Liveblog
|
22 jannewaris 2021
Coronanijs 22 jannewaris: "Britske fariant mooglik deadliker" | Alle Fryske húsdokters krije sneon prik
Yn dit liveblog melde wy it lêste nijs oer it coronafirus.
Lêst bywurke: 22 jannewaris 2021, 23:01
freed 22 jannewaris 2021
22:58
Ein fan dit liveblog
Hjirmei komme we oan de ein fan dit liveblog fan freed 22 jannewaris. Tank foar it folgjen.
22:40
Minder AstraZeneca-faksins nei EU
Farmaseut AstraZeneca leveret foarearst 60 prosint minder faksins oan de Europeeske Uny. Fan de 80 miljoen faksins dy't de lidsteaten krije soenen yn it earste fearnsjier, bliuwe 31 miljoen oer. Nederlân soe 2,3 miljoen doases krije, dat wurde der no sa'n 920.000. It komt troch produksjeproblemen yn it fabryk yn België.
Dat Nederlân minder krijt, hat benammen gefolgen foar thúswenjende 60-plussers, minsken tusken de 18 en 60 mei in medyske yndikaasje, wykferpleging en WMO-personiel. En letter ek foar alle oare minsken tusken de 18 en 60 jier.
21:16
Meiwurkers Fries Museum helpe by soarchsintra
Meiwurkers fan it Fries Museum en fan it Reade Krús stean by doarren fan soarchsintra fan Liante, in soarchgroep dy't sân lokaasjes hat yn Drachten, Wolvegea, Noardwâlde en de gemeente Eaststellingwerf. Se dogge dat om de nije regel fan ien besiker yn de wike noflik ferrinne te litten. "Een prachtig voorbeeld van Friese samenwerking", seit soarchmanager Jeroen Vos fan Liante.
"Het Fries Museum is dicht en zij hebben receptiemedewerkers. Inmiddels zijn er een stuk of vijf die nu op onze locaties werken. Dat geldt ook voor het Rode Kruis. De komende drie weken ondersteunen ze ons op al onze locaties."
Op it stuit giet it goed op de sân lokaasjes fan Liante, fertelt Vos. "We hebben nu geen actuele besmettingen. Maar het is wel iedere dag weer afwachten en voorzichtig zijn. We proberen de Britse variant buiten te houden. We zijn wat huiverig, maar gelukkig komt het vaccin eraan. We moeten volhouden."
19:29
Jild nedich foar doarpshuzen
Der moat in oplossing komme om de buffers fan doarpshuzen wer oan te foljen. Dat fynt de Steatefraksje fan de PvdA. Stichting Doarpswurk hat foarsteld om 1 miljoen euro út it Fûns Skjinne Fryske Enerzjy beskiber te stellen sa't doarpshuzen de coronakrisis opfange kinne. Mar dêrtroch kinne doarpshuzen net mear fierder mei duorsumens. De PvdA wol in oplossing.
18:35
"Britske fariant mooglik deadliker"
De Britske fariant fan it coronafirus is mooglik deadliker as de eardere fariant. Dat hat premier Boris Johnson fan it Feriene Keninkryk sein, op basis fan ûndersyk fan de organisaasje dy't dêr firussen ûndersiket. It binne noch wol de earste resultaten fan it ûndersyk. Dat meldt de BBC.
"Njonken dat it him rapper ferspriedt, liket der no ek bewiis te wêzen dat de nije fariant deadliker is", seit Johnson. De belangrykste adviseur fan de Britske regearing oer dit ûnderwerp seit der wol by dat it bewiis oer de deadlikheid noch net hiel sterk is.
18:27
Plysje warskôget foar boete
17:54
RIVM: Thúswurkjen is dreech, en foar de helte fan de Friezen 'gjin opsje'
Friezen fine it dreech om de coronamaatregels te folgjen. Dat blykt út ûndersyk fan it RIVM. De helte fan de Friezen seit dat thúswurkjen gjin opsje is. En dat wylst de GGD meldt dat der by meardere bedriuwen coronaklusters fêststeld binne.
