WINTERBLOG fan sneon 13 febrewaris: soad drokte op it iis

By Burgum is fannemiddei in reedrider ferwûne rekke en mei de helikopter fan it iis helle. Dûkers fan de brânwachten fan Burgum en Ljouwert en ambulânsepersoniel wiene op it plak om help te bieden. Mear bysûnderheden binne net bekend.

De gemeente Noardeast-Fryslân warskôget op twitter foar min en ûnbetrouber iis. "De ijskwaliteit is op veel plekken zwak. In de binnenstad Dokkum zijn de eerste personen door het ijs gegaan. Wees voorzichtig en verstandig. Schaats alleen waar het kan: https://friescheijsbond.frl/schaatskaart."

De Dokterswacht Fryslân is oerbelêste troch alle ûngelokken op it iis dy't sneon bard binne. It giet om fiif húsdokterposten yn de provinsje, wêrfan't ek de telefoanlinen hast net mear te berikken binne. De Dokterswacht freget minsken mei iisrelatearre ferwûningen dêrom harren telefoantsje út te stellen oft begryp te hawwen foar in lange wachttiid.

IIsmaster Sytse Kroes fan de Friesche IJsbond advisearret minsken noch hieltyd om net it iepen wetter op te gean om te riden. "It iis is net geskikt foar de grutte massa." Hy advisearret minsken dêrom om net it iis op te gean. "Ik sjoch dat in hiel soad minsken it wol dogge. Mar je moatte je wol realisearje dat je op it eigen risiko dogge en dat je dus ek sels witte moatte hoe't it der hinne leit. It is nearne fertroud en we hawwe it nearne frijjûn", seit Kroes.

Reedrydleafhawwer Age Dijkstra út Ljouwert is freed fan Ljouwert nei Dokkum, in stik fan de Alvestêderûte, en werom riden oer it iis. It wie in meunstertocht; hy hat der 6,5 oere oer dien. "It wie swier iis, it wie hartstikke min," seit Age Dijkstra. "Der wie net folle op riden, dus der wienen amper noch skuorren. It iis wie bobbelich, it wie snie-iis mei wynwekken."

By de Bonkefeart yn Ljouwert is it sneontemoarn al wer drok. Ferkearsregelers binne dwaande om de parkeardrokte goed te regeljen. Ek by de Grutte Wielen en op de Ryptsjerksterpolder wurdt riden.

De Veiligheidsregio ropt minsken op om yn de omjouwing fan harren eigen wenplak it iis op te gean om sa drokte op oare plakken foar te kommen.

"It wurdt in dei om derop út", seit waarman Piet Paulusma. "De sinne is der folop by en de temperatueren lizze om de min 1 en min 2. De (súd)eastlike wyn is matich en makket it foar it gefoel wol kâlder."

Nei in nacht mei flinke froast, yn Waskemar waard it -13, wurdt kommende nacht ek noch froast ferwachte oant -10 yn it súdeasten fan de provinsje. Snein oerdei komt it kwik krekt boppe it friespunt. Yn de nacht nei moandei falt mooglik snie of rein. Moandei is der kâns op izel. Tiisdei wurdt it 6 graden.

Goeiemoarn en wolkom yn dit liveblog oer it winterwaar. Ek hjoed hâlde we jim wêr op 'e hichte oer al it lêste nijs oer it winterwaar

It liveblog fan freed is hjir nei te lêzen.