Coronanijs fan 15 jannewaris: Drokte yn winkels | Dokkumer hoareka feroaret yn bordeel

Troch de coronakrisis geane mear minsken te fiskjen. Dy positive ûntwikkeling sjogge se ek by fiskferiening HSV De Baars yn Snits. De feriening krige der yn twa jier 250 nije leden by: foar de coronakrisis wiene der noch 1500 oant 1600 leden, no binne it der mar leafst 1850.

Neffens de foarsitter fan de feriening nimt it tal leden ta om't minsken neat mear kinne en neat mear meie. "Fakânsje nei it bûtenlân sit der net yn, dus dan hâlde jo fakânsje yn Nederlân", seit foarsitter Adri Boersma. "Oeral ha jo de mooglikheid om te fiskjen, mar do moatst wol lid wêze fan in klup en in fergunning ha."

De feriening krige troch it tal leden safolle jild binnen, dat se mei de krystdagen in kadootsje kochten foar alle soarchmeiwurkers fan Snits en omkriten. "We seine: as ien it fertsjinnet, binne de meiwurkers yn de soarch it wol."

Foar it earst sûnt oktober lizze der minder as 900 coronapasjinten op de ferpleechôfdielingen fan de Nederlânske sikehûzen. Sneon giet it om 898 coronapasjinten, sa meldt it Landelijk Coördinatiecentrum Patiënten Spreiding (LCPS). Dat is in delgong fan 56 pasjinten yn ferliking mei in dei lyn.

Op de ic's lizze no noch 321 coronapasjinten. Freed wiene dat der 334. Yn totaal lizze 1219 minsken mei Covid-19 yn de Nederlânske sikehûzen; 69 minder as freed.

Mei de weriepening fan net-essinsjele winkels is it wer drok yn de winkelstrjitten fan It Hearrenfean.

Hoewol't tal fan Fryske hoarekasaken sneon iepenje as protest, liket it der op dat der gjin strange hanthavening is. "Wy hâlde tafersjoch, mar proporsjoneel. Wy sinjalearje en as it nedich is geane wy it petear oan. Men seit ek dat it net in grutte rebelly is", seit boargemaster Marga Waanders fan Waadhoeke.

Kommissaris fan de Kening Arno Brok gie sneon foar it earst wer nei de kapper yn Frjentsjer. Hy wie net de iennichste: yn it hiele lân is it drok by de kappers no't se wer iepen meie.

In protte kappers krigen al drekst nei de earste lûden oer ferrommingen mear reservearringen en sitte it hiele wykein fol.

Tal fan hoarekasaken yn Fryslân dogge sneon mei oan in lanlike protestaksje tsjin de coronamaatregels fan it kabinet. It giet net allinne om kafees en restaurants yn de grutte plakken, ek ûndernimmers yn lytse plakken dogge mei.

Sa iepenet ytkafee De Famkes yn Eastrum de doarren om 16.00 oere. "Dit beleid is niet meer uit te leggen", skriuwt de saak op sosjale media. De eigeners hjitte besikers fan herte wolkom, mar freegje har wol om har oan de basismaatregels foar de feiligens te hâlden.

Yn ûnder mear Aldebiltsyl, Ljouwert, Kollumersweach, Marsum, Drachten en Starum geane hoarekasaken iepen.

Boargemaster Sander de Rouwe fan Kampen, dy't oant koartlyn noch deputearre fan Fryslân wie, stipet yn syn gemeente hoarekaprotesten. De Rouwe jout oan dat hy de aksjes wêrby't kafees en restaurants de doarren iepenje stipet, as se mar wol rekken hâlde mei de basismaatregels.

Kommissaris fan de Kening Arno Brok fynt dat it lykwicht tusken coronamaatregels fuort is. "Der is is sa stadichoan in disbalâns. Wy libje yn in ryk lân en hawwe it goed. Mar dit is al hast twa jier", sei Brok freed yn It Polytburo by Omrop Fryslân. De kommissaris wol benammen mear romte foar hoareka en kultuer.

"It is net allinne it belang fan de sûnenssoarch, mar ek dat fan it ûnderwiis, de ekonomy, de kultuer. It is net mear yn balâns, noch los fan wat it psychysk docht mei minsken", seit Brok. De kommissaris kin him dan ek fine yn it statement dat de noardlike boargemasters woansdei mei-inoar nei bûten brochten, dat ek al pleite foar mear lykwicht tusken coronamaatregels.

Direkteur Kris Callens fan it Fries Museum is poerrazend op it kabinet, dat foar de safolste kear musea net iepenje lit. "De nationale overheid heeft nog nóóit een goed argument gehad om culturele organisaties te sluiten."

"De overheid moet niet motiveren waarom dingen open gaan, maar waarom dingen gesloten blijven", seit Callens. It museum seit in oerheid te akseptearjen dy't maatregels treft en slutingen ôfkundiget, mar it moat dan wol mei in goede ûnderbouwing.

Foarsitter Sybrand Buma fan Veiligheidsregio Fryslân hat oanjûn dat de Fryske boargemasters yn de gaten hâlde oft der protest út de hoarekasektor komt. "Ik haw yn Ljouwert mei de wethâlder in petear hân mei de hoareka. It byld is dat der hjir gjin grutte protestaksjes binne lykas yn it suden. As dat wol sa is, wolle wy earst yn petear."

Buma wol dat ûndernimmers harren oan de regels hâlde. "Ik hoop dat ûndernimmers begripe dat it net in kwestje fan dulde is, mar dat is net wiis is om no iepen te gean."

Nettsjinsteande dizze oprop hat in tal hoarekasaken yn gemeente Waadhoeke oanjûn sneon de doarren wol te iepenjen. De ûndernimmers binne it net iens mei it trochsetten fan de lockdown foar harren. Boargemaster Marga Waanders hat al in warskôging jûn.

Fan sneon ôf jilde der wer nije coronaregels. Wy hawwe de nije maatregels hjirûnder op in rychje set:

Wolkom by it liveblog fan sneon 15 jannewaris oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.