LDODK wint fan Oranje Wit, SCO spylt lyk tsjin Tweemaal Zes

10 septimber 2016, 18:18 • 1 minút lêstiid

SCO tsjin Tweemaal Zes © PEEM Media

De kuorballers fan LDODK wûnen sneon de útwedstriid by Oranje Wit mei 27-20 yn de eareklasse. Yn Dordrecht wist LDODK yn de earste helte stadichoan út te rinnen nei in 15-10 foarsprong by it skoft. Nei rêst makke de ploech fan trainer Erik Wolsink ienfâldich dien wurk.

In klasse leger spile SCO op eigen fjild mei 17-17 lyk tsjin Tweemaal Zes. De ploech fan trainer Aegle Frieswijk seach by rêst tsjin in 11-6 efterstân oan. De Aldeholtpeasters rûnen de skea nei de tee lykwols knap yn.