Coronanijs fan 14 novimber: 91 nije besmettingen en twa stjergefallen | Boa's hawwe hannen fol

14 nov 2020 - 22:56
23:00
Ein fan dit liveblog

We slute it liveblog. Tank foar it folgjen. Snein is der wer in nij liveblog.

21:24
Boa's hawwe hannen fol oan hanthavening coronamaatregels yn sintrum Ljouwert

De boa's (bûtengewoan opspoaringsamtners) hawwe it dit jier ekstra drok fanwegen de coronakrisis. Yn de iepenbiere romte moatte se tafersjoch hâlde op it neilibjen fan de coronamaatregels. Sa kontrolearje se bygelyks oft groepen net te grut binne. In útdaging yn dizze drokke dagen, bygelyks yn de binnenstêd fan Ljouwert. "We krije somtiden fan alles oer ús hinne", seit boa Tjibbe-Geert Hoekstra.

17:37
Viruswaarheid spant koart pleit oan tsjin steat

Viruswaarheid spant in koart pleit oan tsjin de Nederlânske Steat dêr't se in ein yn easkje aon de "massale coronatestcampagne". Neffens de aksjegroep is de brûkte PCR-test net geskikt om fêst te stellen oft ien ynfektearre is mei it coronafirus. "De bijsluiter van deze PCR-testen vermeldt uitdrukkelijk dat een positieve test niet betekent dat iemand drager is van het virus. Het gebruik van de test voor dit doel is bovendien niet goedgekeurd door de Europese Unie", seit de groep.

Neffens Viruswaarheid brûkt de oerheid dizze útslaggen om de coronamaatregels te rjochtfeardigjen. "In de 'Routekaart Coronamaatregelen' is het aantal positieve testen per 100.000 inwoners direct gekoppeld aan het op- en afschalen van maatregelen. Het coronabeleid is gebaseerd op drijfzand. Het kabinet rechtvaardigt de maatregelen op een voor dat doel ongeschikte test. Dat is onrechtmatig", seit Jeroen Pols fan Viruswaarheid.

'Panykkommunikaasje'

Neffens Pols moat de oerheid har kommunikaasje drastysk feroarje. "De overheid maakt zich schuldig aan paniekcommunicatie. Door dagelijks over aantallen positieve testen te communiceren als 'besmettingen' of 'patiënten', is sprake van misleiding. Veel mensen denken ten onrechte dat corona een reële bedreiging voor hen vormt. De bevolking zou nooit instemmen met vergaande grondrechtinperkingen indien zij juiste en complete informatie ontvangt."

Viruswaarheid sommearret minister De Jonge fan Folkssûnens om it belied net langer te basearjen op in ferkearde ynterpretaasje fan PCR-útslaggen en de kommunikaasje oan te passen.

It koart pleit tsjinnet 25 novimber 2020 foar de rjochtbank yn Den Haag.

16:25
Plysje sprekt swarte piten yn Drachten oan op coronamaatregels

In groep fan tsien swarte piten is sneontemiddei yn it sintrum oansprutsen troch de plysje fanwege de jildende coronamaatregels. De swarte piten joegen bern kado's en pipernuten en hiene dêrby muzyk oan.

In swarte pyt wurdt oansprutsen troch de plysje yn Drachten - Foto: SrFotografie
15:45
Frysk foarjierskonkoers skrast

It Frysk foarjierskonkoers dat pland stie foar 13 maart 2021 yn De Lawei yn Drachten giet net troch. Dat hat de Organisatie van Muziekverenigingen bekend makke.

Fiif fan de njoggen muzykferienings seagen it net sitten om it evenemint trochgean te litten. Twa oare ferienings woene noch oant jannewaris wachtsje mei in beslút. Mar twa ferienings woene wol meidwaan oan it konkoers. De oerkoepeljende organisaasje hat op grûn dêrfan besletten it konkoers oergean te litten.

Oare muzykfederaasjes, bygelyks dy fan Gelderlân-Flevolân, hâlde fan 't maitiid ek gjin konkoers yn ferbân mei it coronafirus.

15:17
Tal coronapasjinten op ic ôfnaam

Yn Nederlânske sikehuzen lizze sneon 56 coronapasjinten minder as op freed. It binne der yn totaal 2.125, dêrfan lizze 595 covid-pasjinten op de intensive care, 14 minder as freed. Dat docht bliken út de deistige sifers fan it Landelijk Coördinatiecentrum Patiënten Spreiding (LCPS).

It ôfrûne etmiel binne 35 pasjinten, wêrfan't seis ic-pasjinten, ferpleatst nei sikehuzen yn oare regio's.

14:53
Tal lanlike besmettingen foar it earst sûnt tiisdei omleech

It tal nije lanlike coronagefallen is foar it earst sûnt tiisdei omleech gien. Tusken freedtemoarn en sneontemoarn binne 5.941 positive testen registrearre.

