Coronanijs tongersdei 5 novimber: Swimbaden hâlde petysje; Alvestêdehal bliuwt iepen

Fabrikanten fan snobbersguod ferwachtsje dit jier minder te ferkeapjen rûn Sint-Marten. Fanwegen de coronakrisis tinke sy dat minder minsken de doarren bydel sille, en om te foarkommen dat minsken dat al dogge ha guon bedriuwen besletten dit jier net te advertearjen.

Pipernutemakker Van Delft ferwachtet foaral yn it noarden minder taaiguod te ferkeapjen. "Vooral in het noorden van het land is het een traditioneel artikel met Sint Maarten", sa seit direkteur Oscar de Lange. It bedriuw tinkt sa'n tweintich persint minder te ferkeapjen.

Hoewol't optochten dit jier net tastien binne by Sint-Marten is it neffens de Veiligheidsregio Fryslân wol mooglik om mei de bern lâns de duorren te gean. De Veiligheidsregio hat hjiroer in tal maatregels opsteld. Bygelyks: hâld genôch ôfstân fan minsken yn de doariepening en haw begryp foar minsken dy't leaver net de doar iepen dogge.

Premier Mark Rutte en de minister-presidint fan de Dútske dielsteat Noordrijn-Westfalen, Armin Laschet, ha yn in ferklearring oproppen om net de Nederlânsk-Dútske grins oer te gean. "Nu het virus opnieuw hard toeslaat, roepen wij iedereen op om dicht bij huis te blijven. Reis dus niet de grens over als het niet strikt noodzakelijk is", sa sizze se.

It Nederlânske kabinet hat earder in negatyf reisadvys ôfjûn foar Dûtslân. Dat is noch oant jannewaris fan krêft.

Fuotbalferiening Friese Boys hat besletten alle aktiviteiten foar de jongerein foar in wike stil te lizzen. Dit nei oanlieding fan de corona-útbraak by basisskoalle de Stapstien yn Kollumersweach. Ofrûne wykein waard bekend dat der yn de boppebou fan de skoalle corona oantroffen is. Yntusken binne meardere learlingen posityf test op it firus.

De skoalle hat kontakt hân mei de GGD oer de situaasje. Der hoege gjin ekstra maatregels troffen te wurden. Mei om't de boarne fan de besmettings net op skoalle is, mar nei alle gedachten by in klupjûn fan de tsjerke. Klassen nei hûs stjoere of de skoalle slute is dan ek net oan de oarder. Eltsenien wurdt oproppen ekstra foarsichtich en alert te wêzen, ek by it heljen en bringen fan de bern by de skoalle.

De sikehûsbesetting giet al twa dagen op rige omleech. Neffens Ernst Kuipers fan it Landelijk Coördinatiecentrum Patiënten Spreiding (LCPS) is dat "uitstekend nieuws", mar gjin reden om de flagge út te hingjen. Der lizze op it stuit 2.512 coronapasjinten yn de Nederlânske sikehuzen, 60 minder as woansdei. Fan harren lizze der 1.905 yn de kliniken en 607 op de IC's. Woansdei wiene dat der noch 612.

Kuipers is tefreden: "We keken uit naar het bereiken van een plateau, maar er komen nog steeds veel patiënten per dag bij in de ziekenhuizen, ongeveer 280." Dat wol net sizze dat it de kommende dagen noch fierder omleech gean sil, mar it leit wol yn de line fan ferwachting.

Der is opnij in dosint op it Linde College yn Wolvegea besmet rekke mei it coronafirus. De learkrêft soe ôfrûne moandei noch lesjûn hawwe. De teller op de skoalle stiet dêrmei no op trije dosinten en fjouwer learlingen.

Alle fêstigings fan dbieb binne nei oanlieding fan de nije coronamaatregels oant 18 novimner sletten. Om har leden yn 'e mjitte te kommen, wreidet dbieb syn besoarchservice wer út foar al syn leden. Dy kinne op de webside fan dbieb in bestelformulier fine en dêryn oanjaan hokker boeken se thús ûntfange wolle.

De útlientermyn is mei fjouwer wiken ferlinge. Dêrneist kinne leden ek e-books lêze fia de Online Bibliotheekapp.

Alle prostitúsjeruten moatte fanwegen de nijste coronamaatregels yn elts gefal de kommende twa wiken ticht. De ruten mei de reade lampen falle ûnder it begryp seksynrjochting, krekt as seksklups, priveehuzen en eroatyske massaazjesalons. Dat stiet yn in taljochting fan de Ryksoerheid op de nije needferoardering dy't sûnt woansdeitejûn yn alle feilichheidsregio's jildt.

Op woansdei 11 novimber wurdt der in nije snelteststrjitte iepene yn Ljouwert. De testlokaasje, ûnder de neamer coronasneltest123, is sân dagen yn 'e wike iepen fan 7.00 oant 22.00 oere. Minsken dy't har teste litte wolle, kinne online in dei en tiidslot ynplanne. Nei it ôfnimmen fan de test krije se binnen 15 minuten de útslach yn in sms'ke. Der kin ek fuort in e-mail mei in sertifikaat fan in medysk spesjalist meistjoerd wurde.

De sneltests wurde útfierd troch Idfid International B.V, yn gearwurking mei de GGD. "We maken gebruik van de Roche SARS-CoV-2 Ag test, die is goedgekeurd door de overheid en het RIVM", seit Araun Pieneman fan Idfid International. Wêr't de teststrjitte krekt komt, is noch net bekend.

