Freedsmerk oer gelok: "In hûs, freonen … Wat wolle jo noch mear?"
Neffens it CBS jout 88 prosint fan de Nederlanners him- of harsels of it mêd fan lok in sân of heger. Op de Ljouwerter freedsmerk wiene de measte minsken ek posityf.
"Ik kom wol op in acht!", sei ien. "Ik haw it finansjeel goed: in moai hûs en noflike freonen. Wat wolle jo noch mear?" Fansels wiene der ek oare lûden te hearen.
In, op himsels lokkich útsjende senior, fertelde oer de nije elektryske fytsen dy't hy en syn frou kocht hiene, mar dat se nea pake en beppe wurde sille, om't se sels gjin bern krije koene.
En in widner fertelde dat er it no allegearre allinnich dwaan moat en dat dêr net folle oan is. "Daliks set ik mar wer in kant-en-klear-miel op tafel en kin ik oan nimmen fertelle dat ik de Omrop-man tsjinkaam bin. Ik kin myn ferhaal nearne mear kwyt."
De poelier wie optein dat syn frou nei wiken goed út in koma kaam is en it no de goeie kant op giet. "Dêr wurd ik lokkich fan!"
By oaren sit it lok benammen yn lytse dinkjes: it moaie waar, de boat en -sa't in toerist witte liet-: "Dat ik vandaag in Friesland mag zijn. Heerlijk toch!"