Coronanijs 27 jannewaris: Polsbantsjes werom, gruttere terrassen bliuwe yn Ljouwert

Fan freed 28 jannewaris ôf kinne der yn de Ljouwerter binnenstêd wer polsbantsjes brûkt wurde foar de hoareka en kultuer. Troch de lockdown wie dit systeem tydlik stopset.

De polsbantsjes binne tusken 11.00-21.00 oere op it Saailân en it Waagplein te heljen, op fertoan fan in QR-koade en identiteitsbewiis. De bantsjes sjogge der alle dagen oars út. By de checkpoints binne ek mûlkapkes en foarljochting te krijen.

Lanlik binne der tusken woansdei- en tongersdeitemoarn 64.602 positive coronatesten registrearre. Dat is ien fan de heechste oantallen ea. Is is net bekend hoefolle besmettingen echt befêstige binne, om't it RIVM te lijen hat fan grutte efterstannen.

Oer de ôfrûne wike waarden 411.156 coronagefallen registrearre, dat is 61 persint heger as in wike earder. Yn trochsneed gie it om 58.737 besmettingen deis yn de ôfrûne wike.

Yn Fryslân binne yn de ôfrûne 24 oeren 1.654 nije coronabesmettingen registrearre by it RIVM. De efterstân by it registrearjen fan positive coronagefallen is grut. It RIVM meldt net mear alle dagen hoe grut oft dy efterstân is.

It trochsneed tal besmettingen oer de ôfrûne sân dagen jout in better byld. Yn Fryslân leit dat deistige trochsneed no op 1.353 besmettingen. Woansdei lei it op 1.247 besmettingen, in wike lyn op 835.

Yn Fryslân is yn de ôfrûne 24 oeren ien stjergefal fêststeld as gefolch fan it coronafirus. Dat giet om in ynwenner fan Dantumadiel. Der is ien Fries mei it coronafirus opnaam yn it sikehûs, in ynwenner fan Ljouwert.

De Europeeske sûnenstsjinst ECDC warskôget dat it tal besmettingen ûnder âldere minsken tanimt. Oant no ta seach de tsjinst it firus benammen by jongelju en jonge folwoeksenen. As mear âlderein it krijt, is de kâns op mear klachten en stjergefallen heger.

De omikronweach ferrint neffens ECDC oant no ta relatyf myld. Dat hat mei de fariant te krijen, mar ek mei it boosterjen. Dêrom ropt ECDC op om dochs foaral de boosterprik te heljen.

It Europeesk agintskip foar genêsmiddels EMA is posityf oer de coronapillen fan Pfizer. De tafersjochhâlder advisearret de Europeeske Kommisje om it middel goedkarring te jaan.

Nederlân hie de pillen al brûke mocht, mar wachtet noch op goedkarring. It giet om it middel Paxlovid: it is bedoeld foar minsken dy't net posityf test binne en in grut risiko slim siik te wurden as sy wol besmet wurde. Der moatte dan fiif dagen lang twa pillen ynnaam wurde.

It is no oan húsdokters om te sjen of en hoe't de Pfizer-coronapil ynset wurde kine. Sy moatte in behannelrjochtline opstelle. Op basis dêrfan kin it middel foarskreaun wurde oan coronapasjinten.

Nederlân hat noch gjin pillen besteld, de ôfspraak is om de ynkeap Europeesk te regeljen. It ministearje fan Folkssûnens wit net hoefolle tiid dêrfoar nedich is.

Neffens it Landelijk Coördinatiecentrum Patiënten Spreiding lizze der yn Nederlân yn totaal 233 pasjinten mei corona op de intensive cares. Dat binne der 16 minder as in dei earder en it is it leechste oantal sûnt 1 novimber.

Op de ferpleechôfdielingen lizze no 898 pasjinten mei corona, dat binne der 7 minder as woansdei. Yn de ôfrûne dei binne der 150 pasjinten opnaam op de ferpleechôfdielingen en 11 pasjinten op de intensive cares.

Nettsjinsteande de coronapandemy sjogge reisorganisaasjes al wer in soad fakânsjeboekingen. By Sunweb binne der sels al mear boekingen as foar de krisis. By Corendon komme de sifers dêrby yn 'e buert.

GOGO merkt dat jongelju ek wer massaal simmerfakânsjes planne. Reisorganisaasje TUI merkt dat minsken noch wol foaral binnen Europa in simmerfakânsje boeke.

Dat de coronaregels op hieltyd mear plakken ferromme wurde, jout Nederlanners betrouwen. In soad minsken geane op wintersport en minsken boeke lúksere fakânsjes.

Reisbrânsjeorganisaasje ANVR hopet op mear ferrommingenen en dat foar elts lân apart sjoen wurde kin wat der mooglik is.

De PO-raad foar it primêr ûnderwiis jout oan dat der by basisskoallen en âlden noch in soad ûndúdlikens is oer de ferrommingen en karantêneregels.

Der wurdt noch wachte op in 'servicedokumint' fan it ministearje, sa't de haadlinen foar de praktyk útwurke wurde kinne. It ûnderwiis wachtet noch op in soad details.

