Liveblog
|
4 augustus 2021
PC-OERSJOCH: Van der Bos, Triemstra en Zijlstra winne de PC
Omrop Fryslân folge de hiele dei alles op en om it Sjûkelân, dêr't de 168e PC holden waard. Lês hjir alles werom.
Lêst bywurke: 12 augustus 2021, 11:10
woansdei 4 augustus 2021
18:43
Ein fan de liveblog: Van der Bos, Triemstra en Zijlstra winne de 168e PC en Erwin Zijlstra is Kening
Gert-Anne van der Bos, Taeke Triemstra en Erwin Zijlstra hawwe woansdei de 168e edysje fan de PC wûn. Op It Sjûkelân yn Frjentsjer wiene sy mei 5-2 6-6 te sterk foar Marten Bergsma, Dylan Drent en Hendrik Kootstra. Mei de huldiging waard Erwin Zijlstra ta Kening útroppen.
Lês hjir de earste reaksjes fan it winnende partoer:
17:17
De finale is úteinset
17:03
Foarsitter Hellinga, wa giet der winnen?
Foarsitter Ids Hellinga fan de PC doart him net te weagjen oan in foarsizzing oer de winner. "Sis it mar. Faak komme foarsizzingen net út. Wy hiene graach wol wat spannendere partijen sjen wollen, soks is fansels ôfhinklik fan de lotting. Mar ik tink wol dat wy in spannende finale te sjen krije."
Hellinga fynt dat de dei 'geweldich' ferrint. "Wy hiene yn 't foar de measte soargen oer de QR-koaden. Mar it is prachtich gien. Ik hear allinne mar positive lûden, ek fan de helptsjinsten. En de keatsers hawwe hjir al sa lang nei út sjoen."
16:42
Lêste finalepartoer bekend
Njonken it partoer fan Bergsma is ek it lêste finalistepartoer bekend. It partoer fan Gert-Anne van der Bos, Taeke Triemstra en Erwin Zijlstra hat mei 5-3 6-6 wûn fan Paul Dijkstra, René de Haan en Gerben de Boer. It partoer fan Dijkstra focht noch troch oant de ein, mar kaam dochs tekoart.
Sa sjocht it spulskema der út krekt foar de finale (klik hjir foar de grutte ferzje):
16:34
Oanmoedigjen Drent mei de pet giet goed
Boargemaster Ina Sjerps is yntusken heas fan in oanmoedigjen fan keatser Dylan Drent, dy't út har gemeente Harns komt. Neffens Sjerps set sy mei alle leafde de pet op om de 'striid' tusken de buorgemeenten goed te meitsjen. "Bij elke wedstrijd die Dennis speelt, heb ik de pet op. Het gaat tot nu toe goed. Het is wel heel spannend, hoewel hij elke keer met grote overmacht wint."
16:14
De partoeren fan Dijkstra en Van der Bos keatse foar it lêste finaleplak:
16:04
15:52
Partoer Bergsma wint earste heale finale
It partoer fan Marten Bergsma, Dylan Drent en Hendrik Kootstra wint de earste heale finale tsjin Tjisse Steenstra, Renze Hiemstra en Hans Wassenaar mei 5-1 6-4.
15:48
Wa soe der winne moatte?
15:35
1e omloop yn byld
15:30
Van der Bos en konsorten troch
Ek de lêste fan de fjouwer heale finalisten is bekend: it partoer fan Gert-Anne van der Bos, Taeke Triemstra en Erwin Zijlstra 5-2 6-6 wûn fan it partoer fan Enno Kingma, Kees van der Schoot en Menno van Zwieten.
15:25
Stiltekroech
It is drok op it fjild, mar net yn de âlde studintekroech fan Frjentsjer:
15:12
Partoer Dijkstra yn de heale finale
Unferwachte hat it partoer fan Paul Dijkstra mei 5-4 6-4 wûn fan it partoer fan Auke Boomsma.
15:06
De âldste taskôger
By de PC is woansdei in bysûndere taskôger: Siebe Frankena, dy't 100 jier wurden is. It is dan ek net syn earste PC. "Ik haw der mear as 80 sjoen. Somtiden wie ik in pear kear mei de bern nei Skylge op fakânsje. Dan moast ik it misse. Mar ik hie al safolle sjoen, dus dat is dan net sa slim."