De GGD sit der boppe-op, en siket no mear kontakt mei bedriuwen, om te sjen wat se dwaan kinne. Mar kontrolearje kin de sûnensorganisaasje net, seit De Graaf. Se kin wol de arbeidsynspeksje ynskeakelje, as dat nedich is.
17:00
Braziliaanske coronafariant dûkt op yn Dútslân
Yn Dútslân is foar it earst de Braziliaanske fariant fan it coronafirus fêststeld. De pasjint waard juster test en soe gjin sykteferskynselen ha. It Dútske RIVM hat witte litten dat de Braziliaanske fariant fan it firus fergeykber is mei de Súd-Afrikaanske mutaasje.
Beide farianten soene besmetliker wêze as it klassike coronafirus. Datselde jildt foar de Britske fariant, dy't earder yn ferskillende lannen opdûkte.
16:45
Controlroom op It Hearrenfean
De toetswiken op middelbere skoallen sjogge der yn coronatiid hiel oars út. By in skoalle op It Hearrenfean sjogge dosinten nei seis skermen, wêrop't se 49 learlingen yn de gaten hâlde. Se ha in echte controlroom.
16:38
Rutte; Basisskoallen iepen foar 8 febrewaris soe 'lyts wûnder' wêze
It soe in 'lyts wûnder' wêze as de basisskoallen en berneopfangsintra al foar acht febrewaris iepen kinne soene, sei premier Mark Rutte yn syn wyklikse parsekonferinsje. It kabinet moat earst de advizen fan saakkundigen dêroer ôfwachtsje, seit er.
Der rint no in ûndersyk nei de fersprieding fan de besmetlike Britske coronafariant by bern. Pas as dêr mear bekend oer is, soene de skoallen wer iepen kinne. De resultaten soene der foar 2 febrewaris wêze moatte.
It iepenjen fan de skoallen stiet heech op it winskelistje fan it kabinet. Rutte seit dat der earder "een klein openingetje" wie, dat it foar 8 febrewaris kinne soe, "maar die hoop wil ik echt niet wekken."
15:46
Alle Fryske húsdokters krije moarn faksinaasje tsjin coronafirus
Alle Fryske húsdokters krije moarn in corona-faksinaasje yn it MCL yn Ljouwert. It is in grutte logistike operaasje foar it sikehûs omdat it giet om sawat fjouwerhûndert minsken.
Om njoggen oere moarns begjint it faksinearjen en der is in strak skema om sa folle mooglik op ien dei prikke te kinnen. Húsdokters dy't moarn net kinne, wurde moandeitemoarn faksinearre.
15:40
Organisaasje: dit jier gjin Slachtemaraton
De Slachtemarathon wurdt dit jier net holden. Dat hat de organisaasje fan de maraton besletten. Oanlieding dêrfoar is de ûnwissens oer de ûntwikkeling fan it coronafirus. Der wie earst noch sprake fan om dit jier noch in maraton te hâlden, om't it evenemint yn 2020 al net trochgean koe, mar ek dêr sjocht de organisaasje fan ôf.
15:19
RIVM: Sân nije stjergefallen, tal besmettingen boppe trochsneed
Yn Fryslân binne yn de ôfrûne 24 oeren 234 nije coronabesmettingen fêststeld. Dat meldt it RIVM. It gemiddelde tal besmettingen dat de ôfrûne wike meld wurd, is 222.
Yn Fryslân binne yn de ôfrûne 24 oeren sân stjergefallen meld as gefolch fan it coronafirus, dat giet om ynwenners fan Noardeast-Fryslân (2), Achtkarspelen, Smellingerlân, Weststellingwerf, Eaststellingwerf en Waadhoeke.
15:10
Metaalstaking moandei 'oars as oars' fanwege corona
Meiwurkers fan de metalelektro yn Fryslân lizze moandei it wurk foar 24 oeren del. Der sil op in spesjale wize staakt wurde yn ferbân mei corona. Sa sille der gjin groepen minsken by elkoar komme. De stakers kinne harren ynskriuwe by it kantoar fan de FNV yn Ljouwert. Dat fynt plak oan de hân fan seneamde stakersstrjitten. De stakers kinne mei de auto troch in spesjale strjitte ride en harren stakingsformulier ôfjaan en dan wer fuortride.