Learlingen hoege net mear yn karantêne as sy yn kontakt west hawwe mei ien dy't posityf test is, as sy sels gjin klachten hawwe. Dat moat mear fysyk ûnderwiis mooglik meitsje.

Guon nachtklups en nachthoareka trune der op oan dat in iepening foar de sektor miskien mooglik is mei in 1G-belied. Dêrby soene alle besikers test wurde moatte op corona.

Belange-organisaasje Nachtbelang hat noch wol fragen. Men fynt dat jojobelied foarkaam wurde moat en it soe wol dreech wêze om ûnderskied te meitsjen tusken ferskate soarten nachthoareka. Mei de slutingstiid fan 22.00 oere kin de sektor noch net folle, wurdt der sein.

De Nederlandse Stichting Water- & Zwemveiligheid driget mei rjochtsaken tsjin goed 300 Nederlânske gemeenten dêr't by swimlessen in QR-koade frege wurdt.

Earder bepaalde in rjochter dat by in swimbad yn Hilversum kontrôle fan coronatagongsbewizen fan âlden net nedich wie. De rjochter oardiele dat swimles ûnderwiis is en dat it swimbad dêrom net as gewoane binnensportlokaasje jildt. De QR-kontrôle soe dêrom net ferplichte wêze.

Oft dizze útspraak ek foar oare swimbaden jildt, is noch net dúdlik. Neffens de swimorganisaasje soene der lanlik mear as 10.000 bern thús sitte om't har âlden nei mei nei binnen meie foar de swimles.

SC Cambuur hat tongersdeitemiddei in primeur: as earste betelle fuotbalklup yn Nederlân spilet Cambuur wer in wedstriid mei publyk. It giet om de oefenwedstriid tsjin Heracles Almelo, yn it Cambuurstadion yn Ljouwert. De stadions binne wer tagonklik, mar wol foar mar in tredde part fan it maksimum oantal.

Sportferslachjouwer Andor Faber jout oan dat allinne de haadtribune iepen is. "Dat is de grutste tribune dêr't oars in pear tûzen man op kinne. No mei der in tredde sitte: dat is sa'n 1.000 man."

Dat oantal sil lykwols net helle wurde. "Mei sa'n 100-200 man sil it wol ophâlde. Dizze wedstriid is sa tusken de middei ek net op it meast gaadlike tiidstip, dus it falt my noch net ôf. De fêste ploech âldere fans dy't ek altyd by de trainingen is, is no ek oanwêzich."

Dat der mar in tredde mei, dêr is Cambuur net wiis mei. "Daarmee schieten de clubs letterlijk niks op en stijgen de kosten voor het organiseren van een wedstrijd aanzienlijk zonder dat er extra inkomsten tegenover staan", ferklearre de klup earder. Ek moat Cambuur in soad supporters teloarstelle.

Neffens algemien direkteur Ard de Graaf is der wol oantoand mei de FieldLabs dat wedstriden op in feilige wize mei publyk kinne.

Op guon plakken yn it lân wurdt sprutsen oer in 'testynfarkt' om't it sa drok is, dat der in grutte efterstân is yn it ferwurkjen fan de testen en it trochjaan fan de útslaggen. Op dit stuit is der sa'n 78.000 testen net offisjeel registrearre.

It hat te krijen mei it feit dat de GGD wurket mei twa ferskate systemen. Der is sicht op it totaal tal besmettingen, mar net eltsenien kin fluch op 'e hichte brocht wurde fan de útslach.

Yn Fryslân kin de GGD it testen noch oan, jout in wurdfierder oan. De testkapasiteit is grut genôch, mar GGD Fryslân fernimt ek dat it drok is. Woansdei binne der bygelyks 4.798 testen ôfnaam.

In grutte efterstân is der yn ús provinsje dus net, mar it soe yn guon gefallen wol krekt wat langer duorje kinne foar't in útslach binnen is.

GGD Fryslân hat kontakt mei kommersjele teststrjitten lykas dy foar 'Testen voor Toegang.' Dêr kin in berop op dien wurde as it nedich is, mar sy hoege noch net yn aksje te kommen.

De ferrommingen fan de coronamaatregels binne spannend, mar trochgean mei de lockdown soe ek spannend west hawwe, seit foarsitter Karin Groeneveld fan de Fryske Húsdoktersferiening.

Minister Ernst Kuipers hat oanjûn net allinne mear te sjen nei de besetting yn de sikehuzen, mar ek nei oft de húsdokters de soarch oankinne. Mei de omikronfariant bedarje minder minsken yn it sikehûs, mar pasjinten dogge faak wol in berop op húsdokters.

Neffens Groeneveld kinne de húsdokters dy soarch op dit stuit noch goed oan. Sy is sels hûsdokter op De Lemmer. Yn har praktyk binne der gjin coronapasjinten dy't thús behannele binne mei ekstra soerstof.