Syn earste PC wie yn 1932, doe't Klaas Kuiken wûn. "Doe wie ik 11 jier. Ik krige gjin jild, mar in stikje bôle mei. Ik moast mar sjen dat ik der yn kaam. De earste tsien jier bin ik der altyd yn slûpt", laket Frankena.
14:42
Partoer Steenstra troch nei heale finale
It partoer fan Tjisse Steenstra, Renze Hiemstra en Hans Wassenaar hat mei 5-2 6-2 wûn fan Peter van Zuiden, Allard Hoekstra en Laas Pieter van Straten.
14:04
Marten Bergsma wint oertsjûgjend fan Van der Veen
It partoer fan Marten Bergsma, Dylan Drent en Hendrik Kootstra wint mei oertsjûging fan Johannes van der Veen, Kevin Jordi Hiemstra en Tsjerk Elsinga. It waard 1-5 en 6-6.
14:01
PC rjochtstreeks op telefyzje
De PC is no rjochtstreeks te sjen op telefyzje. It kommintaar is fan Roelof de Vries en Jan Willem van Beem.
13:39
Earste omloop dien, Kingma wint mei 3-5 en 4-6 fan Bouma
It partoer fan Enno Kingma, Kees van der Schoot en Menno van Zwieten hat mei 3-5 en 4-6 wûn fan Remmelt Bouma, Bauke Dijkstra en Thomas van Zuiden.
It wie de lêste wedstriid fan de earste list.
Dit is it skema fan de rest fan de dei. Alle favorite partoeren sitte der noch yn.
13:12
Favoryt Van der Bos wint maklik fan De Groot
It partoer fan Gert-Anne van der Bos, Taeke Triemstra en Erwin Zijlstra hat mei grutte sifers wûn fan Youri de Groot, Hendrik Jan van der Velde en Jelte-Pieter Dijkstra. It waard 5-1 en 6-0.
Foar Dijkstra wie it syn lêste PC. Oan de ein fan it seizoen hâldt er op as keatser.
12:41
Oantal besmettingen goed yn de gaten hâlde
"Ik hie tocht dat der folle minder minsken wêze soene, seit Pier Eringa. Hy is direkteur fan de stichting achter Testen voor Toegang.
"Ik ha ek wol wedstriden fan it Nederlânsk Alvetal meimakke, mei minder supporters", seit Eringa. "Doe wie de sfear der net. Hjir is in hiele goeie sfear."
Eringa tinkt wol dat it ferantwurde is. "Je meie der net samar yn. It is in bûtenevenement. It risiko is dus leger. Mar je moatte it wol goed yn de gaten hâlde, en sjen oft dit no mear besmettingen opsmyt. Dêr moatte je dan fan leare foar de folgjende kear."
12:37
Jongespartoer rêdt it net op
De jonges stiene mei 3-1 foar, mar se ha it net helle. Steven Koster, Jorn Lars van Beem en Thomas Dijkstra binne der ôf flein tsjin Paul Dijkstra, René de Haan en Gerben de Boer.
Steven Koster is teloarsteld. "We hiene fiersten te folle flaters. We ha it sels fuortjûn. Skande!" Se ha der alles oan dien, mar it woe net. "Dat wie net leuk, foaral foar safolle minsken net. Dan wolst sjenlitte watst kinst."
12:31
Attema ferliest mei grutte sifers fan Boomsma
Jelle Attema, Gabe van Popta en Pieter Jan Leijenaar ha mei grutte sifers ferlern fan Auke Boomsma, Hyltje Bosma en Patrick Scheepstra. Attema-en-dy wiene sa goed as kânsleas.
Utslach 1-5 en 4-6.
12:04
Jongeskeatsers mei 3-2 foar tsjin Dijkstra-en-dy
It sit tich by mekoar, seit Geert van Tuinen. Steven Koster, Jorn Lars van Beem en Thomas Dijkstra steane mei 3-2 foar tsjin Paul Dijkstra, René de Haan en Gerben de Boer.
Koster-en-dy binne noch jonges. Se kinne meidwaan oan de Freule. "Us doel wie om de PC te heljen. Dat is no slagge", sei Steven Koster dêr juster oer.