14:43
Minister: Kâns hiel lyts dat ferkiezings útsteld wurde
De kâns dat de ferkiezings útsteld wurde, is hiel lyts, seit minister Kajsa Ollongren fan Ynlânske Saken. "Ik kan niets garanderen, maar we zetten alles op alles dat het wel door kan gaan". In oantal gemeenten hat grutte soargen oer de strange maatregels dy't yn maart mooglik noch jilde fanwege de Britske coronafariant, mar neffens de Vereniging van Nederlandse Gemeenten (VNG) kinne de ferkiezings net útsteld wurde.
Hoewol't der yn Nederlân no stranhe maatregels jilde, mei in lockdown en in jûnsklok, kinne minskek gewoan stimme, seit de minister. "Je kan immers ook gewoon naar de supermarkt", seit se. "Ik snap dat het gek voelt, maar dit is wel een vitaal proces. Namelijk voor onze democratie."
14:04
Bussen ride jûns troch
Treinen, trams en bussen ride jûns gewoan troch, ek as der aanst nei 21.00 oere net ien mear op strjitte wêze mei. Dat seit steatssekretaris Stientje van Veldhoven fan Ynfrastruktuer.
Yn prinsipe giet de tsjinstregeling gewoan troch. As in ferdierder wol ôfskale wol, min dat yn oerlis mei de autoriteit dy't ferantwurdlik is foar it iepenbier ferfier, bygelyks de provinsje of de gemeente.
"Het ov is er juist voor de mensen die ervan afhankelijk zijn, omdat ze bijvoorbeeld in de zorg of in de dienstverlening, bevoorrading aan de slag moeten blijven", seit Van Veldhoven.
13:51
Doeksen: Plysje kin op fearboat jûnsklok hanthavenje
Rederij Doeksen past de tsjinstregeling net oan, nei oanlieding fan de jûnsklok. Passazjiers moatte wol in ferklearring ha, as se mei de lette boat nei Skylge farre. Dêr kin de plysje op kontrolearje, ek oan board. Dat meldt de rederij. De kontrôle kin ek nei oankomst wêze.
13:38
Gjin ferplichte 'sneltest' foar Antillen en oare 'feilige lannen'
Minsken dy't fanút de Antillen mei it fleantúch nei Nederlân komme, wurde net ferplichte in 'sneltest' te dwaan om te sjen oft se it coronafirus ha. Dat meldt de oerheid. It belsút jildt ek foar njoggen oare lannen.
It giet om Aruba, Bonêre, Curaçao, Sint-Maarten, Saba, Sint-Eustatius, IIslân, Australië, Japan, Nii-Seelân, Rwanda, Singapore, Súd-Koreä, Tailân en Sina. Cat binne ke de lannen dêr't gjin PCR-testferplichting foar jildt.
It is net dúdlik oft de frijstelling betsjut dat de KLM op dizze lannen fleanen bliuwt.
13:32
Supermerken moatte ticht om 20:45 oere
Supermerken moatte om 20:45 oere de doarren slute. Dat is in kertier foardat de jûnsklok yngiet. Klanten ha it dan noch 15 minuten oan tiid om thús te kommen.
Earder melde de regearing dat supermerken om 20:15 oere ticht moatte soene. Doe waard der noch tocht oan in jûnsklok dy't om 20:30 oere begjinne soe.
Supermerken binne bliid mei de definitive foarm fan de jûnsklok. Benammen de sekerheid dat de defoarrieding trochgean kin is goed nijs, sizze se. Dat giet it ûnder oare om de fulploegen yn de winkels en de wurksumheden yn de distribusjesintra.
13:05
Faksinaasje 85-plussers nije wike yn WTC
It faksinearjen fan 85-plussers kin takom wike earder begjinne as pland. Lanlik is ôfpraat dat dêrfoar it Pfizer-faksin brûkt wurdt, dat foar soarchmeiwurkers bedoeld wie dy't noch gjin ôfspraak hiene. Dy groep krijt it Astrazenica-faksin, sadree't dat beskikber is.
