'Mear geweld tsjin froulju troch thúswurk, taboe moat trochbrutsen wurde'

Fyftjin fan de achttjin Fryske gemeenten dogge mei oan Orange the World. Ien fan de Fryske dielnimmende gemeenten is Hearrenfean. Sy hise de flagge op it gemeentehûs en iisstadion Thialf en fuotbalstadion Abe Lenstra wurde yn oranje ljocht set.

Geweld tsjin froulju moat de wrâld út, want ek yn Nederlân bart it noch tefolle. Marga Kuipers, riedslid fan de VVD, set har al jierren yn om Orange the World nei de gemeente Hearrenfean te krijen. Sy wol it taboe trochbrekke.

"Dat sit der seker noch op. Ik fernaam dat al doe't ik der omtinken foar frege. Minsken tochten dat it dochs net spilet op It Fean. Mar spitigernôch spilet it hjir ek. It bart efter de foardoar. Minsken prate der net gau oer. Dêrtroch hinget der in soad stilte omhinne. As we dy stilte trochbrekke, is it mooglik om minsken te helpen."

De gemeente Hearrenfean set ûnder oare yn op previnsje. "Foarkomme is better as genêze," seit wethâlder Jelle Zoetendal. Mar leafst 45 prosint fan de froulju komt yn oanrekking mei geweld, sa seit Zoetendal. Dat binne alle farianten. "It giet dan om echt geweld, lykas slaan en dat soarte fan dingen. Mar geweld sit ek yn lytse dingen. Dan is it psychologysk of ekonomysk. Dat binne allegearre punten dêr't wy omtinken oan jaan moatte. Skoallen en buerthuzen kinne foarljochting jaan."

Ien fan de plakken dêr't minsken terjochte kinne, is it Centrum Seksueel Geweld Friesland. Gerda de Groot fan it sintrum fernimt dat it slimmer wurden is: "Als je thuis werkt, zit je vaker op elkaars lip. Dat zorgt voor spanningen. We zien dat in de chats op onze site terug. Kinderen melden dat hun ouders weer ruzie hebben en dat ze geen kant op kunnen. Er speelt van alles. Daarom is het zo belangrijk om Orange the World te hebben. We moeten het taboe doorbreken, zodat het mogelijk wordt dat mensen zich kunnen uitspreken. Juist in deze tijd."