Coronanijs 26 jannewaris: Optrede foar artysten bliuwt lestich

Gruthannels dy't oan hoareka leverje, belibje dizze woansdei in topdei. By Krikke yn Grou is op dizze earste dei fan de ferrommingen it dûbele oantal frachtauto's op 'n paad om guod te leverjen oan kafees en restaurants yn Noard-Nederlân.

Algemien direkteur Ard de Graaf fan Cambuur is bot teloarsteld dat de stadions noch altyd net net hielendal fol meie. Mei de nije coronaregels meie net mear as ientredde fan it maksimumtal taskôgers talitten wurde by wedstiden.

De rek is derút, neffens De Graaf. Supporters wolle wer nei de wedstriden. En dat kin yn de feilige bûtenomjouwing fan in fuotbalstadion. Boppedat mist de klup no in soad ynkomsten. Se moatte wol kosten meitsje by beheinde iepenstelling, mar meie minder besikers talitte.

De Graaf freget him ôf wêrom't se oars meidien hawwe oan de Fieldlab-eksperiminten. It kin feilich, sa hat bliken dien. Finansjeel sjoen kinne wedstriden yn it Cambuurstadion better sûnder publyk spile wurde. As de achterban dat wol, is dat in mooglikheid, seit De Graaf. De kommende tiid is der oerlis.

Troch de ferrommingen fan de coronamaatregels dy't tiisdeitejûn ôfkundige waarden, mochten de musea woansdei lang om let de doarren wer iepenje en dêr binne se tige bliid mei.

Wy bellen mei it Fries Museum yn Ljouwert, it Reedrydmuseum yn Hylpen en Museum 't Behouden Huys op Skylge.

Yn Fryslân binne yn de ôfrûne 24 oeren 1.381 nije coronabesmettingen registrearre by it RIVM. De efterstân by it registrearjen fan positive coronagefallen is lanlik oprûn nei mear as sa'n 78.000.

Lês hjir it folsleine berjocht.

Foar de amateurfuotballers komt dit wykein in ein oan in lange perioade fan stil sitten. De kompetysjes yn de saneamde B-kategory gean fierder neffens it gewoane programma. De A-kategory, ûnder oare de earste alvetallen dy't útkomme yn de twadde divyzje oant en mei de fiifde klasse, begjinne yn it wykein fan 5 en 6 febrewaris mei in ynhelprogramma.

De KNVB nimt freed in beslút oer hoe't de amateurkompetysjes út de A-kategory útspile wurde.

Learlingen fan groep 8 meie nei iepen dagen fan middelbere skoallen. Dat hat ûnderwiisminister Dennis Wiersma sein yn de Twadde Keamer. Yn de measte gefallen moatte se wol allinnich komme: folwoeksenen meie yn prinsipe net mei de skoalle yn. By praktykûnderwiis, spesjaal fuortset ûnderwiis, vmbo basisberopsrjochte learwei (BB) en kaderberopsrjochte learwei KB) mei wol ien âlder of fersoarger mei de learling mei.

Skoallen wurdt driuwend advisearre aktiviteiten ek online oan te bieden. Aktiviteiten foar de sfear binne net tastien yn de skoallen. It kabinet advisearret skoallen om bygelyks mei tiidsôfpraken te wurkjen tsjin de drokte. Wichtich is benammen dat it tal kontaktmominten beheind wurdt.

Iepen dagen wurde meastentiids yn it begjin fan it jier hâlden. Fanwege corona moasten middelbere skoallen al faker it programma oanpasse. Dochs binne fysike aktiviteiten mooglik en belangryk, neffens Wiersma.

Nei skatting 130.000 minsken wachtsje noch op in operaasje. Dat meldt direkteur Karina Raaijmakers fan de Nederlandse Zorgautoriteit (NZa) oan de Twadde Keamer. De sifers binne basearre op ynformaasje út 57 sikehuzen. Dat binne net alle sikehûsorganisaasjes yn Nederlân. De NZa tinkt wol dat 130.000 operaasjes tichtby de echte sifers komt.

Fanwege de coronasoarch yn de sikehuzen binne de ôfrûne twa jier hiel wat operaasjes útsteld. Ofrûne moanne waarden yn de meast foarkommende spesjalismen noch 13.000 operaasjes útsteld.