De jonges wurde traind troch Johannes Brandsma. "Ik sjoch mysels werom yn Thomas Dijkstra. Ik wol net sizze dat ik lyts wie, mar ik wie net sa grut."
11:41
Of toch net?
De reinbôgesokken ha Bauke Triemstra, Pieter Jan Plat en Sjoerd de Jong net holpen. Se geane der yn de earste omloop ôf tsjin Tjisse Steenstra, Renze Hiemstra en Hans Wassenaar.
Utslach: 5-4 en 6-0.
"We jouwe fiersten te folle fuort", sei Bauke Triemstra. "We ha leuk meidien, mar it wie net goed. We moatte kille, en dat ha we neilitten. Dit wie weardeloas."
11:33
Alles einiget mei 5-2 en 6-4
Oant no ta ha der trije partijen west. Dy einigen alle trije yn 5-2 en 6-4.
11:25
Van Dellen leit der út
It partoer fan André van Dellen, Jouke Bosje en Willem Heeringa ferlies yn de earste omloop mei 5-2 en 6-4 fan Marten Bergsma, Dylan Drent en Hendrik Kootstra.
"Op de beslissende mominten hiene sy mear klasse. Se stiene geweldich te keatsen. We ha wol kânsen hân, mar it foel ús kant net op", seit Jouke Bosje.
Bosje wurket yn de soarch. "Dat is foar lestich om te kombinearjen mei it keatsen. Mar ik nim dit jier gjin ôfskied op de PC."
11:21
Boargemaster ûnder de pet
Op de tribine fan de PC is plak foar pommeranten. De takomstich boargemaster fan Kampen sit der: Sander de Rouwe. Hy is no noch deputearre yn Fryslân. Achter him is noch krekt in wite pet te sjen. Dêr sit nei alle gedachten de boargemaster fan Harns ûnder.
Boargemaster Ina Sjerps krige de pet fan foarsitter Ids Hellinga fan de PC. Sa kin se de iennige Harnzer keatser better oanmoedigje, seit er. Dy keatser is Dylan Drent, en neffens Hellinga hat Drent ek faak in pet op.
11:15
Favoriten oan de lieding
It partoer fan Marten Bergsma giet oan de lieding tsjin André van Dellen. "Bergsma giet troch nei de twadde omloop, let mar op." Dat seit Geert van Tuinen.
Tjisse Steenstra docht it ek better as Bauke Triemstra.
10:24
Reinbôgesokken
Allinne in reinbôgeflagge is net genôch foar it partoer fan Bauke Triemstra, Pieter Jan Plat en Sjoerd de Jong. Se ha kleurde sokken oan.
Earder dizze wike wie der in protte te dwaan oer de reinbôgeflagge op it Sjûkelân. Foarsitter Ids Hellinga hat no sein dat de flagge net werom komt. "It sil in ienmalige aksje wêze", sei er.
10:32
Van der Werff fljocht der ek út
De wedstriid tusken Van der Veen en Van der Werff is ek dien. Johannes van der Veen, Kevin Jordi Hiemstra en Tsjerk Elsinga winne mei 5-2 en 6-4 fan Lieuwe van der Werff, Sip Jaap Bos en Riemer Hoekstra.
10:26
Nicolay earste ôffaller nei ferlies fan Van Zuiden (5-2 en 6-4)
It partoer fan Peter van Zuiden, Allard Hoekstra en Laas Pieter van Straten hat de earste omloop mei 5-2 en 6-4 wûn fan Haye Jan Nicolay, Jelte Visser en Evert Pieter Tolsma.
Op it oare fjild stride Johannes van der Veen, Kevin Jordi Hiemstra en Tsjerk Elsinga noch tsjin Lieuwe van der Werff, Sip Jaap Bos en Riemer Hoekstra. Van der Veen en dy ha de bêste papieren.
10:16
Brok: Ik kin op de knibbels werom nei hûs
Kommissaris Arno Brok wennet flakby it Sjûkelân. "Ik kin op de knibbels werom nei hûs" Brok komplimintearret de organisaasje. "We ha hjir in goede kontrôle, dat is goed regele."
Brok baarnt him net oan de útspraken fan Hellinga, "Hy hat altyd in besteklik ferhaal, en dat is goed. It is goed dat de polityk dêr nei heart. Mar de kommissaris is polityk neutraal."
