"Wa't fynt dat Hearrenfean ûnfertsjinne wûn hat, hat der gjin ferstân fan"

Ien dei nei de Fryske derby sjogge we werom op de wedstriid mei de beide kommentatoaren fan Omrop Fryslân.

Roelof: "Ja, 100 prosint. Fansels, Hearrenfean hie it foardiel fan in man mear. Mar ek oant de reade kaart fûn ik Hearrenfean al wat better. Se ha wol wat te folle kânsen fuort jûn, mar dat nimt net wei dat Hearrenfean folle mear balbesit hie, mear kânsen hân hat en dêrmei terjochte wûn. En as je fine dat Hearrenfean net fertsjinne wûn hat, dan ha je gjin ferstân fan fuotbal."

Andor: "Ja, Hearrenfean hat de bêste kânsen hân, de peal en de latte rekke. Dat is logysk, want se spilen mei in man mear. Mar op basis dêrfan is Hearrenfean wol de terjochte winner."

Andor: "Ik fûn it gjin read. Doke Schmidt is te let en hy komt hurd yn. Dat binne wierheden as in ko. Mar ik fûn de oertrêding net swier genôch foar read. Lit my dúdlik wêze: it is heus in giele kaart. Schmidt woe de toan sette, sjen litte: dit binne we. Mar hy die dat te hurd."

Roelof: "It is in twivelgefal. As er read jout, kin ik my it foarstelle. En giel hie ik my ek foarstelle kind. Ik fyn it net sa swart-wyt. Je kinne giel jaan, read ek. Mar hy kaam hiel lomp yn. Hy moat de skiedsrjochter net de mooglikheid jaan om read te jaan. It is dom fan Doke."

Roelof: "Se ha de measte kânsen kreëarre. En ik ergerje my wat oan de krityk dy't Hearrenfean wol krijt. Ja, it is net fantastysk wat Hearrenfean dit seizoen sjen lit, mar sa min is it no ek wer net. It is al better as ferline seizoen. It stiet achteryn goed, it middenfjild ûntwikkelet him. Foaryn kin it noch wat better, mar ik snap de yrritaasje by Jansen wol wat."

Andor: "Dat fan dy kânsen is dochs wat it probleem fan Hearrenfean dit seizoen. Dat gong no better. En se wienen lekker fanatyk, dat seachst by de opstootsjes: Doke Schmidt makket in oertrêding en hup, Joey Veerman derhinne. Yn de twadde helte wie der in oertrêding foar de dug-outs en de bank siet der gelyk boppe-op. Yn myn eagen is dat in komplimint foar Johnny Jansen. Hy hat it fjurke oanwakkere."

Andor: "Ik fyn dat Cambuur neffens de mooglikheden fuotballe hat. Se ha der in wedstriid fan makke en dat is knap, fanwegen de betide efterstân en de reade kaart. Se ha har weromknokt yn de wedstriid mei de 1-1 ta gefolch. Se ha sels kânsen kreëarre yn de twadde helte. Eins in hiel soad goed dien dus."

"Wat je de ploech ferwite kinne, is dat de 1-2 te maklik fuortjûn wurdt. Hoedemakers en Gullit kommunisearje net goed en dêrtroch stiet Henk Veerman frij. Earlik is earlik: hy kopt 'm knap binnen. Mar Cambuur hat it nei de mooglikheden prima dien."

Roelof: "Dat is ek sa. Cambuur hat it net min dien, mar ek net goed. En it is wat in ko yn 'e kont sjen, mar ik bin superbenijd hoe't it mei alve tsjin alve gien wie."

Andor: "It wie myn earste derby. It wie bysûnder en ik hie dochs wol wat it derbygefoel, nettsjinsteande it feit dat der gjin fans by wienen. Mar it mei dúdlik wêze: it hie noch folle moaier west mei 10.000 minsken derby. Litte we foaral hoopje dat dat yn it Abe Lenstra stadion letter dit seizoen wol kin."

Roelof: "Ik sil dizze derby ek net gau ferjitte, ek omdat it sa apart is sûnder publyk. En by Hearrenfean stie hjir in hartstikke soad druk op. Cambuur libbe de lêste jierren wat mear yn it skaad fan Hearrenfean, mar stiet op de ranglist no heger en is Hearrenfean ek finansjeel nadere. Dus de druk naam ta foar Hearrenfean. Dêrom wienen de emoasjes nei de winst ek sa grut."