Antoinette de Jong en Ireen Wüst pakke WK-tickets op 1.500 meter

26 des 2020 - 14:05

Antoinette de Jong fan Rottum en Ireen Wüst fan It Hearrenfean hawwe harren op it kwalifkaasjetoernoai yn Thialf pleatst foar it WK ôfstannen en de twa wrâldbekerwedstriden. De Jong sette de rapste tiid del mei 1.54,28, wylst Wüst yn 1.54,98 as twadde oer de finish kaam. It lêste startplak foar it WK gie nei Melissa Wijfje.

Wat stiet der op it programma en watfoar tickets binne der te ferdielen?

  • EK allround (16-17 jannewaris): de earste twa reedriders oer in klassemint fan de 1500 meter en de 3000 meter by de froulju en de 5000 meter by de manlju pleatse harren foar it EK allround. Antoinette de Jong en Patrick Roest ha harren op it NK Allround al pleatst;
  • Twa World Cups (22-24 en 29-31 jannewaris): de bêste fiif op eltse ôfstân pleatse harren foar de wrâldbekers. Allinnich de 5000 meter foar de froulju en de 10.000 meter foar de manlju wurde net ferriden op de wrâldbekers;
  • WK ôfstannen (11-14 febrewaris): de bêste trije op eltse ôfstân pleatse harren foar it WK. Allinnich op de 1000 meter en 5000 meter by de manlju moat Nederlân op de wrâldbekers noch in tredde WK-ticket ôftwinge.

Neist WK-tickets wiene der yn Thialf dus ek wrâldbeker-startplakken te ferdielen. Irene Schouten (1.55,70) en Jorien ter Mors (1.56,10), dy't tsjintwurdich yn Aldeberkeap wennet, giene der mei dy oerbleaune tickets fantroch.

Myrthe de Boer fan Skarsterbrêge (19e yn 2.00,31), Reina Anema fan De Gordyk (8e yn 1.56,97) en Marijke Groenewoud fan Hallum (7e yn 1.56,85) kamen tekoart foar de tickets foar de ynternasjonale wedstriden.

De froulju ride op snein de 3.000 meter. Dan wurdt bekend hokker froulju harren, neist De Jong, pleatse foar it EK allround.

Utslach 1500 meter froulju

1. Antoinette de Jong 1.54,28
2. Ireen Wüst 1.54,98
3. Melissa Wijfje 1.55,37
4. Irene Schouten 1.55,70
5. Jorien ter Mors 1.56,10
7. Marijke Groenewoud 1.56,85 (PR)
8. Reina Anema 1.56,97
19. Myrthe de Boer 2.00,31 (PR)
(Advertinsje)
(Advertinsje)