Coronanijs fan 7 desimber: #coronavirus meast brûkte hashtag | Gjin ferromming maatregels

It tal coronapasjinten yn de sikehûzen nimt ynkoarten wer ta, is de ferwachting fan it Landelijk Netwerk Acute Zorg (LNAZ). Om't it tal besmettingen groeit, is ek te foarsjen dat it "ergens in de komende twee weken" wer drokker wurdt yn de sikehûzen, seit LNAZ-foarsitter Ernst Kuipers. "De aantallen gaan vrijwel zeker stijgen. Dat staat een versoepeling van de maatregelen in de weg."

Nei't it kabinet yn oktober de coronamaatregels oanskerpe, rûn it tal opnommen coronapasjinten wike efter wike werom. Ofrûne wike wie dy delgong wol in stik lytser as dêrfoar. En it tal besmettingen nimt alwer seis dagen op rige ta.

"Versoepelingen zitten er op deze manier niet in, hoezeer iedereen daar ook naar snakt", sei Kuipers by syn wyklikse parsekonferinsje. De soarch foar coronapasjinten bliuwt in "stevige belasting" foar it sikehûspersoniel, ek mei de feestdagen.

Der binne de ôfrûne 24 oeren yn Fryslân 150 nije coronabesmettingen fêststeld. Dat binne fjirtjin mear as snein, doe wiene it 136. De lêste kear dat Fryslân mear as 150 besmettingen hie op in dei, wie op 26 oktober.

Yn Fryslân binne it ôfrûne etmiel twa minsken stoarn oan corona, yn de gemeenten Smellingerlân en De Fryske Marren.

Yn de twadde coronaweach ite de measte Nederlanners net oars as oars. In diel seit sûner te iten (9%) en in diel minder sûn (5%).

Mear ferliedingen thús om net sûne dingen te iten wurdt dêrfoar as reden neamd, ek mear ytmominten, mear stress en ferfeling.

Twa meiwurkers fan Revalidatie Friesland binne dit wykein posityf test op it coronafirus. Sy sitte op it stuit yn thúsisolaasje. Ut foarsoarch geane de ôfdielingen dêr't sy wurken yn karantêne oant takom snein. De reguliere soarch en de opnamen fan nije pasjinten geane gewoan troch.

Doe't dúdlik wie dat de meiwurkers besmet wiene, is it kontaktûndersyk úteinset. Dêrby wurdt sjoen mei hokker pasjinten en meiwurkers de twa besmette persoanen kontakt hân ha. Dat ûndersyk is noch net klear.

It refalidaasjesintrum sit yn Beetstersweach. Oare lokaasjes fan Revalidatie Friesland sitte yn Ljouwert, Snits, It Hearrenfean, Dokkum, Drachten, Harns, Emmeloord, Meppel en Steenwijk.

De leanen fan wurknimmers dy't ûnder in cao falle, geane no al minder hurd omheech troch de coronakrisis. Gewoanwei giet it al net hurd: as it goed giet mei de ekonomy, groeie de leanen mar hiel stadich mei. Giet it min, dan giet de leangroei stadich omleech. Mar bedriuwen sjogge no earder dat it swiere tiden binne, seit wurkjouwersorganisaasje AWVN tsjin de NOS.

Yn de cao's dy't foarich jier ôfsletten binne, gongen de ôfsprutsen leanen mei gemiddeld 2,8 prosint omheech. Dit jier is dat yn trochsneed oant no ta 2,5 prosint, de kommende moannen giet dat nei ferwachting fierder omleech.

"De economie draaide al jaren goed, maar werkenden profiteerden daar laat van", seit Zakaria Boufangacha fan fakbûn FNV. "Nu, sinds de coronacrisis, mogen werkenden als eerste de rekening betalen, als het aan de werkgevers ligt."

Neffens FNV misbrûke wurkjouwers de krisis om te besykjen de leanen te matigjen en wurkbetingsten minder goed te meitsjen, troch ûnregelmjittichheidstaslaggen te ferleegjen of te skrassen. Ek bedriuwen yn sektoaren dy't wol goed draaie, bygelyks supermerken of postbesoarging, ynvestearje neffens it fakbûn te min yn wurknimmers.

De AWVN is it dêr net mei iens: "Van verslechtering is absoluut geen sprake." Boppedat wurde der noch altyd cao's ôfsletten. "Blijkbaar worden de onderhandelaars van werkgevers en de vakbonden het toch eens. Dat duidt niet op misbruik."

De evenemintebrânsj wol de druk op de oerheid 'opfiere'. De sektor slacht alarm mei de aksje The Show Must Go On.