09:53
Hellinga bliuwt by útspraak oer skitende Hollanners
Foarsitter Ids Hellinga komt net werom op syn útspraak oer skitende Hollanners. Der sit in serieus boadskip achter, seit er. "Der wurdt fanalles besletten, mar de boarger ha we net hearre kind."
Hellinga sei yn syn iepeningstaspraak dat Hollanners krekt seekobben binne. Se komme, se skite en se ferdwine.
09:49
Reinbôgeflagge komt net werom
De reinbôgeflagge komt net werom. Dat sei foarsitter Ids Hellinga fan de PC yn syn taspraak yn de Koornbeurs. "It sil in ienmalige aksje wêze", sei er.
Neffens Hellinga stiet de Fryske flagge ek foar ynklusiviteit. "Boppedat alle sân pompeblêden wize deselde kant út. Lit ús fan ús eilantsje ôfkomme en de ferbining mei inoar sykje", sa sei Hellinga.
09:39
Johannes van der Veen slacht earste bal
De keatsers binne los: Johannes van der Veen sloech de earste bal. De wedstriid is de hiele dei rjochtstreeks te folgen by Omrop Fryslân. Net allinne yn dit liveblog, mar online binne der ek live-bylden te sjen.
09:19
Frysk folksliet en 'de dei is úzes'
Mei de histoaryske wurden 'de dei is úzes' en de klanken fan it Frysk folksliet is de PC yn Frjentsjer offisjeel iepene. By de tagongslokaasjes is it behoarlik drok.
Minsken moatte in QR-koade meinimme, of in oar tagongsbewiis. Dat soarget net foar problemen, hearde ferslachjouwer Johanna Brinkman.
08:32
Foar it earst in jongespartoer op PC
Mei Steven Koster, Jorn Lars van Beem en Thomas Dijkstra stiet der dit jier foar it earst in jongespartoer yn de PC. Se binne as 16de kwalifisearre, en as se dit seizoen trije punten minder helle hiene, hiene se der no net by west.
"Dit is in dream dy't útkomt", seit Steven Koster. "Us doel wie om de PC te heljen. Dat is no slagge." De jonges wurde traind troch Johannes Brandsma. "Ik sjoch mysels werom yn Thomas Dijkstra. Ik wol net sizze dat ik lyts wie, mar ik wie net sa grut."
"Se ha ek moai lotte. As se direkt tsjin Van der Bos moasten, hie ik sein: 'bliuw mar thús'. Mar se sitte yn in moai blokje."
"We ha alle kânsen", seit Thomas.
08:29
Reinbôgeflagge wapperet op Sjûkelân
De reinbôgeflagge wapperet op it Sjûkelân. Mei pompeblêden. Dêr wie yn de wike foarôfgeand oan de PC noch wol wat rebûlje oer.
"De Fryske flagge is fan elkenien. Dêr wurdt no in slop ôflûksel fan makke, om ferbining út te strielen, en it tsjinoerstelde bart. Dizze flagge polarisearret", sei Albert van Dijk fan Forum voor Democratie. Hy fynt dat de provinsje dizze flagge ferbiede moat by eveneminten.
08:14
PC hie ek yn Abe Lenstra Stadion kind
As de PC troch de coronaregels net mooglik west hie, en it fuotbaljen hie wol mocht, dan hie de PC yn it Abe Lenstra Stadion holden wurde kind. Dat sei foarsitter Ids Hellinga yn syn iepeningstaspraak yn de Koornbeurs. Hy hat kontakt hân mei SC Hearrenfean.
De taspraak is no live te sjen op telefyzje.
07:44
Ids Hellinga iepenet PC-dei om 08:00 oere
As de klok fan de Martinitsjerke acht kear slein hat, iepenet foarsitter Ids Hellinga de dei fan de PC mei in taspraak yn de Koornbeurs yn Frjentsjer. Dy taspraak is live te sjen by Omrop Fryslân op telefyzje., en ek online.
07:19
Binnenstêd ôfsletten, faksinaasjelokaasje GGD berikber
De binnenstêd fan Frjentsjer is ôfsletten foar motorisearre ferkear. De faksinaasjelokaasje fan de GGD yn Frjentsjer bliuwt berikber.
