Kok pleatst har mei twadde tiid yn Thialf ea foar WK, ek Schulting pakt ticket op 500 meter

27 des 2020 - 16:39

Femke Kok fan Nij Beets en Suzanne Schulting fan It Hearrenfean ha harren sneintemiddei op de 500 meter pleatst foar it WK ôfstannen en de twa wrâldbekers. Michelle de Jong fan Rottum kaam tekoart foar de WK-tickets, mar pleatste har wol foar de wrâldbekers.

Femke Kok, Suzanne Schulting en Michelle de Jong:

Wat stiet der op it programma en watfoar tickets binne der te ferdielen?

  • EK sprint (16-17 jannewaris): de earste twa oer in klassemint fan de 500 meter en de 1000 meter pleatse harren foar it EK allround. Jutta Leerdam en Hein Otterspeer ha harren op it NK Sprint al pleatst;
  • Twa World Cups (22-24 en 29-31 jannewaris): de bêste fiif op eltse ôfstân pleatse harren foar de wrâldbekers. Allinnich de 5000 meter foar de froulju en de 10.000 meter foar de manlju wurde net ferriden op de wrâldbekers;
  • WK ôfstannen (11-14 febrewaris): de bêste trije op eltse ôfstân pleatse harren foar it WK. Allinnich op de 1000 meter en 5000 meter by de manlju moat Nederlân op de wrâldbekers noch in tredde WK-ticket ôftwinge.

Alle wedstriden wurde yn it Thialfstadion holden.

Foto: Orange Pictures

De 500 meter gie oer twa ritten, wêrby't allinnich de fluchste tiid telt. Kok wie nei har earste rit eins al wis in WK-ticket. De 20-jierrige reedrydster ried in persoanlik rekôr fan 37,08. Dat is mar twa hûndertsten boppe it nasjonale rekôr út 2013 fan Thijsje Oenema, dat riden waard op heechlân yn Salt Lake City. Yn har twadde rit kaam Kok dêr mei 37,36 net mear yn de buert.

Michelle de Jong stie nei de earste rit mei in persoanlik rekôr fan 37,79 op it tredde plak. Foar Schulting (9e yn 38,31) en Marrit Fledderus (8e yn 38,30) wie der yn de twadde rit noch wurk oan de winkel.

Schulting revansearret har

Yn de twadde rit wie Schulting in hiel stik flugger. Se ferbettere har persoanlik rekôr, dat noch mar sa âld wie as har earste rit, nei 37,71. Dêrmei kaam se op it tredde plakje telâne. Dat wie dan wer yn it neidiel fan Michelle de Jong, dy't har tiid yn de twadde rit net ferbettere koe.

Fledderus ferbettere harsels noch wol, mar mei 38,05 wie dat net genôch om har te pleatsen. Ek Marijke Groenewoud fan Hallum, Helga Drost fan Akkrum, Janine Smit fan It Hearrenfean en Letitia de Jong fan Feanwâlden koene harren net kwalifisearje foar de ynternasjonale toernoaien.

Snelste 500 meters

1. Femke Kok 37,08
2. Jutta Leerdam 37,24
3. Suzanne Schulting 37,71
4. Michelle de Jong 37,79
5. Dione Voskamp 37,93
7. Marrit Fledderus 38,05
11. Janine Smit 38,21
12. Helga Drost 38,43
13. Marijke Groenewoud 38,57
18. Letitia de Jong 38,93
(Advertinsje)
(Advertinsje)