Coronanijs fan 27 novimber: Omikron-fariant nei alle gedachten yn Nederlân

Yn Fryslân binne yn de ôfrûne 24 oeren 926 nije coronabesmettingen registrearre. Dat meldt it RIVM. It binne der 41 mear as freed. Doe waarden 885 besmettingen meld.

Lanlik leit it tal nije coronabesmettingen op 22.089. It trochsneed tal besmettingen fan de ôfrûne sân dagen is 22.294.

Wannear't demisjonêr premier Mark Rutte gjin premier west hie, hie hy him hurder útsprutsen oer net-faksinearden. Dat sei Rutte sneon op in kongres fan syn partij, de VVD. "Ik denk dat ik dan verder was gegaan. Maar het punt is, dat kan ik zelfs hier niet zeggen. Je moet ervoor zorgen dat je mensen blijft meenemen en dat ze niet gaan denken: waarom zou ik me nog laten vaccineren."

Demisjonêr minister Hugo de Jonge giet soms wol fierder yn syn útspraken oer net-faksinearden. Rutte seit dêroer: "Die is misschien iets minder in staat om zich in te houden. Maar we denken er hetzelfde over."

De nije coronaregels soargje foar opskoar by amateurfuotballers. Nei 5 oere jûns moat elke klup op slot. Dat betsjut dat sy net mear trainen kinne. Wol meie sy op sneontemiddei in wedstriid spylje. Dat is in brike maatregel, sa fynt it amateurfuotbal. Ferslachjouwer Willem Vermeltfoort gong nei VV Dolsterhuzen en seach dat er foarearst noch fuotballe wurdt.

Gjin lockdown foar de maratonriders yn de topdifyzje. Sy kinne de kommende wiken gewoan harren wedstriden ride. It giet dan om reedriders lykas Jorrit Bergsma en Marijke Groenewoud. Alle amateursport leit fan snein ôf tusken 17:00 oere middeis en 5:00 oere moarns stil, mar de heechste divyzje fan it maratonriden falt no ûnder topsport, meldt it ANP.

It liket derop dat de omikron-coronafariant ek Dútslân berikt hat. Dat hat de regionale minister fan de dielsteat Hessen bekend makke. Yn dat Bundesland leit de drokke lofthaven fan Frankfurt.

De regiominister lit witte dat by it testen fan in reizger 'meardere mutaasjes' oantroffen binne dy't yn ferbân brocht wurde mei de nije fariant fan it coronafirus, sa melde Dútske media.

Yn ferbân mei de ferplichte coronasluting fan 17:00 oere middeis oant 5 oere de oare moarns wol bioskoopketen Pathé mear films op de oerbleaune oaren fertoane. Dat giet snein yn. Pathé hat krekt in nije bioskoop iepene yn Ljouwert.

De bioskoopsektor neamt it in grutte klap dat se om 17:00 oere ticht moatte, en ek dat der njonken de coronatagongsapp no ek oardel meter ôfstân hâlden wurde moat. Yn de hiele coronaperioade binne gjin besmettingen fêststeld dy't werom te lieden binne nei bioskopen of filmteäters, seit in wurdfierder.

De anty-Covid-pil fan farmabedriuw MSD blykt minder goed te wurkjen as earder tocht. Ut de nijste ûndersiken is dúdlik wurden dat it medisyn yn ien op de trije gefallen beskerming jout tsjin stjerren of opname yn it sikehûs. Earder like dat by ien op de twa sa te wêzen.

It farmasybedriuw hat dizze wike tastimming frege oan it Europeeske Genêsmiddelsburo EMA om de pil op de merk bringe te meien. It EMA moat de oanfraach noch beoardiele. As dy der komt meie Europeeske lannen de coronapil foarskriuwe.

Yn de twa fleantugen dy't freed út Súd-Afrika kaam binne, binne 61 fan 600 passazjiers besmet mei corona. It is net bekend oft dêr ek besmettingen mei it nije omikron-firus by sitte. Nederlanners kinne noch wol nei súdlik Afrika fleane. Se meie dêrnei ek werom nei Nederlân. Dan moatte se wol yn karantêne.

Reizgers dy't sûnt moandei yn Nederlân oankaam binne út súdlik Afrika wei wurde troch de GGD oproppen harren sagau mooglik teste te litten.

De parsekonferinsje fan freedtejûn is goed besjoen. Goed 5,7 miljoen minsken sieten foar de telefyzje. De útstjoering is dêrmei krekt wat better besjoen as dy fan 13 novimber. Doe luts de parsekonferinsje sawat 5,4 miljoen sjoggers.

Wolkom by dit liveblog fan sneon 27 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.