Coronanijs 29 novimber: Lanlik 21.552 besmettingen | KNVB skrast part kompetysjes

In lytse fjouwerhûndert militêren wurde dizze wike oplaat om GGD'en te helpen by it útfieren fan testen op it coronafirus. Sy kinne nei it folgjen fan in training dy't in dei duorret fuort oan de slach by de GGD. Dy opliedingsdagen foar hieltyd sa'n hûndert meiwurkers fan Definsje binne woansdei, tongersdei, freed en nije wike moandei, seit in wurdfierder fan de Koninklijke Landmacht.

In grut part fan de militêren kin nei de kommende wike plande opliedingsdei gelyk troch nei in GGD-lokaasje om noch fierder ynwurke te wurden. Nei't sy ûnder begelieding fan in GGD-meiwurker sa'n fyftich coronatesten ôfnaam hawwe, kinne se selsstannich oan de slach. De opdracht foar de ynset fan de hast fjouwerhûndert militêren is foar trije wiken. "Gaandeweg kijken we of dit verlengd, eerder gestopt of met extra taken aangevuld moet worden", seit de lânmachtwurdfierder.

It tal coronapasjinten yn de sikehuzen nimt noch ta. Neffens Ernst Kuipers (Landelijk Netwerk Acute Zorg) is it ferstannich om der rekken mei te hâlden dat de pyk noch net berikt is. As de taname trochset "gaan we in de komende week uitkomen boven het hoogste niveau van de vorige winter. Dan gaan we overall richting de 3000 patiënten", tinkt Kuipers.

Yn de Nederlânske sikehuzen lizze no 2.772 minsken.

By restaurant en partysintrum De Pleats yn Burgum ha se alle reservearringen foar de kommende krystdagen ôfsein. It restaurant giet 24 desimber om 17.00 oere ticht. De saak wie folboekt, mar eigener Eelke Duursma fynt it mei de oprinnende coronasifers net ferantwurde om syn saak mei de feestdagen iepen te hâlden.

Mear as de helte fan de neisten (54 persint) fan soarchmeiwurkers hawwe noed oer harren. Minsken dy't tichteby de meiwurkers steane, lykas famylje, freonen en kollega's, hawwe soargen oer de lichaamlike en mentale sûnens fan de meiwurkers.

De minsken jouwe oan dat de soarchmeiwurkers sûnt de coronatiid thús mear lêst hawwe fan it wurk, en minder tiid nimme foar ûntspanning.

Yn Fryslân binne yn de ôfrûne 24 oeren 1.108 nije coronabesmettingen fêststeld, dat meldt it RIVM. It is foar it earst dat der mear as tûzen besmettingen op ien dei fêststeld binne yn Fryslân. It tal is wol fertekene troch in steuring snein. Lanlik binne der 21.552 besmettingen fêststeld.

Der binne yn de ôfrûne 24 oeren yn Fryslân gjin stjergefallen fêststeld as gefolch fan it coronafirus.

De Dantumadiel Cup giet dit jier op 'e nij net troch. De kommisje hat sa lang mooglik wachte mei it nimmen fan dit beslút, yn de hoop dat de situaasje better wurde soe. Om't dat net bard is, fynt de kommisje Dantumadiel Cup dat it sealfuotbaltoernoai yn de hjoeddeiske coronasituaasje net spile wurde kin.

It tal coronapasjinten dat yn de Nederlânske sikehûzen leit is moandei mei 130 tanommen. It is de grutste groei sûnt 4 jannewaris fan dit jier. Dat docht bliken út sifers fan it Landelijk Coördinatiecentrum Patiënten Spreiding (LCPS).

Der lizze no 2772 coronapasjinten yn it sikehûs. Op de ic's lizze op it stuit 563 minsken mei corona. Dat binne der tolve mear as juster.

"We roppe op om de sport safolle mooglik iepen te hâlden", seit Anne Jochum de Vries, direkteur fan Sport Fryslân. "Dêr treffe we elkoar, prate we by, binne we yn beweging. Dat is sa belangryk. We moatte der alles foar oerha om dat oerein te hâlden."

Yn in soad winkels en online binne in soad coronaselstesten útferkocht. Dat meldt koepelorganisatie Centraal Bureau Drogisterijbedrijven (CBD). "De pijplijn is goed gevuld. Deze week worden de winkelvoorraden weer aangevuld", seit in wurdfierder.

