Coronanijs 23 novimber: 1,5 meter ôfstân wer ferplichte | 971 besmettingen

Om de stiging fan it tal besmettingen werom te bringen hat it kabinet oankundige dat 1,5 meter ôfstân fan moarn ôf wer ferplichte wurdt. Dat betsjut dat plysje en hanthaveners hjirop hanthavenje kinne. Earder wie it hâlden fan oardel meter ôfstân in driuwend advys.

De ferplichting jildt net foar minsken út ien húshâlden, op plakken dêr't in coronatagongsbewiis frege wurdt en op plakken dêr't it hâlden fan oardel meter net mooglik is.

De measte besmettingen binne de ôfrûne wike fêststeld by jonge bern en harren âlden. It giet om de leeftiidsgroepen fan 5- oant en mei 14-jierrigen en 35- oant en mei 44-jierrigen, befêstiget it RIVM. Skoallen soene in hieltyd gruttere rol spylje yn it trochjaan fan coronabesmettingen.

It mienskiplikheidsgefoel dat er yn it begjin fan de coronakrisis wie, is der net mear sa bot. Dat seit gedrachswittenskipper Ellis ten Have fan Innzorg. It kabinet die tiisdei nochris de oprop oan minsken om har oan de coronamaatregels te hâlden, oars driigje nije maatregels.

Sy heart binnen bygelyks it OMT nijsberjochten dy't inoar tsjinsprekke. Boppedat hawwe minsken har eigen miening, har eigen omjouwing en har eigen netwurk. Ten Have seit dat dat it dreech makket om ús gedrach rjochting te jaan.

By in gearkomste fan de Keamerkommisje Folkssûnens fûn in mearderheid dat de wet dy't nedich is foar de 2G-maatregels te yngewikkeld is en mear tiid freget. It ûnderwerp sil dêrom net earder as nije wike yn de Twadde Keamer bepraat wurde.

It saneamde 2G-belied soe ûnder oare ynset wurde kinne yn de hoareka en by eveneminten. '2G' stiet foar gevaccineerd of genezen. It betsjut dat in negative test net mear folstiet as tagongsbewiis.

Yn Fryslân binne yn de ôfrûne 24 oeren 971 nije coronabesmettingen fêststeld, dat meldt it RIVM. Lanlik binne der 23.039 besmettingen fêststeld.

Der is yn de ôfrûne 24 oeren yn Fryslân ien stjergefal fêststeld as gefolch fan it coronafirus. It giet om in ynwenner fan Tytsjerksteradiel.

Yn de ôfrûne 24 oeren waarden der 349 nije coronapasjinten binnenbrocht op ferpleechôfdielingen fan Nederlânske sikehuzen, it heechste tal sûnt 29 desimber fan ferline jier. Op de intensive cares waarden 51 pasjinten mei Covid-19 opnaam, docht bliken út sifers fan it Landelijk Coördinatiecentrum Patiënten Spreiding (LCPS).

Yn totaal lizze der yn de sikehuzen no 2.540 pasjinten mei Covid-19. Dat is it heechste tal sûnt 6 maaie fan dit jier. Yn fergeliking mei in jier lyn lizze der no 572 coronapasjinten mear yn de sikehuzen.

Op sân fan de fyftjin wensoarchlokaasjes fan Noorderbreedte binne nije coronabesmettingen fêststeld.

Yn totaal binne der op it stuit 29 bewenners besmet mei it coronafirus en binnen hiel Noorderbreedte binne likernôch sechstich meiwurkers besmet.

"Ondanks alle maatregelen en de vaccinaties zien we dat de besmettingen toenemen. En dat is verontrustend. Want wij zorgen voor ouderen met een kwetsbare gezondheid. Daarnaast kost de zorg voor besmette bewoners meer menskracht en juist nu zitten een heel aantal medewerkers in thuisisolatie vanwege een besmetting. En die aantallen lijken ook op te lopen", seit Inge Zijlstra, foarsitter fan de Hygiëne- en ynfeksjeprevinsjekommisje fan Noorderbreedte.

In groeiend tal Nederlânske sikehuzen slagget der net mear yn om alle soarch te leverjen dy't binnen seis wiken needsaaklik is om sûnensskea by pasjinten foar te kommen. Yntusken slagget it fjirtjin sikehuzen net mear om de saneamde "kritieke planbare zorg" altyd op tiid te ferlienen, docht bliken út in oersjoch fan de Nederlandse Zorgautoriteit (NZa). Ofrûne tongersdei gie it noch om tolve sikehuzen.

It fluch tanimmende tal coronapasjinten yn de sikehuzen leit hieltyd mear druk op intensive cares en ferpleechôfdielingen. De situaasje jildt yntusken as "ernstig". Dat is it middelste fan fiif ferskate nivo's wêrmei't de NZa de druk op de soarch beskriuwt. As de situaasje fierder efterút giet, soene nei "ernstig" noch "kritiek" en "onbeheersbaar" folgje kinne.

