Jitse Kramer ferbrekt rekôr deadliften: "Je sitte tsjin it ûntploffen oan"

Hielendal fansels gie it net, fertelt Kramer nei de tiid. "Der wie wat yn de foet dat 'knap' sei. Ik bin trochgien, mar ik moat efkes nei de fysio tink ik. As dat net bard wie, hie ik der miskien in stapke by dwaan kinnen. Mar no net mear. It wrâldrekôr by de 40-plus is 435 kilo. It skeelt mar 15 kilo, dus dat sit net sa fier mear fuort."

It giet der by deadlift om dat je de lilkens nei de spieren stjoere kinne, leit Kramer út. "Je sitte tsjin it ûntploffen oan. Je meitsje jesels hiel lilk, mar je hâlde jesels rêstich. Fan binnen siede je, mar fan bûten sjogge je it net."

Troch de lockdown hie sterke man Jitse Kramer lange tiid gjin wedstriden mear. Op syk nei in nije útdaging, besleat er syn eigen rekôr op it deadliften te ferbetterjen. "Ik doch dit om't ik der goed yn bin. It is moai om wat te dwaan dat in oar net kin."

Foar it echte wurk wie der wol in goeie warming up nedich. Dêr wie ek sterke man Wout Zijlstra by. "Je moatte nei in allemachtichst gewicht ta," fertelde Zijlstra yn 't foar. "Jitse moat soks opbouwe, want je kinne net samar sa'n gewicht tille. Wy binne op 70 kilo úteinset."