It RIVM hie op freed 6.109 gefallen meld, mar dat is sneon bysteld ta 6.108. Op tongersdei waarden 5.651 nije gefallen meld, op woansdei 5.417 en op tiisdei 4.681.

It tal stjergefallen gie it ôfrûne etmiel omheech mei 86. Dat wol net sizze dat al dy minsken de ôfrûne 24 oer stoarn binne. De ynformaasje wurdt somtiden mei wat fertraging trochjûn. Tusken tongersdeitemoarn en freedtemoarn waarden 54 stjergefallen meld.

14:20
91 nije besmettingen konstatearre yn de ôfrûne 24 oeren

Der binne yn de ôfrûne 24 oeren 91 nije besmettingen mei it coronafirus fêststeld yn Fryslân. Dat binne der 5 minder as freed. De measte nije bestmettingen binne yn Súdwest-Fryslân konstatearre: 23. Dêrnei folgje Ljouwert (14), Noardeast-Fryslân (11) en Smellingerlân (10).

Fierder binne der twa minsken it sikehûs yn rekke yn Fryslân. Ek binne der twa minsken ferstoarn, yn Ljouwert en yn Súdwest-Fryslân.

11:55
Meiwurkers De Lawei oan de slach yn it sikehûs

Fjirtjin hoarekameiwurkers fan De Lawei yn Drachten sille oan it wurk yn sikehûs Nij Smellinghe. No't de skouboarch yn ferbân mei de coronamaatregels ticht is, sitte de meiwurkers sûnder wurk. Op inisjatyf fan Nij Smellinghe sille sy dêrom de hannen út de mouwen stekke yn it sikehûs.

It personiel wurdt ynset om net-soarchtaken fan soarchpersoniel oer te nimmen. Sa helpe se by it ûntfangen en begelieden fan besite en it delbringen fan iten en drinken by pasjinten (gjin coronapsjinten). "De schouwburg is dicht dus het is fijn dat wij nu hier kunnen ondersteunen", fertelt Marrick de Jong, ien fan de hoarekameiwurkers.

Stientsje bydrage

Nij Smellinghe hopet sa net allinnich de druk foar har eigen meiwurkers te ferminderjen, mar ek wat foar de hoarekameiwurkers betsjutte te kinnen. "We zijn blij dat we op deze manier ons steentje kunnen bijdragen tijdens de piek in de tweede golf", seit Alfred Matthijssen, haad bedriuwsfiering fan De Lawei.

9:13
"Set faksinaasjekampanje foar jongerein op"

Guon saakkundigen fine dat der in faksinaasjekampanje komme moat om jongerein te oertsjûgjen in coronaprik te heljen as dy beskikber komt. It RIVM soe dy mei in spesjale taskforce ûntwikkelje moatte, hat emeritus-heechlearaar Ronald de Groot tsjin De Telegraaf sein. Neffens him lit in part fan de jongerein mei harren hâlden en dragen sjen dat se corona net altyd like serieus nimme. Mar faksinaasje is ek yn it belang fan jongelju, seit firolooch Ab Osterhaus. Dat soe werom komme moatte yn de kampanje.

9:11
Sinteklaas komt wól oan yn Frjentsjer, mar de stêd is leech en kâld

Sinteklaas komt sneontemiddei wer oan yn Nederlân. Wêr't hy en de piten krekt mei de stoomboat nei ta farre is geheim: fanwegen it coronafirus mei der gjin publyk by wêze. It advys is: folgje de oankomst foar de telefyzje. Dat jildt net allinne foar de lanlike yntocht, mar ek foar lokale yntochten. Yn Frjentsjer is de yntocht fan Sinteklaas digitaal te folgjen yn in ôflevering fan Sinterklaasnieuws.

Foto: Stichting Sinterklaas Intocht Franeker
9:10
Fjoerwurkhanneler: "Ferbod is net te hanthavenjen"

It fjoerwurkferbod sil net foar minder drokte soargje yn de sikehuzen. Dat tinkt fjoerwurkhanneler Reinier de Graaf fan Langsweagen. Neffens him sil der troch it ferbod dit jier mear yllegaal fjoerwurk ferkocht wurde. En dat is faak swierder en gefaarliker as wat der yn de reguliere hannel ferkocht wurdt. Freed waard bekend dat it kabinet in fjoerwurkferbod ynfiert foar de kommende jierwiksel fanwege de corona-útbraak.

Fjoerwurk - Foto: Omrop Fryslân, Gerrit de Boer
9:00
Goeiemoarn!

Goeiemoarn en wolkom yn dit liveblog oer it coronafirus. It coronanijs fan freed weromlêze? Dat kin hjir.

Trefwurden: 
coronafirus COVID-19
(Advertinsje)
(Advertinsje)