It prikken fan de thúswenjende âlderein dy't mobyl is, bart by de GGD-faksinaasjelokaasje yn Ljouwert en jout fuortendaalks beskerming tsjin it coronafirus. De twadde prip krije sy net nei twa wiken, mar nei fiif wiken. Tsjin dy tiid is nei ferwachting wer in nije Pfizer-faksin beskikber. Hjirtroch binne safolle mooglik âlderein sa rap as mooglik beskerme.
12:12
Coronabesmettings nimme yn Fryslân net ôf
Dêr't yn de rest fan Nederlân de oantallen coronabesmettings ôf lykje te nimmen, bliuwe dy yn Fryslân opfallend heech. Neffens GGD Fryslân is it goed mooglik dat de besmetliker Britske fariant fan it firus dêryn in rol spilet.
De sûnenstsjinst merkt ek dat minsken it dreech fine om thús te wurkjen: der hawwe ferskate grutte útbraken west by bedriuwen. Ut in enkête yn opdracht fan it RIVM docht neffens GGD Fryslân bliken dat net alle Friezen har oan de coronamaatregels hâlde.
12:06
Brief wurkjouwer gjin alternatyf foar ferklearring jûnsklok
Minsken dy't foar it wurk nei bûten moatte as de jûnsklok fan krêft is, moatte dêr de wurkjouwersferklearring brûke dy't op de webside fan de Ryksoerheid te finen is. In ûndertekene brief fan de wurkjouwer is net jildich, meldt in wurdfierder fan it ministearje fan Justysje.
It foarnimmen om in junsklok yn te fieren waard woansdei bekendmakke. Mar pas juster gong de Keamer akkoart, nei in lang debat. Om tusken 21.00 en 04.30 oere de strjitte op te meien, moatte minsken twa ferklearringen ha: In eigen ferklearring en in wurkjouwersferklearring. Beide modelferklearringen ferskynden pas nei it debat online.
Guon wurkjouwers namen al earder inisjatyf, en stjoerden wurknimmers in ferklearring dy't se sels opsteld hiene. Dy is dus net jildich, beklammet de wurdfierder.
11:57
LC: Jûnsklokformulier komt der ek yn it Frysk
It formulier foar de nije jûnklok komt der ek yn it Frysk. Dat meldt de Ljouwerter Krante. It formulier wie wol yn alve oare talen beskikber. It giet om it formulier dat minsken by har ha moatte, as se jûns foar driuwende saken de doar út moatte.
De provinsje hat by Den Haag oan de belle lutsen, op oantrunen fan FNP'er Sijbe Knol. Dy is der bliid mei, dat der no ek in Frysk formulier is. "Mar dit moat systematysk oars, dêr", seit er.
11:54
Gemeenten: Ferkiezingen moatte 'hoe dan ek' trochgean
It is te let om de parlemintsferkiezingen út te stellen, want der is al tefolle yn gong set. Dat seit de Vereniging van Nederlandse Gemeenten (VNG). Gemeenten ha ekstra maatregels naam om de Twadde Keamerferkiezingen feilich ferrinne litte te kinne. Sa binne der ekstra lokaasjes socht dêr't genôch ôfstân holden wurde kin.
Foar de feilichheid kinne kiezers al twa dagen foar de ferkiezingsdei fan 17 maart stimme.
11:41
Nije resesje hast wis
It oanskerpen en ferlingen fan de lockdowns yn de Europeeske lannen hat soarge foar fierdere krimp yn de tsjinstesektor. Under oare de hoareka en de winkels falle yn dy kategory. Dêrtroch is it hast wis dat der in nije resesje komt yn de eurozone, seit haadekonoom Chris Williamson van it Britske ûndersyksburo Marikt.
"Een dubbele dip voor de economie van de eurozone lijkt steeds onvermijdelijker. De productie daalde in januari verder, met name door de verslechterde omstandigheden in de dienstensector", seit Williamson.
11:26
Oantal coronapasjinten yn Fryske sikehûzen nimt net fierder ôf
Neffens de lêste sifers fan de sikehûzen binne der yn Fryslân 70 coronapasjinten opnaam, 25 dêrfan lizze op in IC. Sûnt acht jannewaris gong it oantal pasinten stadich omleech. Doe leine der mear as 100 pasjinten yn de Fryske sikehûzen. It oantal coronapasjinten dat hjoed meld is, is ûngefear likeheech as it oantal dat twa dagen lyn meld waard. Dat wiene der 69.
