LF2018 foarútblik: Leafde tusken de tomaten

05 jan 2018 - 15:23

It kulturele haadstêdjier is offisjeel los en der wurdt rûnom yn 'e provinsje hurd wurke oan allegearre kulturele aktiviteiten. Ien derfan is Lost in the Greenhouse: in teäter- en muzykfoarstelling spile troch Orkater. De foarstelling spilet him ôf tusken de tomateplanten yn 'e kassen fan Seisbierrum.

Fryske roots

Teätermakkers en akteurs fan Orkater Geert Lageveen en Titus Tiel Groenestege keare foar de gelegenheid werom nei harren roots: Lageveen komt út Drachten en Groenestege út Warkum. It stik is ynspirearre op de dea fan in jonge Poal dy't wurke by de kassen fan Hartman yn Seisbierrum. Hy is ferdronken yn Frjentsjer.

In Poalsk-Fryske leafde

It ferhaal giet oer in leafde tusken de Poalske Woitek, spile troch in Poalske akteur, en de Fryske Klaske, spile troch aktrise Maartje van de Wetering. Woitek is wurknimmer yn 'e kassen en Klaske is de dochter fan de baas.

It giet oer de ferskate kultueren dy't yn 'e kassen wurkje. "De Friezen, Polen, Turkse Grieken en Roemenen'', fertelt Lageveen. "Ze leven langs elkaar heen en er hangt een spanning. Toch hebben ze iets met elkaar gemeen. Ze hebben allemaal een gemis. De Polen bijvoorbeeld, zijn hier soms zo lang, dat ze een deel van hun leven van hun familie in Polen missen en voorbij zien gaan. En de Friezen verlangen terug naar de tijd dat er alleen maar Friezen werkten en dat er volop geklaverjast kon worden. Polen klaverjassen niet.''

Foar it stik wurdt gearwurke mei de Poalske komponist Radek Fedyk en HaFaBra's út Fryslân. Lost in the Green House giet op 13 april yn premjêre.
 

Trefwurden: 
LF2018
(advertinsje)
(advertinsje)