Operaasje Fryske Flagge: Gary Kooistra socht it aventoer yn Kanada

Gary en Sandy Kooistra groeiden op yn Aldegea (Smellingerlân) as Grietzen en Sippy, mar wenje yntusken al sa'n 40 jier yn Cochrane, yn Kanada.

"Doe't wy noch net troud wiene hiene wy it der al ris oer dat wy nei Kanada ta woene. Earst diene wy oare dingen. Ik wurke oan de wetterliedingen, op it stasjon by Spannenburch. Mar somtiden sieten je mar wat neat te dwaan om't der net altyd wurk wie. Doe sei myn frou: wêrom geane wy net nei Kanada?", fertelt Gary.

It idee om te emigrearjen wie der dus al lang. It pear frege it oan, mocht by de ambassade komme foar in talittingspetear en net folle letter mochten Gary en Sandy mei harren twa soannen fan 3 en 6 jier al ferhúzje.

"Us âlden fûnen it wol spitich", fertelt Gary. "Myn skoanmem hielendal, want sy wie allinne. Mar sy hat hjir ek west."

De kar foar Kanada kaam net út de loft fallen. "Yn 't foar hiene wy hjir al ris op fakânsje west. En myn suske wenne hjir al yn Kanada, dêr hawwe wy wol west. Wy hawwe de omkriten ferkend en sa kamen wy ek hjir yn Cochrane." Beiden hiene soks fan: as wy ea emigrearje, dan wolle wy nei Cochrane.

Earst wie de húshâlding efkes út fan hûs by de sus fan Gary, mar net al te lang dêrnei koene sy sels in hûs keapje. Ek in baan wie al gau fûn.

Eins hat Gary de rest fan syn wurklibben as elektrisien wurke yn de wentebou en letter yn it ûnderhâld fan ferskate fabriken. It bedriuw dêr't hy foar wurke hie fabriken yn Calgary, Montreal, Toronto en Vancouver, mar ek ien yn Brazilië. Dêr hat de famylje ek noch in skoft wenne. Mar doe't it kontrakt dêr ôfrûn wie, binne sy gau weromgien nei Kanada.

Sy fine it beide noflik om yn Kanada te wenjen. It pear wennet de lêste 16 jier yn in hûs op in heuvel. "Wy sjogge oer it lân en in rivier. Wy kinne de wrâld hjir prachtich moai oer sjen," seit Gary.

Sa no en dan geane Gary en Sandy nochris werom nei Fryslân. "Dat dogge wy geregeld, efkes werom, nei de famylje ta. Je binne yn Fryslân berne en Fryslân bliuwt altyd noch in bytsje yn it hert sitten."

Yn Fryslân wenje, dat sit der net mear yn. Sy binne yntusken beide Kanadees en it langstme nei Fryslân is net sa grut dat sy weromkomme wolle. Mar de bern binne de doar út en dus prate Gary en syn frou thús wol wer hieltyd mear Frysk mei inoar.