WINTERBLOG freed 12 febrewaris: mear as 100 iisslachtoffers yn sikehuzen

Hoe lang bliuwt it winterske waar noch by ús? Waarman Piet Paulusma is der dúdlik yn: "Sa't it no liket oant en mei snein. Dat kinne wy noch krekt oprêde. Mar je sjogge wol dat as it mar efkes teiwaar is, dan komt der wetter oan de kanten en wurdt it sêft."

Mar dan is de fraach: komt dy winter werwerom? Piet: "No, it kin samar dat dy winter oer in wike stadichoan weromkomt. Ik wol it net útslute. Ik sis net dát it bart, mar ik bin der ek net wis fan dat it net sa is. Dus it soe samar kinne. Dan soe der in twadde perioade oankomme. Wy hawwe it yn 2018 ek hân, ein febrewaris-begjin maart. Je witte it mar noait."

Trije plysjes ha de redens ûnder bûn. Se binne op de Bonkefeart stapt by Ljouwert om in stikje fan de Alvestêdetocht rjochting Gytsjerk te riden.

Fan de dyk lâns de Bonkefeart is yntusken ienrjochtingsferkear makke troch de gemeente, om't in soad riders mei de auto komme.

Sa treastleas as de iisbaan fan De Jouwer der yn desimber by lei, sa fleurich en drok is it yn febrewaris op de Nutsbaan dy't troch troch iisklup Vlecke Joure ûnder wetter set is:

Reedrydbûn KNSB ropt minsken op om ferstannich te wêzen as se te riden geane op natueriis. "Blijf dicht bij huis. Zoek vijvers, grachten of sloten in je eigen woonplaats. Wil je zeker weten dat het ijs veilig is en de omstandigheden coronaproof zijn, ga dan schaatsen bij de lokale natuurijsclub. Ga niet schaatsen op bevroren open water, want daar is de ijskwaliteit onbetrouwbaar", seit it bûn.

De plysje fan Boalsert-Koudum en omkriten kaam efkes om 'e hoeke sjen by it Reade Klif yn Warns. Dêr wie it klif yn in skypiste feroare. Foar de jongerein en de 'âldere jongeren' in goeie gelegenheid om wer ris de slide te pakken.

"Een aantal wilden wel eens zien of oom agent de skills nog had," sa skriuwt de plysje op sosjale media. "Uiteraard nam de politie deze uitdaging aan."

"Hjir leit 9-10 sintimeter iis, dus op dit stik is it fertroud," seit iismaster Geert Kleinhuis fan iisklup Lyts Bigjin yn Earnewâld. "Hjir kinne wy ek wol wat drokte hawwe, mar as je it doarp út ride leit der by it Otterbyld mar sa'n 4 sintimeter. Dus dat giet noch net sa bot. En de kanten binne net altyd fertroud. As de sinne der bot op skynt, leit it der rap út."

Dochs binne der genôch minsken dy't it mar besykje op in soad plakken. "Der binne weachhalzen genôch, want sy fleane ek massaal oer It Soal hinne. Mar de ried is: bliuw safolle mooglik yn je eigen omgeving. Ek fanwege corona, mar it is lang net allegearre fertroud. Der moat op syn minst noch in pear nachten froast oerhinne wolle je hjirwei nei De Alde Feanen ta ride."

Sjoch mei nei live bylden fan de provinsje:

Net op alle iisbanen is de iiskwaliteit goed. Sa hat IJsclub Akkerwoude fan Damwâld tongersdei besletten de iisbaan wer te sluten. Ek de iisbaan fan Goutum gie tongersdei om 18.00 oere wer ticht: troch de hege temperatueren wiene der skuorren ûntstien.

De iisklup Meiinoar Ien jout op sosjale media oan 'genoodzaakt te zijn' in ledestop yn te stellen foar minsken dy't net út Seisbierrum-Pitersbierrum wei komme. It hat te krijen mei de 'massale toeloop' op de iisbaan tongersdei. De klup freget minsken net op it iis hingjen te bliuwen as it net nedich is. "Ga na het schaatsen van de baan en geef andere mensen ook een kans. Alleen samen kunnen we er een mooi schaatsfestijn van maken."

Rykswettersteat Noard-Nederlân hat freedtemoarn op de haadfarwei tusken De Lemmer en Delfzijl twa iisbrekkers oan it wurk set om it wetter befarber te hâlden foar de skipfeart. Op dizze wize moatte ek brêgen en slûzen beskerme wurde tsjin it iis.

Gjin koek en zopie, mar boek en zopie op de iisbaan yn Wommels. Reedriders kinne nei it riden fergees in boek mei nei hûs nimme.

Want no't de biblioteek ticht is troch de coronamaatregels, kinne leden brûkte boeken ôfhelje, mar de lêste tiid binne der gjin ôfskreaune boeken mear ferkocht. Mei boek en zopie komme se toch goed terjochte.

Gemeente De Fryske Marren hat ek de tagongswei nei soarchynstelling Maeykehiem yn Sint-Nyk oan ien kant ôfset en in parkearferbod ynsteld. Want ek op dat plak binne in soad minsken dy't de Vegelinsbosken yn wolle om te kuierjen of te reedriden op de Amazonasfiver. Ein jannewaris die de soarchynstelling sels al in oprop om it terrein by de Bouwen te mijen.

Gemeente De Fryske Marren hat in tydlik parkearferbod ôfkundige foar de Badwei njonken it Nannewiid by Aldehaske. It wie tongersdei tige drok by it feanmarke mei reedriders. De gemeente wol romte hâlde foar helptsjinsten as der hommels in kalamiteit wêze soe. Der sil hanthavene wurde, jout de gemeente oan. It tafersjoch wurdt oanskerpe.

"Ik snap dat de regearing yn in lestige situaasje sit. Mar dat se sizze dat we op dit stuit gjin maraton op natueriis hâlde kinne, dat snap ik net." Willem Hut, kompetysjelieder maratonriden by de KNSB baalt derfan. De regearing hat de plannen fan de KNSB en House of Sports om coronaproof in NK maraton te organisearjen ôfkard. De KNSB en de maratonploegen snappe it net goed.

Reedriders, bliuw út it reid by natuergebieten wei. Mei dy oprop komt natuerbehearder It Fryske Gea. De organisaasje begrypt hiel goed dat minsken it natueriis opsykje. En It Fryske Gea is 'leveransier fan moaie gebieten', sizze se sels. Mar troch mei de redens troch it reid te fleanen, is de kâns grut dat je wylde bisten lykas reeën en fûgels fersteure.

De soargen om de reedrydkoarts yn Nederlân binne sa heech, dat deroer neitocht wurdt om guon gebieten de kommende dagen hielendal ôf te sluten foar guon minsken. Dat skriuwt De Telegraaf. Juster wie it op guon plakken al gaos troch de ferkearsdrokte. Dit wykein wurdt noch folle mear drokte ferwachte.

En mei it teiwaar dat nei dit wykein komt, wurdt ferwachte dat minsken de kommende dagen har kâns gripe wolle. Hubert Bruls, foarsitter fan it Veiligheidsberaad, warskôget dat boargemasters regio's op slot sette kinne. "Dan wordt er ook opgetreden en geverbaliseerd."

Goeiemoarn en wolkom yn dit liveblog oer it winterwaar. Ek hjoed hâlde we jim wêr op 'e hichte oer al it lêste nijs om de waarsomstannichheden hinne.

It liveblog fan tongersdei is hjir nei te lêzen.