Omrop TIP: Beklimmers fan it flakke lân (diel 8): 'Bezint eer ge begint'

Neffens filosoof Joke Hermsen binne kalmte en oandacht wichtige betingsten foar kreativiteit en helder tinken. Kwaliteiten dy't nedich binne om feroaringen op gong te bringen. Minsken wurde sa opjage troch de klok, dat sy ferjitte om rêst te nimmen. Dêrtroch reitsje se út balâns en krijt ien op de fiif minsken in burn-out. Yn in ynterview mei Bart Kingma seit Hermsen: 'Wy moatte sa no en dan oan de kloktiid ûntsnappe. Ut 'e tiid stappe.'

Liskje Kuipers wie in jier as acht doe't ein jierren 70 de earste hippys yn Hantum kamen te wenjen. It doarp fûn it earst mar neat, mar Liskje fûn it prachtich. Sy rekke befreone mei ien fan harren. Letter waard op it lân fan har freondinne in boeddhistysk sintrum boud. Ek Liskje sleat har oan by it boeddhisme.

It sintrum yn Hantum is der noch altyd en is in wichtich moetingsplak foar de folgelingen fan de Karma Kagyu orde - ien fan de fjouwer haadstreamingen fan it Tibetaansk Boeddhisme. In hillich en bysûnder krêftich plak, seit Sherab, de behearder. Alle jierren reizigje hûnderten minsken nei Hantum om te meditearjen en op azem te kommen.

Hinne Wagenaar is dûmny yn Jorwert en inisjatyfnimmer fan Nijkleaster - in mienskip dy't siket nei nije wegen foar leauwen en spiritualiteit. Der is bûten Jorwert in âlde pleats oankocht dy't omboud wurdt ta in modern kleaster. Der sille fêste bewenners wêze, mar gasten binne ek wolkom. De Bêd & Brochje yn de tsjerke fan Skettens lûkt minsken dy't sykje nei spiritualiteit en besinning. Sy sliepe yn de toer en ite it moarnsbrochje yn de konsistoary. It rint as it spoar, it 'besinningstoerisme' sit yn 'e lift. It tsjerkebestjoer neamt de tsjerke 'Us Stille Misjonaris'.