De kâns dat minsken mei de omikronfariant yn it sikehûs opnaam wurde moatte, leit 40 persint leger as by de deltafariant fan it coronafirus. Fan dy pasjinten wurdt sawat 10 prosint sa siik dat se nei de intensive care moatte. By de eardere fariant wie dat noch 20 persint. Dat stiet yn de oannames fan RIVM-direkteur Jaap van Dissel dy't er de Twadde Keamer foarhâlde.

Yn oare lannen docht him in soartgelikense delgong foar yn de sikehûsopnamen. Minsken mei de omikronfariant lizze boppedat koarter yn it sikehûs, sa litte sifers yn oare lannen sjen. Yn Nederlân binne dêr noch net genôch gegevens oer. Van Dissel tinkt dat it yn trochsneed delkomt op fiif ferpleechdagen.

Martina Tolsma fan lunsjroom de Ferbining yn Feanwâlde is út de skroeven dat se wer iepen meie: "Fantastysk, wy binne superbliid".

Dit is de twadde kear dat se wer iepen meie nei in lockdown. Tolsma hâldt wol yn 'e achterholle, dat der yn de takomst wer ris in lockdown komme kin en hoe't se dan de klanten berikke moat. "Ik tink oan útwreiding fan de catering en dat goed bekend meitsje yn de omjouwing. Moatst sjen nei wat wol kin en wat by it bedriuw past."

Yn de kulturele sektor is blydskip oer de ferrommingen fan de coronamaatregels dy't premier Rutte en minister Kuipers tiisdeitejûn ôfkundige hawwe, mar it is noch altyd wrakseljen mei de oardelmeterregel.

Direkteur Titia Huisman fan teäter De Koornbeurs yn Frjentsjer is foarsichtich entûsjast. "Wij binne pas echt wer bliid as we gewoan fol en ûnbeheind iepen meie, dat is dúdlik, mar tsien oere is better as acht oere. Dat betsjut dat in oantal foarstellingen wat nei foaren skood wurde moatte, as dat kin, en dat sille we dan ek dwaan."

De karnavalsoptocht en it grutte feest fan de Oeletoeters yn Snits giet dit jier wer net troch. Se dogge ek gjin polonêze mei stokjes fan oardel meter dertusken.

"We hiene hope dat de oardel meter fuort wêze soe", seit Sander Balk fan de karnavalsferiening. Hy fertelt entûsjast wat se dan wol fan doel binne.

Foar teäterselskip Pier 21 gean de ferrommingen fan de coronaregels net fier genôch. It komt foar harren feitliks del op in ferlinging fan de lockdown. Omdat de sealkapasiteit beheind is ta ientredde fan it tal besikers en fanwege de ferplichte oardel meter ôfstân tusken besikers kin it suksesfolle stik Wat Soesto noch net spile wurde.

Hast alle foarstellingen binne útferkocht. Mar it is praktysk net útfierber om twatredde fan de besikers teloar te stellen. En trije kear safolle foarstellingen te spyljen is net helber.

By it Fries Museum yn Ljouwert binne se út de skroeven dat se wer iepen meie. Op twitter is in filmke te sjen fan twa meiwurkers dy't fanút de yngong fan it museum de reade loper útrôlje.

Bern fan 0 oant 18 jier hoege net mear yn karantêne as in húsgenoat of ien mei wa't se nau kontakt hân hawwe posityf test is op covid-19. As se sels posityf test binne, moatte se fansels wol yn thúskarantêne, op syn minst sân dagen. Ek by mylde klachten thús bliuwe en in test of in selstest dwaan bliuwt de regel.

Foar bern fan 0-4 jier dy't in húsgenoat hawwe dy't posityf test is op covid-19 en dy't (mylde) klachten hawwe, jildt it advys om te testen. Ek as se yn nau kontakt west hawwe mei ien dy't posityf test is. Alle regels binne nei te lêzen op de site fan de Ryksoerheid.

De twadde coronaparsekonferinsje fan it nije kabinet hat juster goed 5,5 miljoen sjoggers lutsen. Dat binne der 200.000 minder as de foarige parsekonferinsje fan premier Mark Rutte en coronaminister Ernst Kuipers. It wie wol it bêst besjoene programma fan justerjûn, meldt de Stichting Kijkonderzoek.