De sikehûzen melde dat de sifers 'bijzonder dynamisch' binne. Se binne moarns metten. Middeis binne de getallen soms alwer oars. Dat kin fan oere oant oere feroarje.
11:14
Gjin jûnsklok foar betelle fuotbal
De jûnswedstriden yn it betelle fuotbal wurde net ferskood, no't der aanst in jûnsklok jildt. Sportbûnen meie sels bepale oft se dat dogge. Neffens de KNVB ha miljoenen minsken belangstelling foar it fuotbal.
"Daarmee amuseert het dus veel mensen die in de avond thuis (moeten) zitten. Wie doe je een plezier met middagwedstrijden?", seit in wurdfierder fan de KNVB. "Ook inspireert het de jeugd om te blijven bewegen en sporten binnen de coronabeperkingen, wat een positieve invloed heeft op de volksgezondheid, op korte en lange termijn."
10:40
Streekomrop Noardeast-Fryslân past radioprogrammearring oan fanwege jûnsklok
De streekomrop RTV NOF past de radioprogrammearring oan fanwege de jûnsklok. Fan moarn ôf binne der nei acht oere jûns gjin live-programma's mear te hearren. "Hiermee geven wij onze programmamakers de tijd om na hun programma voor de avondklok tijdig naar huis te kunnen gaan", meldt it bestjooer op de webside fan de omrop.
De programmearring fan Omop Fryslân bliuwt yn stân. Yn Ljouwert wurde nei acht oere jûns gjin rjochtstreekse radioprogramma's makke.
09:40
Cash foar Covid: Britske regearing soe minsken betelje wolle, nei in positive test
De Britske autoriteiten tinke deroer minsken te beteljen as se posityf teste op it coronafirus. It soe gean om in bedrach fan 500 pûn (562 euro). It plan moat minsken derta oansette in test dwaan te litten, as se klachten ha.
Der soene in protte minsken wêze dy't har no net teste litte, fanwege de finansjele gefolgen fan selsisolaasje. It plan wurdt troch in krante omskreaun as 'cash for covid'. De regearing soe ek beslute kinne om allinne minsken jild te jaan, dy't net fanút hûs wurkje kinne. Dat kostet minder.
09:35
Unrêst wurdt grutter: Krante skriuwt dat Spelen net troch geane, premier ûntkent
It trochgean fan de Olympyske Spelen yn Japan, sneon oer presys in healjier, wurdt alle dagen skerper yn twifel lutsen. Neffens de Britske kwaliteitskrante The Times is der yn Japan al in beslút naam: it giet net troch.
"De Japanse regering heeft achter gesloten deuren de conclusie getrokken dat de Olympische Spelen in Tokio vanwege het coronavirus afgelast moeten worden", seit in lid fan de Japanske regearingskoälysje tsjin The Times.
It IOC hâld fêst oan de ynsleine koers. "Op dit moment hebben we geen reden om te geloven dat de Spelen van Tokio niet op 23 juli geopend zullen worden in het Olympisch Stadion", seit IOC-foarsitter Thomas Bach tsjin it Japanske parseburo Kyodo News. "Daarom hebben we ook geen plan-B. We zijn vastbesloten om deze Spelen veilig en succesvol te maken."
08:11
OMT bepraat opsjes foar bettere mûlmaskers soarchpersoniel
It Outbreak Management Team (OMT) bepraat freed de mooglikheden om soarchpersoniel te foarsjen fan better beskermjende mûlmaskers. Soarchfakbûnen hawwe dêrta in fersyk yntsjinne. Se fine dat meiwurkers út de sektor standert previntyf gebrûk meitsje kinne moatte fan saneamde FFP2-maskers.
De bûnen CNV, FNV, NU'91 en V&VN pleitsje foar oanskerping fan de RIVM-rjochtline oer mûlmaskers. Yn de soarch binne no sjirurgyske maskers yn de measte gefallen standert. De bettere FFP2-maskers wurde allinnich oanret foar 'heech-risikobehannelings' by coronapasjinten en minsken fan wa't tocht wurdt dat se it firus ûnder de lea hawwe.