It lanlike tal coronapasjinten yn de sikehûzen is foar de twadde dei op rige weromrûn. Dat meldt it Landelijk Centrum voor Patiëntenspreiding. It binne der no 2.512, 60 minder as juster.

Dêrfan lizze der 607 op de intensive care, dat binne 5 minder as juster. Op de oare ôfdielingen lizze der 1.905, dat binne 55 minder as juster.

Nije Fryske sikehûssifers ferskine freedtemoarn.

Lanlik meldt it RIVM 6.996 nije besmettingen. Dat binne 650 minder as juster. It is lanlik de sechsde dei op rige dat it tal nije besmettingen weromrint.

It RIVM meldt hjoed 90 nije coronabesmettingen yn Fryslân. Juster wiene dat der 75.

De measte nije besmettingen binne meld yn de gemeente Ljouwert: 18. Dêrnei komme Súdwest-Frysân (12), Noardeast-Fryslân (11) en Hearrenfean (10).

Der binne twa nije stjergefallen meld, dat giet om twa ynwenners fan Súdwest-Fryslân. Ek ien ynwenner fan dy gemeente is yn it sikehûs opnaam.

Mocht it coronafitus taslaan yn soarchsintrum De Stelp op It Amelân, dan kin ferpleechhûs Anna Schotanus op It Hearrenfean as needlokaasje tsjinje. Dat senario hat soarchgroep Kwadrant opset. Der wurdt besocht bewenners safolle as mooglik op it eilân te hâlden. Allinne as it echt net mooglik is, komt in ferpleatsing nei It Hearrenfean yn byld.

Neffens ûndersyk fan de bank Knab wurde ûnder alle hoareka-ûndernimmers de eigeners fan kafees it meast rekke troch de coronamaatregels. Foar it ûndersyk binne de transaksjes fan 1.300 ûndernimmers ûndersocht. Yn trochsneed giene de ynkomsten mei 18 persint omleech,

It tal coronapasjinten yn it Noarden is echt oan it ôfnimmen, dat seit it Regionaal Overleg Acute Zorgketen (ROAZ). De situaasje soe oars wêze as yn oare parten fan it lân. De sikehûskapasiteit soe noch goed wêze, al is der ek yn it Noarden druk op de intensive care-kapasiteit.

Oant no ta binne der 247 pasjinten út oare regio's oernaam op ferpleechôfdielingen en 45 op intensive cares.

Fierder jout it ROAZ oan dat der no foar elts sikehûs apart de minimaal nedige kapasiteit bepaald is. Dat is yn 'e mande dien mei medysk regio-koördinatoaren en de Federatie Medisch Specialisten.

Farmaseut AstraZeneca ferwachtet noch hieltyd oan de ein fan dit jier de testresultaten fan in coronafaksin te presintearjen. It bedriuw is ien fan de farmaseuten dy't fier binne mei in middel tsjin it coronafirus.

Nederlân en ferskate oare Europeeske lannen ha al miljoenen doases reservearre by AstraZeneca.

De 35ste Nijjiersrevu op De Jouwer is fanwegen it coronafirus in jier útsteld. "We hebben er "in min sin" van," sa skriuwe de spilers fan de revu. "Toch zijn we blij dat we een flink aantal mooie repetitie-avonden met elkaar mochten beleven." It beslút is nommen fanwegen de strangere coronamaatregels.

De tredde edysje fan de Verhalenavond dy't opset is yn it Kulturele Haadstêdjier, kin dit jier fanwegen it coronafirus net trochgean. It tema fan de ferhalejûn dit jier soe 'it firus' wêze, mar yn stee dêrfan bringt Omrop Fryslân dizze wike de podcastrige 'It firus en ik'. Fiif dagen lang binne der persoanlike ferhalen te lêzen oer de gefolgen fan it coronafirus op soarchmeiwurkers of minsken dy't soarch krije. Dit is it fierde diel: Jelle Terwal, dy't prostaatkanker hat, fertelt oer de risiko-analyzen dy't hy makket.

De sealkuorbalkompetysje leit yn elts gefal oant heal desimber stil. It KNKV (Koninklijk Nederlands Korfbalverbond) hat yntusken in rûtekaart makke mei mooglike kompetysjes op ferskillende begjinpunten. By LDODK op De Gordyk binne op it stuit oanpaste trainingen en dêr wachtet de seleksje yn spanning op it sein fan it regear dat de amateursport wer los mei en de Kuorbal League úteinsette kin.

Sjoch hjir wat de opsjes binne:

Ek it Yr. D.F. Woudagemaal op De Lemmer is ticht de kommende wiken. Foar it Woudagemaal is dat spitich, om't 2020 in jubileumjier is. Op 7 oktober 1920 is it gemaal iepene, dêr soe dit jier wiidweidich by stilstien wurde.

Boargemaster Klaas Agricola fan Dantumadiel ropt ynwenners fan syn gemeente op om harren dochs goed oan de rjochtlinen te hâlden. In grut part fan de ynwenners dêr't corona by fêststeld is, is âlder as 60 jier. "We kunnen niemand missen. Pas goed op u zelf," sa skriuwt er.

Dit is it liveblog fan tongersdei 5 novimber mei it lêste nijs oer it coronafirus yn Fryslân. It nijs fan woansdei kinst hjir neilêze.