Bûtenpost sechsde nei lytse oerwinning op Swift
Bûtenpost hat sneon mei 1-0 wûn fan Swift. Yn Amsterdam makke Max Huiskamp it iennige doelpunt.
Bûtenpost hie it dreech yn de begjinfaze. De earste kânsen wiene foar Swift, mar de ferdigening fan de Blaukes koe stânhâlde. Healwei de earste helte kaam Bûtenpost wat better yn de wedstriid.
Van der Meulen rêdt Bûtenpost
Nei 36 minuten ûnderskate doelman Kevin van der Meulen him doe't er in grutte kâns fan Swift út de goal hâlde koe. Sadwaande wie it 0-0 by it skoft.
Nei it skoft wie de earste kâns foar Bûtenpost fuort raak. Max Huiskamp makke nei in pass fan Rob Schokker 0-1.
Nei it doelpunt wie Swift oan it sykjen nei de lykmakker. Bûtenpost oerlibbe lykwols it slotoffinsyf en pakte dêrmei de trije punten.
Bûtenpost hat no 16 punten en is dêrmei foarearst sechsde yn de haadklasse.
Corona
Yn ferbân mei coronagefallen by de tsjinstanners waarden de wedstriden fan Harkemase Boys en ONS Snits sneon skrast.