Coronanijs 22 novimber: 944 besmettingen | Fryske apteker prikt coronafaksin

Dizze wike binne der pop-up faksinaasjelokaasjes fan GGD Fryslân te finen yn ûnder oaren Ljouwert, Oerterp, Kollumersweach, Snits en op Flylân. By de pop-up lokaasjes kinne minsken sûnder ôfspraak terjochte foar in prik of ynformaasje oer it faksin.

Yn Fryslân binne yn de ôfrûne 24 oeren 944 nije coronabesmettingen fêststeld, dat meldt it RIVM. Juster wiene it der hast likefolle, doe gong it om 940 besmettingen. Lanlik binne der 23.066 besmettingen fêststeld.

Der is yn de ôfrûne 24 oeren yn Fryslân ien stjergefal fêststeld as gefolch fan it coronafirus. It giet om in ynwenner fan Smellingerlân.

Apoteker Rogier Hilbers is foar safier bekend de earste apoteker dy't sels syn pasjinten faksinearret tsjin corona. Hy hat in apoteek yn Easterwâlde, dêr't minsken no foar fragen oer faksinaasjes en foar de prik sels terjochte kinne.

Hilbers en GGD Fryslân hoopje dat de persoanlike oanpak der ta liedt dat mear minsken har faksinearje litte. Apotekers meie lykwols net samar sels faksinearje, sy moatte dêrfoar trainingen dwaan.

Demisjonêr premier Rutte ropt op de basisregels better nei te libjen. "Anders eerder dan 3 december extra maatregelen nodig." Op dy dei stiet it folgjende 'weegmoment' pland.

Oft de maatregels dy't sûnt 13 novimber jilde genôch effekt hawwe, is net earder as ein dizze wike echt te sjen.

Nei oanlieding fan de ûngeregeldheden by de wedstriid Cambuur - FC Utrecht sneintejûn, binne seis minsken oanholden. Der wurde mear oanhâldingen ferwachte.

By de wedstriid mocht neffens de coronamaatregels gjin publyk wêze. De wedstriid moast lykwols twa kear stillein wurde, om't earst fjoerwurk fan bûten it stadion it fjild op smiten waard, letter om't minsken fan bûten it stadion yn kaam wienen.

It duorret net lang mear foardat sikehûzen kieze moatte wa't se wol en net opnimme, it saneamde 'koade swart'. Dêr warskôget beropsferiening V&VN (Verpleegkundigen & Verzorgenden Nederland) foar, om't it tal pasjinten dat op ferpleech- of ic-ôfdielingen komt tanimmen bliuwt.

Ferline wike koe it MCL tydlik al gjin nije coronapasjinten mear opnimme. Dat kaam trochdat de stream fan pasjinten fan en nei oare soarchynstellings ta net goed ferrûn.

Nederlânske spultsje-útjouwers fernamen yn de coronatiid in grutte omsetgroei. Spultsjeswinkel Spellekijn yn Ljouwert is yntusken ferhuze nei in oar pân, dat trije kear sa grut is, fertelt eigener Annetol Griskov. Neffens him wie dat net iens sa bot fanwegen corona: "We waren gewoon uit ons jasje gegroeid. Klanten braken bijna hun nek in de winkel, zo vol stond het met dozen en displays."

Hy fernimt ek dat de spultsjes de lêste jierren populêrder wurde by in grutter publyk. "Het is meer een huis, tuin en keuken-hobby geworden."

Yn Fryslân lizze 76 pasjinten yn de sikehûzen, dêr't 16 fan op IC lizze. Freed leinen 55 pasjinten yn de Fryske sikehûzen, dêr't 12 fan op IC leine.

Yn de trije noardlike provinsjes Grinslân, Drinte en Fryslân lizze byinoar 176 coronapasjinten yn it sikehûs, meldt Acute Zorgnetwerk Noord Nederland. Fan dy pasjinten lizze der 41 op in IC-bêd.

It fertrouwen fan de konsumint yn Nederlân is wer sakke. Dat meldt it CBS. Yn oktober kaam it fertrouwen út op min tsien, dizze moanne is dat sakke nei min njoggentjin.

Dat betsjut dat it fertrouwen wer op it nivo is fan febrewaris fan dit jier, doe't Nederlân noch yn in lockdown siet. It CBS seit dat it fertrouwen de ôfrûne moannen ûnder oare sakke is om't minsken fernimme dat it libben djoerder wurden is. Dat sjogge se benammen yn de gas- en brânstofprizen.

Cambuurtrainer Henk de Jong koe syn eagen hast net leauwe, doe't er seach dat minsken it stadion binnen kamen mei fjoerwurk. "It is sa skande. It gebeurt op mear plakken, mar it fuotbal wurdt der no de dupe fan. Us klup ek."

Wolkom by dit liveblog fan moandei 22 novimber oer de ûntwikkelingen oangeande it coronafirus yn Fryslân. Us liveblog fan juster neilêze kin hjir.