Himpkwekerij yn flat Drachten
Yn in flatwenning oan de Melkkelder yn Drachten hat de plysje tiisdei in himpkwekerij oprôle. Nei oanlieding fan in tip hawwe plysjes de wenning besocht. Yn de wenning - op de tredde etaazje fan de flat - waarden goed 350 himpplanten oantroffen. Neffens de plysje wie der in grut risiko op brân.
De hierder fan it appartemint wie op it tiidstip fan de plysje-aksje net oanwêzich. De plysje wit om wa't it giet en sil de man ynkoarten hearre.