Wat de bûnen oanbelanget, moatte FFP2-maskers standert wurde foar alle soarchmeiwurkers dy't te krijen hawwe mei coronapasjinten, "ongeacht de setting en de handelingen die uitgevoerd worden".
Beskikberens is neffens de soarchbûnen gjin probleem. "FFP2-maskers zijn in voldoende mate aanwezig in Nederland om in de komende maanden te voldoen aan de toegenomen vraag die op een wijziging van de richtlijn door het RIVM zal volgen", stelle sy.
07:45
Nederlânske ynvestearrings yn novimber opnij omleech
Nederlânske bedriuwen hawwe yn novimber fanwegen de coronakrisis opnij minder ynvestearrings dien, meldt it Centraal Bureau voor de Statistiek (CBS). Benammen yn auto's en oare ferfiermiddels waard minder jild stutsen.
De ynvestearrings kamen 2,8 persint leger út as yn novimber 2019. Dêrmei wie it de achtste moanne op rige dat der minder ynvestearre waard yn ferliking mei in jier earder.
07:02
Ynspeksje: eintoets op basisskoalle moat trochgean
De eintoets op basisskoallen moet dit jier hoe dan ek trochgean - nettsjinsteande corona. De Onderwijsinspectie warskôget yn it AD: giet de toets foar it twadde opfolgjende jier net troch, dan witte we net hoe bot de ûnderwiisachterstân fan bern is. "Dan verliezen we zicht."
As de eintoets ôfnaam wurdt, kinne de skoares leger wêze as yn normale, coronafrije jierren. Ynspekteur-generaal Alida Oppers fan de Onderwijsinspectie ferwachtet net oars. "Het onderwijs is dan al een jaar niet optimaal geweest." Mar dat is gjin reden om te toets te skrassen, fynt Oppers. "Dan wéét je in elk geval hoe de leerlingen en het onderwijs ervoor staan."
Ek âlden wolle dat de eintoets dit jier wól trochgiet. Ek yn dizze krisistiid biedt de eintoets - ferplicht foar alle learlingen fan groep 8 - weardefolle en objektive ynformaasje, fynt Oppers. "Door de resultaten weten we straks waar de lacunes zitten: waar schort het aan en wat kun je er - misschien nog voor de zomervakantie - aan doen?"
06:43
2,3 miljoen Nederlanners al beskerme tsjin corona
Ien op de acht Nederlanners hat yntusken antystoffen tsjin corona. Ut ûndersyk fan bloedbank Sanquin ûnder tûzenen bloeddonoaren docht bliken dat foarige wike by 13 persint fan harren spoaren fan in trochmakke corona-ynfeksje oantroffen binne, skriuwt de Volkskrant.
Dat soe betsjutte dat no hast 2,3 miljoen minsken natuerlike ymmuniteit tsjin it coronafirus ûntwikkele hawwe. Harren antystoffen soargje foar langduorjende beskerming.
Ymmúngeheugen
Sanquin-ûndersikers folgje sûnt de maitiid fan foarich jier in groep fan hast 600 (âld-)corona-ynfektearden en nei acht moannen wiene by praktysk eltsenien noch antystoffen yn it bloed trasearber, seit dokter-mikrobiolooch Hans Zaaijer. Ék it type antystof dat soarget foar beskerming op lange termyn.
Dy befinings binne yn line mei de ynternasjonale stúdzjes dy't útwize dat it ymmúngeheugen fan eardere coronapasjinten minstens seis oant acht moannen stânhâldt.
06:39
Ofrûne wike minder stjergefallen, mar bliuwt heech
Hoewol't fanwege it coronafirus noch hieltyd mear minsken ferstjerre as normaal, naam it oantal stjergefallen ôfrûne wike ôf. Dy delgong wie ek te sjen by kwetsbere groepen, nammentlik âlderein en minsken dy't langduorjende soarch krigen. Dat meldt it Centraal Bureau voor de Statistiek (CBS).
Foarige wiken ferstoaren nei skatting 3.850 minsken, 500 mear as normaal yn dizze tiid fan it jier. De statistisy hawwe dat ynskat op basis fan stjertesifers yn foargeande jierren en demografyske trends. Oant no ta binne yn de twadde weach hast 9.000 mear minsken ferstoarn as gebrûklik.