Klups út it betelle fuotbal oerlizze fan 'e moarn oer it beslút fan it kabinet om de stadions wer foar in tredde mei supporters te foljen. Ek fertsjintwurdigers fan de KNVB, Eredivisie CV (ECV) en Coöperatie Eerste Divisie (CED) skowe oan by de gearkomste.

Taskôgers moatte ferspraat troch it stadion sitte en 1,5 meter ôfstân hâlde. Ek moatte se yn it besit wêze fan in coronatagongsbewiis. Nei 22.00 oere binne gjin fans mear wolkom. Dat sil gefolgen hawwe foar duels dy't letter as 20.00 oere úteinsette.

De fuotbalstadions fan klups út de earedivyzje en Keuken Kampioen Divisie binne al sûnt begjin novimber leech, nei oprinnende coronasifers. De profklups rekkenen derop dat se minimaal twa tredde fan de kapasiteit fan harren stadions brûke mochten. Foar in soad profklups is it beslút fan it kabinet om de stadions mar foar in tredde mei taskôgers te foljen hurd oankaam. Se prate oer fiergeande konsekwinsjes foar klups, supporters en sponsors.

De Twadde Keamer debattearret fan 'e middei mei it kabinet oer it pakket oan ferrommingen.

It sil dan nei alle gedachten gean oer ûnder mear de maksimale kapasiteit foar bygelyks teäters en fuotbalstadions. Mooglik lôget ek de diskusje oer it coronatiidgongsbewiis wer op.

Minsken mei in essinsjeel berop binne net langer ferplichte om yn karantêne te gean nei kontakt mei in besmet persoan. Wol moatte sy earst goedkarring krije fan harren wurkjouwer om net yn karantêne te hoegen, skriuwt soarchminister Ernst Kuipers yn in brief oan de Twadde Keamer. De wurkjouwer bepaalt yn 'e mande mei de ûndernimmingsried of personielsfertsjintwurdiging hokker funksjes oft essinsjeel binne en bygelyks net fan hûs út kinne.

As besletten wurdt dat in wurknimmer net yn karantêne hoecht, moat dyjinge him wol alle dagen sels teste, fiif dagen nei it kontakt mei in besmet persoan in test by de GGD dwaan, in mûlkapke op hawwe en ôfstân hâlde. Wa't dochs klachten krijt, moat fuortendaliks nei hûs en dochs yn karantêne, skriuwt Kuipers. De wurknimmer en wurkjouwer binne der tegearre ferantwurdlik foar dat corona him net fierder ferspriedt op de wurkflier, skriuwt de minister.

Nei de oankundiging fan ferrommingen op de parsekonferinsje fan justerjûn, mei en kin hjoed wer fan alles. Kafees en restaurants meie wer gasten ûntfange, en ek teäters, musea, kasino's, bistetunen en pretparken meie de doarren wer iepenje.

Foar skoallen jildt dat allinnich learlingen dy't klachten hawwe of posityf teste, thús bliuwe moatte. De rest fan de klasse mei gewoan nei skoalle. Learlingen wurdt wol advisearre twa kear yn 'e wike in thústest te dwaan.

Op in soad plakken jilde betingsten foar weriepening. Sa is in coronatagongsbewiis (QR-koade) ferplichte foar elkenien fan 13 jier ôf yn de hoareka, teäters en konsertsealen, musea, binnensportlokaasjes, bioskopen, bistetunen, pretparken, sauna's en kasino's. Ek moatte minsken in mûlkapke op hawwe yn it iepenbier ferfier en yn publike binnenromten lykas winkels en musea. Foar bioskopen, teäters en hoareka jildt dat besikers harren mûlkapke ôfdwaan kinne as se sitte.

Premier Mark Rutte en soarchminister Ernst Kuipers kundigen de ferrommingen justerjûn oan. Se gean derfan út dat it tal besmettingen de kommende tiid bot tanimme sil, sadwaande dat 1,5 meter ôfstân hâlde, hanwaskje, fentilearje en teste by klachten noch hieltyd wichtige basisregels binne.

Wolkom by it liveblog fan woansdei 26 jannewaris oer de ûntwikkelingen oangeande it coronafirus yn Fryslân. Us liveblog fan tiisdei neilêze kin hjir.