"Takomst keatsen stiet faai"
It keatsen ferkeart yn in krisis. Der komme hieltyd minder besikers op de fjilden, omdat it spultsje troch de bal en de want te statysk wurden is. It taktyske tuskenspul is ferdwûn en dêrmei ek de spanning. As de ferienings en it KNKB no gjin aksje ûndernimme en dit net feroarje, dan sjocht Johannes Westra, de foarsitter fan de PC, gjin takomst foar de Fryske keatssport.
Westra skriuwt dit yn in iepen brief oan 'e KNKB en de bestjoeren fan de 125 keatsferienings. Hy hopet dat dit sinjaal op 20 novimber by de ledegearkomste oppakt wurdt.