De Fryske húsdokters hâlde de drokte mei-inoar yn de gaten. Troch corona kinne hûsdokters ek sels útfalle. Oant no ta hat dat lykwols net foar grutte problemen soarge.

Lanlik moatte goed 5.800 wurkjouwers de folsleine leanstipe werombetelje dy't sy yn de maitiid fan 2020 krigen hawwe. De bedriuwen krigen in foarskot fan it UWV om de salarissen yn coronatiid troch te beteljen. Dêrfoar moast in ferwachting fan de omset trochjûn wurde.

Foar 10 jannewaris fan dit jier moasten de wurkjouwers trochjaan wat it echte ferlies yn 2020 wie. Sa koe der útrekkene wurde op hoefolle stipe sy echt rjocht hiene. Goed 5.800 bedriuwen hawwe it úteinlike ferlies net trochjûn en moatte dêrom alles werombetelje. Der is net bekendmakke om hoefolle Fryske bedriuwen it giet.

Yn totaal giet it om sa'n 160 miljoen euro. Dy fergoeding is yn it ramt fan de Noodmaatregel Overbrugging Werkgelegenheid (NOW) útkeard. De wurkjouwers kinne noch wol beswier oantekenje. Om foar te kommen dat de bedriuwen fuort yn jildneed komme, kin der in betelregeling makke wurde.

Minister Dilan Yesilgöz fan Justysje en Feiligens sil moandei yn petear mei de boargemasters dêr't grut karnaval fierd wurdt. It is op dit stuit noch ûndúdlik hoe't it coronabelied der ein febrewaris út sjocht. De minister is benaud dat aanst de regels yn eltse gemeente of regio ferskille.

Yn Fryslân binne der mar sa'n sântal doarpen dêr't fan âlds karnaval fierd wurdt, lykas Snits (Drabbelterp), Blauhús (Fyfkesryk), Bakhuzen (Bokkedam) en Steggerda. Dy fiere it feest lykwols mar op lytse skaal. Yn 'e foargeande coronajierren hawwe guon karnavalsferieningen yn Fryslân harren fieringen skrast of oanpast.

Om't der wer publyk wolkom is by sportwedstriden binnen, hat de Ljouwerter basketbalklup de begjintiden fan de kommende wedstriden oanpast. Ek wurdt de wedstriid fan Aris tsjin Yoast United ferpleatst fan 4 nei 6 febrewaris om 16.00 oere. Sa wol Aris de taskôgers de mooglikheid jaan om nei de tiid noch efkes nei te praten.

Neffens de nijste sifers fan it Acute Zorgnetwerk Noord Nederland lizze der op dit stuit 12 pasjinten mei it coronafirus yn de Fryske sikehuzen. Fan har lizze der 7 op de intensive care en 5 op oare ôfdielingen.

Yn de trije noardlike provinsjes giet it om 44 pasjinten: 16 op de intensive care en 28 op oare ôfdielingen.

Nederlân kleuret tongersdei yn alle gefallen wer folslein donkerread op de Europeeske coronakaart, foar de alfde wike op rige. De provinsje Noard-Hollân is wer de grutste brânkearn. Yn de ôfrûne twa wiken binne dêr hast 119.000 ynwenners posityf test. Omrekkene komt dat del op sa 'n 4126 gefallen op elke 100.000 minsken. Dat is hast 35 persint heger as by it oersjoch fan ferline wike. Yn Amsterdam is likernôch ien op elke tweintich ynwenners op it stuit besmet.

Nei Noard-Hollân folget de provinsje Utrecht. Dêr binne yn de ôfrûne twa wiken 3639 op elke 100.000 ynwenners posityf test. Dêrnei komme Súd-Hollân (3497), Seelân (3138), Oerisel (3014), Noard-Brabân (2885), Flevolân (2840), Grinslân (2595), Gelderlân (2567), Limburch (2108), Drinte (2068) en Fryslân (2013). Foar it earst komme alle tolve provinsjes út boppe de grins fan 2000 per 100.000, oftewol 2 persint fan alle ynwenners.

De omikronfariant fan it coronafirus bliuwt him tige hurd fersprieden troch Europa, it tal besmettingen rint oeral bot op. Dat is tongersdei ek te sjen op de nije coronakaart fan de Europeeske sûnenstsjinst ECDC. Hast alle regio's steane dan op donkerread, it heechste warskôgingsnivo. Mooglik bliuwt in inkelde regio noch krekt in nivo leger stykjen, op read. It is noch nea bard dat alle streken op it heechst mooglike nivo stiene.

Learlingen fan groep 8 mochten juster fysyk nei de iepen dei fan Marne College yn Boalsert. Troch corona wienen dy dagen by middelbere skoalle inkeld online, mar no koenen de bern écht wer nei skoalle ta. It Marne College yn Boalsert liet de learlingen sykje nei de ferburgen skat fan de skoalle. En ek ferslachjouwer Willem Vermeltfoort die de puzeltocht.

Wolkom by it liveblog fan tongersdei 27 jannewaris oer de ûntwikkelingen oangeande it coronafirus yn Fryslân. Us liveblog fan woandei neilêze kin hjir.