LIVEBLOG: Hjitte yn Fryslân

Hjittestress by juwelier Kooi yn Burgum fan 'e moarn, troch it waarme waar bruts de kaai ôf, wêrtroch't de doar net mear iepen koe. Op Facebook wurdt yntusken meld dat de helptroepen de doar fan de saak wat 'oanpast' hawwe, wêrtroch't de meiwurkers it gebou wer yn kinne.

Ynwenners fan Fryslân, Oerissel en de gemeente Meppel moatte dizze wike rekken hâlde mei legere wetterdruk, benammen yn de jûntiid. Vitens ropt minsken op om sunich mei wetter om te gean, en jout ferskate tips:

- Dûs salang't dyn favorite ferske duorret, faak is dat twa as trije minuten (dus net Bohemian Rhapsody of Stairway to Heaven útsykje)
- Waskje de auto de kommende wike net, of doch it mei in hiel lyts bytsje wetter
- Set in bak yn de goatstien, dêr't wetter yn komt as de hannen of griente wasken wurdt. Dit wetter kin dêrnei brûkt wurde om de planten wetter te jaan.
- Lit net in bad folrinne, mar stap ûnder de dûs, en doch dat wêr as it kin mei-inoar.

Omrop Fryslân siket op dizze ekstreem waarme dei nei it hjitste plakje fan de provinsje. Om mei te dwaan meitsje kinne jo in foto meitsje fan in âlderwetske termometer op it plakje dêr't je binne. Dus net in foto of screenshot fan de mobile telefoan mei in waar-app, mar echt sa'n moaie kwiktermometer of in digitale op bygelyks in muorre of by in tankstasjon. Jo kinne dizze foto stjoere fia de Omrop app, of fia dit formulier, en fertel dêr wol efkes by wêr't de foto makke is.

De maatregels fan Wetterskip Fryslân om it driigjend wettertekoart troch drûchte tsjin te gean, binne fan tongersdei ôf fan krêft. Fan 8.00 oere ôf is it ferbean om grûn- en oerflaktewetter te brûken foar it bereinen fan gerslannen. Oare gewaasken as gers meie wol tusken 22.00 oere jûns en 8.00 oere moarns bereind wurde.