Gemeente Ljouwert wol guon studinten dochs enerzjytaslach útbetelje

Enerzjytaslach © ANP Foto
It kolleezje fan de gemeente Ljouwert wol studinten mei in eigen enerzjyrekken de enerzjytaslach dochs útbetelje. Ek húshâldens mei in ynkommen tusken de 125 en 150 persint fan de bystânsnoarm komme wat it kolleezje oanbelanget yn oanmerking.
Dy groepen hawwe neffens it kabinet gjin rjocht op de enerzjytaslach fan 1.300 euro. De gemeente wol dizze kwetsbere groepen no dochs helpe. Foar it oanfoljende maatregelepakket wurdt sa'n 4,3 miljoen euro útlutsen.
Der binne yn de gemeente Ljouwert sa'n 4.000 studintehúshâldingen. De gemeente tinkt dat dêrfan tusken de 1.000 en 1.500 húshâldingen yn oanmerking komme foar de taslach binnen de ferromme regels. Dat giet dan om in totaalbedrach tusken de 1,3 en 1,95 miljoen euro.
"Het zou niet eerlijk zijn als een student die ook last heeft van deze energieprijzen buiten deze regeling zou vallen. Wij vullen het gat op dat het Rijk laat liggen. Wij hebben daarin een voortrekkersrol in Nederland", seit wethâlder Hein Kuiken fan de gemeente Ljouwert.

Net alle gemeenten

Ljouwert is net de earste gemeente dy't guon studinten de enerzjytaslach takenne wol. Tilburg, Delft en Zwolle wienen de earste gemeenten dy't dat dienen. De gemeente Grins wol der, krekt as de measte gemeenten, lykwols noch net oan.
Net alle gemeenten dy't wol útkeare hawwe deselde regels foar studinten. Sa krije yn Tilburg allinnich studinten boppe de 21 jier mei in eigen enerzjykontrakt de taslach. Yn Ljouwert kin it al fan 18 jier ôf.
Yn Zwolle en Hilversum krije alle studinten dy't hier mei enerzjykosten betelje de taslach.

Bedriuwslibben ek helpe

Foar it bedriuwslibben wol it kolleezje fan de Fryske haadstêd ek ekstra maatregels nimme. Der wurdt tocht oan ûnder mear ynvestearringsfûnsen om ûndernimmers te helpen mei ynnovaasje en se takomstbestindich te meitsjen.
De gemeente is ek yn petear mei buert- en doarpshuzen, sportklups en oare maatskiplike ynstellingen. It is neffens harren net dúdlik oft it Ryk ek foar dizze organisaasjes jild frijmakket.