LDODK nei oerwinning op Oost-Arnhem wis fan play-offs

14 mrt 2021 - 10:45

LDODK hat him sneon pleatst foar de play-offs om it kampioenskip yn de Kuorbal League. Yn de ien-nei-lêste reguliere kompetysjewedstriid wûnen de Gordyksters mei 26-23 fan hikkesluter Oost-Arnhem.

Yn de earste helte hiene de Gordyksters in soad muoite mei Oost-Arnhem. By it skoft stie der sels in efterstân op it skoareboerd: 10-11. Diana van der Vorst, dy't nei dit seizoen ophâldt mei kuorbaljen, makke fjouwer goals foar LDODK.

Foto: Orange Pictures

Sterke wiksels

Yn de twadde helte kamen de Friezen lykwols wat mear op stoom. Oost-Arnhem kaam earst noch foar mei 12-13, mar doe wist LDODK it gat fan de koer ynienen wer te finen. Se rûnen flot út nei 20-14. Under mear troch trije goals fan ynfaller Christian Dekker en sân doelpunten fan Erwin Zwart gie de oerwinning úteinlik mei 26-23 nei LDODK.

Mei de oerwinning is LDODK wis fan de play-offs om it lânskampioenskip, om't Groen Geel letter op sneon mei 11-19 ferlear fan PKC. Snein ferlear Blauw Wit (A) ferrassend mei romme sifers fan KZ: 12-28

Erwin Zwart:

Erwin Zwart oer winst tsjin Oost-Arnhem

Diana van der Vorst mei LDODK nei de play-offs:

Diana van der Vorst mei LDODK nei de play-offs

Kuorbal League

Stân Duels Punten
1. PKC* 9 18
2. KZ* 9 10
3. LDODK* 9 9
4. Blauw Wit (A)* 9 9
5. Groen Geel 9 6
6. Oost-Arnhem 9 2
(Advertinsje)
(Advertinsje)