FryslânDOK: Sykje sûnder ein, oer M.C. Escher

De trijedielige dokumintêre is te sjen op 26 en 27 febrewaris , 5 en 6 maart, en 12 en 13 maart by NPO2 en by Omrop Fryslân.

Maurits Cornelis Escher (Ljouwert 1898 - Hilversum 1972) makke gravueres, houtfiken en stienprinten yn swart-wyt. Optyske yllúzjes, foar it each ûnmooglike konstruksjes dêr't er boartet mei matematyske prinsipes. Escher wie lykwols gjin wiskundige, hy wie oplaat as grafikus. Syn ynspiraasje wie 'de ûneinichheid'. Dwaande wêze mei oarder, 'regelmaat' en syklyske werhellings joech him rêst en hâldfêst.

Yn 2018 makken filmregisseur Robin Lutz en keunsthistorikus Marijnke de Jong de film 'Sykje sûnder ein'. Oan de hân fan brieven en deiboeken fertelt Escher sels syn libbensferhaal, yn de Fryske ferzje mei de stim fan akteur Jan Arendz. Mei trijediminsjonale animaasjes, argyfbylden en ûnbekende ferhalen ferskynt der in nij, persoanlik byld fan de keunstner.

Muzikant en bewûnderder Graham Nash komt oan it wurd. Lykas Eschers soannen George (92) en Jan (86). Harren heit sleat him meastal op yn syn wurkkeamer, fertelle se. Hy hie it gefoel dat net ien him begriep.

Yn 1959 skreau Escher: 'Diep treurig en katerachtig blijft het feit dat ik tegenwoordig een taal begin te spreken die door slechts zeer weinigen wordt verstaan.' Hy bleau sykjen nei manieren om ûneinichheid wer te jaan op it flak fan in simpel stik tekenpapier.