Hege skoallen en universiteiten sjogge neat yn de plannen fan it kabinet om mooglik coronatagongsbewizen yn te setten yn it heger ûnderwiis. It kabinet wol dy opsje ha, foar as de coronasituaasje noch slimmer wurdt.

De skoallen sizze dat it 'praktysk ûnútfierber' is om coronabewizen te kontrolearjen. Boppedat soe de wurkdruk fan de dosinten no al heech wêze. "We kunnen niet hetzelfde onderwijs gelijktijdig zowel fysiek als digitaal aanbieden", seit Maurice Limmen, foarsitter fan de hegeskoallekoepel.

De sportklup fan it Hearrenfean hat yn it seizoen 2020/2021 2,9 miljoen euro winst makke. Dat it 'coronajier' ôfsletten is mei in winst, komt benammen troch de opbringsten fan de ferkeap fan spilers. Sa waard de Nigeriaanske oanfaller Chidera Ejuke foar 12 miljoen euro ferkocht oan CSKA Moskou. Boppedat hat Hearrenfean oandielen yn de transfers fan Sven Botman en Sam Lammers.

De klup hat ek stipe krigen fan de oerheid. Yn totaal giet dat om in bedrach fan 3,5 miljoen. Dêrfan is mei 2,4 miljoen it grutste part de stipe fan de NOW-regeling.

Fersoargingstehûs De Batting yn Harns hat de doarren tydlik sletten foar besite. Yn it tehûs binne op ferskate ôfdielingen besmettingen by meiwurkers en bewenners fêststeld. It is it earste fersoargingstehûs yn Fryslân dat fanwegen it coronafirus wer op slot gien is.

Troch de besmettingen ûnder de meiwurkers wie der ek noed oer it útfallen fan personiel, seit Michiel Hoek, manager fan Noorderbreedte. "Dus is gezegd: we moeten gewoon even een paar dagen dicht."

Yn Fryslân lizze 78 pasjinten yn de sikehûzen, dêr't fyftjin fan op de intensive care lizze. Moandei leinen 76 pasjinten yn de Fryske sikehûzen, dêr't sechstjin fan op ic leine.

Yn de trije noardlike provinsjes Grinslân, Drinte en Fryslân lizze byinoar 182 coronapasjinten yn it sikehûs, meldt Acute Zorgnetwerk Noord Nederland. Fan dy pasjinten lizze der 39 op in ic-bêd.

De Merenloop dy't takom jier maart fan út Grou hâlden wurde soe giet net troch. De organisaasje fynt it ferrin fan it coronafirus te ûnwis. By de Merenloop kinne ferskillende ôfstannen rûn en hurdrûn wurde. Ferline jier koe it evenemint ek al net hâlden wurde. De organisaasje besjocht noch wol of der mooglik letter takom jier noch wol in Merenloop organisearre wurde kin.

Der wurdt minder pind sûnt der strangere coronamaatregels fan krêft binne yn Nederlân, meldt ING op basis fan transaksjedata. Neffens de bank jouwe konsuminten sûnt 13 novimber harren jild faker online út.

ING sjocht de grutste delgong fan de pinomset by restauranten en kafees, de kultuersektor en by sport en spulaktiviteiten. Yn de kultuersektor is de wearde fan de transaksjes sels sechstich persint leger as it nivo fan foar de coronakrisis.

Neffens ING is der ek in delgong fan de pinomset yn it iepenbier ferfier en by tankstasjons en parkeargelegenheden. Dêrneist fernimme persoanlik tsjinstferlieners as kappers dat der oan de kassa minder pind wurdt. By supermerken, kleanwinkels en boumerken is net in soad feroare, neffens ING.

Nei ferwachting ferhúzje hjoed de earste Nederlânske coronapasjinten tiisdei nei in sikehûs yn Dútslân. De eastlike buorlju springe by om't de druk op de sikehûssoarch yn Nederlân yn in rap tempo tanimt.

Yn totaal is der plak foar tweintich Covid-pasjinten op sawol de intensive cares as de ferpleechôfdielingen yn Dútslân.

Der hawwe yn de nacht fan moandei op tiisdei gjin grutte ûngeregeldheden west yn Drachten. Dat seit boargemaster Jan Rijpstra fan de gemeente Smellingerlân. Yn oerlis mei de plysje hie de boargemaster in needferoardering ôfkundige.

Neffens de gemeente soe der by de plysje ynformaasje binnenkaam wêze dat der op sosjale media oproppen dien waarden om yn de jûn op ferskate plakken byinoar te kommen, ûnder oare yn Drachten. Men woe foarkomme dat minsken de konfrontaasje oangean mei de plysje, fernielingen oanrjochtsje en winkels plonderje.

Wolkom by dit liveblog fan tiisdei 23 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.