Simmerblog: Simmer yn De Falom

Hjirmei komme we oan de ein fan dit simmerblog. Moarn binne we der wer, dan binne we op De Jouwer. Oant dan!

Andries Peterson hat in boek skreaun oer de Falom. "Ik ha in boek skreaun oer de Falom om't ik op in bepaald stuit tocht: 'ik bin hast 75 jier, ik ha ek bern en dy witte totaal net hoe't ik eartiids opgroeid bin', en doe tocht ik 'se moatte dochs witte dat der in tiid west hat dat der gjin sosjale media wie'."

Hy krige doe in dokumint fan de Aldheidskeamer yn hannen "út de tiid dat alle minsken hjir in nij adres krigen". Dat dokumint hat er brûkt foar syn boek: "Doe ha ik alle minsken beskreaun dy't dêr yn foarkamen. Ungefear 95 adressen en dat is dan de tiid fan de fyftiger en sechstiger jierren fan de foarige iuw." De Falom is net in grut doarp, mar de fraach nei it boek oer it doarp is grut: "Binnen no-time wie alles fuort. Ik hie hûndert besteld, mar der binne 250 fuortgien. En der wurdt út en troch noch nei it boek frege."

Yn De Falom hiene se earder gjin boarterstún. Rienk Rozema rûn fiif jier lyn in dwerslesy op, en hat him doe ynset foar de komst fan in boarterstún, en net samar in boarterstún, fertelt er: "Der is in klimrek makke, mei stangen op presys de goeie hichte, dat ik ek myn pull-ups dwaan kin en hjir sporte kin." Hy is hiel wiis mei de tún. "Hartstikke moai, it giet der om dat elkenien meidwaan kin, mei of sûnder beheining. Mar ik fyn it foaral ek moai fan de bern hjir yn it doarp."

Alie Prins hat ek meiholpen om de tún der te krijen, it docht har goed om te hearren dat Rienk der wiis mei is. "Prachtich, dêr ha wy it foar dien. En it is net allinnich foar Rienk, elk doarp hat in boarterstún, mar dy hiene wy noch net." Troch ûnder oare Rozema hat de Falom no in wol in boarterstún: "Yn 2017, nei Rienk syn suggestje om te besykjen jild by inoar te krijen en dat te realisearjen, en dat is slagge."

Boskwachter Jakob Hanenburg lit ús de bulten sjen dy't spesjaal makke binne foar de ringslangen. "Sa'n bultsje bestiet út feanmoas, gers, takken, houtsnippers en wy ha der ek noch wat hynderkeutels yn smiten. Alles om te soargjen dat it moai broeit en op goeie temperatuer is foar de ringslangaaien om út te kommen."

Kapitein Alie Prins hat de manlju nei it plakje ta brocht, en is no sels ek wol nijsgjirrich: "Ik kin net wachtsje, jong. Ik soe sizze: 'gaan met die banaan!'" Yn de earste bult leit gjin slang, mar by de twadde bult is it raak: "Sjoch, twa slangen!", ropt Hanenburg: "Fantastysk!"