Omrop app, of fia dit formulier, en fertel dêr wol efkes by wêr't de foto makke is.

9:11
Bereiningsferbod yn Fryslân

De maatregels fan Wetterskip Fryslân om it driigjend wettertekoart troch drûchte tsjin te gean, binne fan tongersdei ôf fan krêft. Fan 8.00 oere ôf is it ferbean om grûn- en oerflaktewetter te brûken foar it bereinen fan gerslannen. Oare gewaasken as gers meie wol tusken 22.00 oere jûns en 8.00 oere moarns bereind wurde.

Trefwurden: 
waarmte hjitte
(advertinsje)