It Metropole Orkest hat it Queen-ferske mei deselde namme covere, yn gearwurking mei DI-RECT-sjonger Marcel Veenendaal en it ZO! Gospel Choir. De fideo is om 12.00 oere toand op de bûtenkant fan ferskate grutte evenemintelokaasjes. It ferske wie tagelyk te hearren op ferskate radiostjoerders.

De evenemintebrânsj hopet dat it kabinet no gau mear dúdlikheid jout oer it kommende evenemintejier. Boppedat wol de sektor graach 'testeveneminten' organisearje yn jannewaris.

Sa'n 85 prosint fan de minsken dy't wolris nei in festival giet, is ree om in negative test by de yngong sjen te litten. Dyselde groep seit him op syn gemak te fielen by bûtenfestivals. Dat seit festivalorganisator Apenkooi Events nei ûndersyk. Dat bedriuw organisearret ûnder oare festivals as DGTL, STRAF_WERK en Pleinvrees.

Goed 10.000 minsken is frege nei harren miening oer it festivalseizoen. Fan harren is 80 prosint fan doel om takom jier nei in evenemint te gean, 85 prosint is ree om in sneltest te dwaan en 92 prosint fynt it prima om dy resultaten te dielen mei de oerheid.

De webside fan de GGD Fryslân is wer yn de loft. Earder fan 'e moarn wie de pagina in pear oeren offline fanwegen in steuring.

Fuotbalbûn KNVB hat út namme fan de hast 3.000 amateurfuotbalklups it kabinet oproppen om de coronamaatregels minder strang te meitsjen. "Laat ons niet langer onnodig stilzitten", seit de Gordykster foarsitter fan it amateurfuotbal, Jan Dirk van der Zee. "Stilstand is achteruitgang, bewegen is gezond."

Om de oprop krêft by te setten, fierde de KNVB moandei aksje: op it Malieveld yn Den Haag waard mei sa'n tûzen shirts it wurd 'stil' foarme. "Wij willen dat volwassenen weer als team kunnen trainen. Veilig in de buitenlucht, met onderling 1,5 meter afstand en de kantines en kleedkamers dan nog even dicht", seit Van der Zee. "Laat jeugd lokaal wedstrijden spelen, een zogenoemde 'fietscompetitie'. Dat geeft ze weer een impuls om te blijven sporten terwijl de reisbewegingen minimaal blijven. We sluiten de ogen niet voor de coronacijfers, maar laten we ook kijken naar wat nu al wél veilig kan."

Seistûzen frijwilligers fan it Reade Krús krije hjoed in medalje foar har ynset yn de coronakrisis. "In het afgelopen jaar hebben zij zich vol overgave ingezet voor de bestrijding van het coronavirus en dat doen zij nog steeds", skriuwt it Reade Krús oer de frijwilligers. "Deze inzet is de grootste sinds de Tweede Wereldoorlog en de Watersnoodramp in 1953."

Direkteur Van Schaik fan it Reade Krús stiet stil by de grutte ympakt dy't de pandemy hân hat. "Velen hebben momenten van verdriet en eenzaamheid meegemaakt en ik ben er trots op en dankbaar voor dat wij als Rode Kruis hier en daar verlichting hebben kunnen bieden in deze voor velen zware periode."

De webside fan GGD-Fryslân leit der op dit stuit út. Dit hat te krijen mei in technyske steuring. De GGD hopet dat se dizze ein fan de moarn oplost hawwe. Minsken dy't har oanmelde wolle foar in coronatest kinne dat dwaan op de side coronatest.nl of it telefoannûmer 0800-1202.

De 25 boargemasters fan de Veiligheidsregio krije fan 'e jûn yn Utrecht fan minister Ferd Grapperhaus te hearren hokker nije coronamaatregels it kabinet moarn oankundigje sil yn de parsekonferinsje. It giet dan benammen oer de ynfolling fan de feestdagen. De boargemasters sjogge sels foarút nei âldjiersdei en de hanthavening fan it fjoerwurkferbod.

It tal coronabesmettingen rint op, yn ús provinsje en lanlik. En dat wylst de feestdagen deroan komme en in soad minsken hoopje dat it kabinet moarn mei ferrommingen komt.

Dêr liket it alteast net op. In grut part fan it kabinet hat juster op it Catshûs mei saakkundigen oerlein oer de gong fan saken.

Der wurdt noch wol fierder praat mei de feestdagen en hoefolle gasten oft elkenien thús ûntfange mei. Ein novimber advisearre it Outbreak Management Team dat we de feestdagen yn húslike kring fiere moatte, mei bygelyks op syn meast seis gasten.

Dit is it liveblog fan moandei 7 desimber mei it lêste nijs oer it coronafirus yn Fryslân.