Fan seis oere moarns oant seis oere jûns meie der gjin auto's yn de binnenstêd fan Frjentsjer komme. Dat meldt de gemeente Waadhoeke. De faksinaasjelokaasje yn sporthal De Trije leit yn it ôfsletten gebiet.
Minsken dy't har faksinearje litte wolle, meie trochride as se in útnûging of brief foar faksinaasje toane kinne oan de ferkearsregelder by de ôfsetting.
Bussen fan ferfiersbedriuw Arriva ride fan 3 oant en mei 5 augustus net troch de binnenstêd, mar oer de rûnwei. Der wurde ekstra bussen ynset.
07:18
Corona makket PC oars as oars
De corona-regels meitsje dat de PC der oars útsjocht as gebrûklik. Sa binne der gjin steanplakken lâns it fjild en mei publyk allinne de tribune op as der in bewiis sjen litten wurde kin fan folsleine yninting of fan in negative útslach fan in coronatest.
Fierder is der foarôfgeand gjin rydtoer troch Frjentsjer, om foar te kommen dat der tefolle minsken byelkoar komme. En by de resepsje dy't om acht oere begjint yn De Koornbeurs wurde minder minsken talitten.
07:15
Boargemaster tocht even dat it net koe
"Doe't yn ien kear de swiere lockdown wer kaam, doe tocht ik even dat it net mear koe." Dat sei boargemaster Marga Waanders fan de gemeente Waadhoeke oer de PC.
"It Ryk jout oan wat de marzjes binne. Dêr bliuwe we binnen. En dan sjogge we wat kin." Waanders is net altyd like gelokkich mei de regels fan it Ryk.
"In lytse merke kin, mar dan moatte minsken wol ôfstân hâlde. As in doarpshûs itselde wol, jilde der wer oare regels. Wy krije no oanfragen binnen, en dan tink ik: de minsken yn Den Haach soene ris op de stoel sitte moatte fan de minsken yn de gemeenten."
"Wy wolle alles graach safolle mooglik fasiliteare, mar soms witte wy it ek net mear."
07:11
Favoriten ûntrinne mekoar yn earste omloop
De trije favorite partoeren komme yn de earste omloop net tsjinoer mekoar te stean. De measte kenners prate oer in 'moaie lotting'.
"De favoriten binne behoarlik ferspraat", seit keatser Hans Wassenaar. "Wy sitte sels net yn it maklikste blokje, mar dat is ek net sa slim. We steane no direkt tsjinoer keatsers dêr't we de rest fan de dei noch wat oan ha. It hie minder kind. In top-fjouwer partoer, dêr wurde je minder bliid fan, as je dêr direkt tsjin moatte."
07:03
Piet Paulusma: Kâns op in bui
Der is kâns op in bui, seit waarman Piet Paulusma. "Ik doar gjin drûch-waar-garânsje ôf te jaan." Dy bui soe dan letter op de dei falle kinne, seit Paulusma.
By de foarige PC, yn 2019, is de wedstriid yn de rin fan de middei stillein omdat der tefolle reinwetter wie. It liket der no net op dat de buien wer sa slim wêze sille.
07:10
Geert van Tuinen hat trije favorite partoeren
Bergsma (3), Van der Bos (3) en Steenstra (2) ferdielden de oerwinningen. "Om dy trije sil it wol gean, wêrby't ik it partoer fan Bergsma it meast konstante partoer fyn", seit Geert van Tuinen.
"Marten Bergsma wie snein yn Wytmarsum wat útkeatst, mar sy meitsje op my dochs de bêste yndruk. Bergsma is yn topfoarm. En ferjit dy dekselske ouwe seun Dylan Drent net. Dy stiet op skerp, let mar op. En Kootstra docht gewoan syn wurk. Altyd goed foar genôch kwaliteit."
07:00
Goeiemoarn!
Goeiemoarn en wolkom op de 168e PC. De 167e edysje hat der noait west. dy koe foarich jier net trochgean fanwege de coronaregels. Mar by de PC telle se dan gewoan troch.
De belangrykste keatswedstriid fan it jier is fan 14:00 oere op telefyzje te sjen: earst mei in gearfetting en dêrnei live. Fan moarns betiid ôf is de PC al te folgjen op de radio en online.