It is de earste dei dat de nije coronamaatregels, dy't freed oankundige waarden, tapast wurde yn skoallen. It demisjonêre kabinet besleat ferline wike dat de skoallen iepenbliuwe meie, mar wol ûnder guon betingsten.

Learlingen yn groep 6 en heger moatte no mûlkapkes drage as se bewege, bygelyks as se oer de gong rinne. Boppedat moatte skoalbern ûnder de 12 jier ek thúsbliuwe by mylde klachten. Earder hoegde dat allinnich as se hoasten of koarts hienen.

Skoallen wurdt dêrnjonken advisearre om rinrûtes oan te lizzen yn de gebouwen en net elkenien tagelyk skoft te jaan. As it mooglik is, moatte skoallen de klassen ek yndiele yn lytsere groepen, dy't ûnderling gjin kontakt mei-elkoar ha.

It is ek de bedoeling dat learlingen yn groep 6 en heger twa kear yn de wike in selstest dogge. Skoallen krije dy selstests fan de oerheid, om út te dielen ûnder de learlingen.

It persintaazje stjergefallen yn ferpleechhûzen is wer itselde as foarich jier yn novimber, yn de twadde coronaweach. Dat meldt it NOS. Der wienen doe noch gjin minsken faksinearre.

Fan de faksinearre bewenners yn ferpleechhûzen kamen de ôfrûne moannen 22 persint te ferstjerren nei in coronabesmetting. Dat der op it stuit wer likefolle bewenners fan de ferpleechhûzen in coronabesmetting net oerlibje as in jier lyn, hat der mei te krijen dat de effektiviteit fan de faksins ôfnimt, benammen by âlderein.

In oar ferskil mei ferline jier, is dat dit jier de Delta-fariant rûngiet. "Die is mogelijk agressiever", seit Cees Hertogh, heechlearaar âlderegenêskunde.

De Hynstekeuring fan it Koninklijk Friesch Paarden Stamboek fan 2022 sil online plakfine. Dat is freed op de ledegearkomste besletten om't troch de oanskerpe coronamaatregels it mar de fraach is oft der publyk by wêze mei.

Ferline jier siet fanwegen it coronafirus ek al gjin publyk op de tribune. Doe folgen tûzenen minsken online alle ferrjochtingen.

De spoedklinyk fan de Sionsberg yn Dokkum springt de kommende tiid by om de oare Fryske sikehûzen te ûntlêstjen. De sikehûzen hawwe it op dit stuit drok mei ûnder oare coronapasjinten. Dêrtroch kinne de wachttiden somtiden bot oprinne.

Pasjinten dy't te krijen hawwe mei minder komplekse klachten, kinne tenei ek yn Dokkum telâne. It giet dan om minsken mei in brutsen earm, hertkloppingen of pine-búk.

Yn Fryslân lizze 88 pasjinten yn de sikehûzen, dêr't sechstjin fan op de intensive care lizze. Freed leinen 77 pasjinten yn de Fryske sikehûzen, dêr't sechstjin fan op ic leine.

Yn de trije noardlike provinsjes Grinslân, Drinte en Fryslân lizze byinoar 204 coronapasjinten yn it sikehûs, meldt Acute Zorgnetwerk Noord Nederland. Fan dy pasjinten lizze der 44 op in ic-bêd.

Unberne babys rinne yn seldsume gefallen gefaar, as de mem corona krijt. Dat docht bliken út in ûndersyk nei plasinta's fan froulju dy't corona hân ha. Dat meldt de Volkskrant, dy't praat hat mei gynekolooch Sam Schoenmakers fan it Erasmus MC yn Rotterdam. Schoenmakers die tegearre mei kollega's ûndersyk nei deaberten dêr't noch gjin ferklearring foar wie.

It wie snein rêstich yn de binnenstêd fan Ljouwert. Hoarekasaken en net-essinsjele winkels moasten fan snein ôf earder slute. Dat betsjut foar hoarekasaken dat der gjin gasten komme meie foar it jûnsiten.

"Eigenlijk moeten we nu bezig met het diner, maar we gaan nu schoonmaken, wat we normaal om een uur of negen, half tien doen", fertelde in sjef fan in Ljouwerter hoarekasaak snein.

Wolkom by dit liveblog fan moandei 29 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.