It stjertesifer fan minsken ûnder de 65 jier wie foarige wike net heger as normaal. By minsken fan dy leeftyd wol, krekt as de minsken dy't soarch ûntfongen yn it ramt fan de Wet langdurige zorg. Mar ek yn dizze groepen naam it oantal stjergefallen ôf.
06:27
Ernst Kuipers: it prikken moat rapper
No't it kabinet besletten hat om it setten fan in twadde coronaprik nei seis wiken ta te stean yn stee fan trije, moat de faksinaasjekampanje rapper. Dêrfoar pleitet Ernst Kuipers, foarsitter fan it Landelijk Netwerk Acute Zorg, by Jinek.
Yn de faksinaasjestrategy wurdt no noch rekken hâlden mei it achterhâlden fan faksins foar de twadde prik dy't nedich is om sa goed as mooglik beskerme te wêzen tsjin it coronafirus, leit Kuipers út. Ek wurde de prikken oer in perioade útsmard sadat se oanslute by nije leverings fan de faksins. Mar dat moat wat him oanbelanget feroarje.
"Het is een beetje de situatie van nood breekt wet", seit Kuipers. "Je moet nu prikken." Neffens him lizze der op it stuit 400.000 faksins yn Nederlân klear om brûkt te wurden en kinne der yn in wike sa'n 125.000 minsken faksinearre wurde. Hy lit witte dat de GGD'en, dy't foar it grutste part ferantwurdlik binne foar it faksinearjen, dêrby eventueel help krije kinne fan de sikehûzen. Kuipers neamt it risiko dat minsken rinne troch de twadde prik út te stellen "allemaal maar relatief".
06:22
Korpschef: Wa't regels brekt, krijt boete
"Daar waar mensen zich niet aan regels houden, zal de politie handhavend optreden. Als je moedwillig de regels overtreedt krijg je een boete", sei korpschef fan de Nationale Politie Henk van Essen tongersdeitejûn by Op1 yn reaksje op it ynfieren fan in jûnsklok yn Nederlân. Van Essen sei mei klam dat 'de faze fan warskôgjen no achter ús leit'.
"Er wordt van ons verwacht dat we stevig handhaven. We zetten alles op alles om dat voor elkaar te krijgen", sei in wurdfierder fan de plysje woansdei al. Dy sei doe ek dat it oan de boargemasters is om te bepalen hoe't de plysje hanthavenje sil.
In wurdfierder fan it Veiligheidsberaad fan de 25 boargemasters dy't foarsitter binne fan in Veiligheidsregio koe tongersdei noch net ynhâldlik yngean op de konkrete ynfolling fan de hanthaving.
06:16
Kappers bot teloarsteld oer ekstra coronastipepakket
De kappers binne bot teloarsteld oer de ferromming fan it coronastipepakket fan it kabinet dat tongersdei bekend makke waard. "Er is geen geld beschikbaar gemaakt voor directe verlichting voor de zwaar getroffen kappersbranche", lit brânsjferiening ANKO witte. De organisaasje wol dat der direkte help komt foar kappers, lykas in foarskot.
"Het is de vraag of noodlijdende kappers nog in bedrijf zijn als deze steun eindelijk aangevraagd kan worden, laat staan als hij wordt uitgekeerd", seit ANKO. De reserves binne neffens de brânsjferiening by in soad kappers al opmakke yn de earste lockdown foarich jier. Dêrneist foelen neffens de organisaasje in soad kappers krekt bûten de boat by in oantal regelings en koene se hast net knippe yn de wichtige desimbermoanne.
06:00
Yn ferhâlding fierwei de measte besmettingen yn Achtkarspelen
Der binne de ôfrûne sân dagen yn Fryslân 1.592 coronabesmettingen fêststeld. Dat binne krekt wat mear as ferline wike, doe wiene it der 1.529. Yn de gemeente Achtkarspelen binne yn ferhâlding fierwei de measte besmettingen. Dat komt noch hieltyd mei troch de útbraak yn soarchsintrum 't Suyderhuys.