Coronanijs fan 28 novimber: 13 besmettingen mei omikron-fariant yn Nederlân

De Vereniging Nederlands Cabinepersoneel (VNC) wol dat der ûndersocht wurdt hoe't fleantúchpassazjiers harren better teste litte kinne. "Het kan niet de bedoeling zijn dat we mensen die met het virus zijn besmet vervoeren", seit Chris van Elswijk fan de bûn. Dêrmei doelt hy derop dat de 61 besmette passazjiers op in flecht út Súd-Afrika wei sieten.

Neffens de VNC moatte der sa min mooglik 'kontaktmominten' yn it fleantúch wêze. Dit betsjut dat bygelyks catering oan board beheind wurde moat.

"We maken ons zorgen, want deze variant zou besmettelijker zijn. Maar we weten nog onvoldoende of deze variant ziekmakender is", seit De Jonge. Nije maatregels binne neffens him net út te sluten. De Jonge wol advys oer mooglike beheining fan de reisbewegings. Dit wol hy dan wol Europeesk regelje.

Demisjonêr minister fan Folkssûnens Hugo de Jonge seit sneintemiddei op in parsekonferinsje dat 13 fan de 61 minsken dy't weromkommen binne mei in KLM-flecht út Súd-Afrika wei besmet binne mei de omikron-fariant fan it coronafirus.

Minsken dy't út Súd-Afrika wei yn Nederlân komme, kinne harren yn in spesjale teststrjitte op Schiphol teste litte op it coronafirus. Dizze maatregel is nommen yn ferbân mei de nije omikron-fariant fan it firus.

Boppedat moatte minsken dy't sûnt 21 novimber weromkommen binne út Súd-Afrika, Lesoto, Eswatini, Namibië, Mozambyk, Simbabwe en Malawy yn karantêne, ek as se gjin klachten hawwe.

Yn in reaksje op de útbraak fan de omikron-fariant fan it coronafirus, seit epidemiolooch Amrish Baidjoe dat reizgers dy't nei Nederlân ta komme altyd in PCR-test dwaan moatte soenen. Dat seit hy tsjin de NOS. Neffens him binne de antygenetests minder gefoelich: "Soms heb je zo weinig virusdeeltjes in de neusholte zitten, dat een sneltest het mist. Een PCR had het virus dan opgepikt."

Hjirtroch is it mooglik dat minsken negatyf teste, mar dochs besmet binne mei it coronafirus.

Demisjonêr minister fan Folkssûnens Hugo de Jonge sil snein om 13.15 oere in taljochting jaan oer de situaasje mei de omikron-fariant fan it coronafirus. Nei alle gedachten sil it RIVM ek bekendmeitsje oft de reizgers út Súd-Afrika wei besmet binne mei de omikron-fariant.

De nije maatregels tsjin it coronafirus binne sûnt middernacht fan krêft. Dit betsjut bygelyks dat hast alle lokaasjes en eveneminten om 17.00 oere slute moatte.

In oersjoch fan de meast wichtige maatregels kinst hjir fine:

De omikron-fariant fan it coronafirus is opdûkt yn meardere lannen. Sneintemoarn kamen der berjochten út Australië. Twa reizgers dêr hawwe de sykte ûnder de lea. Oer Katar binne sy út Súd-Afrika wei it lân yn kaam.

De yn Súd-Afrika ûntdutsen fariant is mooglik besmetliker as de eardere farianten. Der is noch net in soad oer bekend. Omikron is ûnderwilens yn meardere lannen fêststeld, ûnder oare yn België, Dútslân, Italië, Tsjechië en Israel. Yn Nederlân is it nei alle gedachten ek.

Wolkom by dit liveblog fan snein 28 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.