Femke Wiersma: "BBB wol graach Deputearre Steaten yn"

De BBB is op dit stuit de grutste partij yn de pelingen foar de ferkiezingen foar Provinsjale Steaten. Wiersma hopet dan ek dat se nei de ferkiezingen yn maart 2023 yn de koälysje komme.

Wiersma woe noch net sizze oft sy listlûker wurdt fan de partij. Yn de kuiergongen wurdt dat lûd wol heard mar offisjeel hat de BBB noch net in list nei bûten brocht.

Neffens Wiersma is de BBB populêr omt de partij njonken de boarger stiet en goed harket nei wat der libbet yn de maatskippij. "Der binne minsken dy't ús in populistyske partij fine. Dat fyn ik eins wol in geuzennamme want populistysk betsjut datst neist de minsken stiest. En dat is krekt wat wy wolle."

Yn it partijprogramma fan de BBB stiet in langjierrich plattelânsbelied op nûmer ien. "Dan moatst tinke oan foarsjenningen yn de doarpen dy't beholden bliuwe moatte of miskien werom komme moatte. En foar wentebou tinke wy foaral oan ynbreiding. Dus yn de doarpen leechsteande gebouwen brûke om dêr wenningen yn te meitsjen. Brûk de romte dy't der al is."

Oer it plan fan minister Hugo de Jonge om de helte fan alle wenningen dy't te hier of te keap binne, te reservearjen foar ynwenners fan de eigen gemeente is Wiersma posityf. Se sjocht noch wol wat problemen yn de útfiering. In fraachstik is bygelyks wa't dan wol op de frije merk ferkeapje mei en wa net.

Ek de oare foarumleden - Harry van der Molen (Twadde Keamerlid foar it CDA) en Jouke Douwe de Vries (wethâlder foar S!N yn Noardeast-Fryslân) - wiene posityf oer dit plan omdat it neffens van der Molen in geunstich effekt ha sil op de mienskip en omdat jongeren dan wer mear kânsen krije op de wenningmerk.

In grut part fan de diskusje gie oer de enerzjykrisis dêr't de trije foarumleden mekoar goed fine koene. "De need is heech en de oerheid moat no mei in oplossing komme. Dat kin net wachtsje oant jannewaris want dat is te let", sa sei wethâlder Jouke Douwe de Vries. Hy fertelde dat wenningkorporaasjes yn syn gemeente yn twa moanne tiid in ferheging fan 30 prosint sjogge fan minsken dy't de hier net mear betelje kinne.

In priisplafond foar enerzjy soe neffens de foarumleden in maatregel wêze dy't foar in soad minsken seadden oan 'e dyk sette kin, mar Harry van der Molen wiisde der op dat dat net sa maklik te regeljen is yn ús lân mei 44 enerzjybedriuwen dy't allegear har eigen tariven hawwe.

In oare saak dêr't de trije foarumleden it oer iens wiene wiene de winsten fan de enerzjybedriuwen. Harry van der Molen: "De enerzjybedriuwen dy't no grouwe winsten meitsje moatte in part dêrfan werom jaan oan de gewoane boarger. Ik hoopje dat sa'n regeling yn de miljoenenota opnommen is."