Liveblog
|
15 oktober 2020
Coronanijs fan 15 oktober: 195 nije coronabesmettings fêststeld yn Fryslân
Yn dit liveblog is it lêste nijs oer it coronafirus yn Fryslân te folgjen.
Lêst bywurke: 16 oktober 2020, 06:13
tongersdei 15 oktober 2020
23:00
Ein fan dit liveblog
Oant safier dit liveblog oer it coronafirus fan tongersdei 15 oktober 2020. Freedtemoarn binne wy der wer mei in nij liveblog. Elkenien tank foar it folgjen.
22:29
Gjin Sinteklaasyntocht yn Haulerwyk
De bern yn Haulerwyk moatte it dit jier sûnder yntocht fan Sinteklaas dwaan. Fanwege de ferskerpte coronamaatregels fynt de organisaasje it net ferantwurde om it evenemint trochgean te litten. Ek de Volkskerstzang en de lichtjesjûn yn it doarp binne skrast.
21:51
Stertil Survivalrun 2021 giet net troch
De Stertil Survivalrun dy't op 14 maart 2021 yn Koatstertille hâlden wurde soe, giet net troch fanwege corona. Neffens de organisaasje is der te folle ûnwissichheid en ûndúdlikheid oer wat der yn maart mooglik wêze sil en is it dêrom net ferantwurde om mei de tariedingen te begjinnen. Takom jier soe it 20-jierrich jubileum fan de survivalrun wêze.
20:39
Ljouwerter supermerk blokkearret tagong ta alkohoalyske dranken
20:05
CBR: Gjin mûlkapke ûnder rydles? Gjin eksamen
It Centraal Bureau Rijvaardigheidsbewijzen (CBR) stelt mûlkapkes ferplichte ûnder de rydlessen. It CBR nimt gjin eksamens mear ôf as learlingen en oplieders ûnder de rydles gjin mûlkapke op hân ha. De nije regel giet moandei 19 oktober yn.
De fraach oft der by de lessen in mûlkapje droegen is, wurdt opnommen yn de sûnenstsjek dy't elke kandidaat ynfolje moat foardat er eksamen docht. As in kandidaat net oan de regel foldocht, kin it eksamen útsteld wurde. It CBR nimt de maatregels nei eigen sizzen mei "unanieme steun van de rijschool-brancheverenigingen".
18:17
Boargemaster en húsdokters fan Skylge jouwe corona-update yn fideoboadskip
17:35
NOC*NSF wol dat alle topkompetysjes trochgean
Nei it beslút fan de minister fan Sport om de frouljusearedifyzje fan it fuotbal dochs trochgean te litten, wol NOC*NSF dat ek de topkompetysjes fan oare teamsporten trochgean moatte.
It giet dan om sporten sa as hânbal, hockey, follybal en basketbal. "Zo'n tien tot vijftien sporten", seit Gerard Dielessen, direkteur fan NOC*NSF. "Dat zal voor een deel echt wel te realiseren zijn."
17:20
Nije wurklikheid foar de supermerken
Wol of net de doarren ticht om 20.00 oere? It is in drege kar dy't supermerken meitsje moatte, no't se nei achten gjin alkohol mear ferkeapje meie. Dêrnjonken krije de klanten ek te meitsjen mei in mûlkapkeplicht en op 'e nij spesjale winkelmominten foar senioaren. Tongersdeitemoarn sette de nije wurklikheid útein foar de supermerken.
17:10
29 bewenners en 51 meiwurkers Fryske fersoargingshûzen besmet mei corona
Op dit stuit hawwe 29 bewenners en 51 meiwurkers fan Fryske fersoargingshûzen it coronafirus. Dat blykt út in rûnfraach fan Omrop Fryslân by seis soarchorganisaasjes del: Alliade, Patyna, Noorderbreedte, ZuidOostZorg, Kwadrantgroep en Hof en Hiem.
Mei 14 bewenners en 15 meiwurkers dy't op dit stuit besmet binne, hat Noorderbreedte de measte besmettingen.
17:00
Festival Explore the North giet net troch
Troch de maatregels fan tiisdei kin ek it Explore the North festival, dat pland stie foar 20 oant en mei 22 novimber, net plakhawwe.
Ek it programma yn De Westertsjerke yn Ljouwert en de ynnovaasjewike DORP ferfalle.
16:51
Wedstriidkalinders maratonriden oanpast
It reedrydbûn KNSB hat de wedstriidkalinders oanpast, yn ferbân mei de nije maatregels om it coronafirus under kontrôle te krijen. Allinne de wedstriden dêr't erkende topsporters oan meidogge, geane noch troch. De earste trije maratons op de kalinders binne yntusken skrast.
"By it maratonriden ride we mei in grutte groep minsken yn de rûnte, foar in langere tiid en ticht op inoar. En se komme ek nochris út it hiele lân. Dat binne allegear wol ferskillende aspekten byinoar, dy't wol risiko mei har meibringe", seit kompetysjelieder Willem Hut.
16:20
As it moat, slute wy de skoallen, seit de ûnderwiisminister
Arie Slob, minister fan ûnderwiis, seit dat lanlik de skoallen wer tichtgean as it fanwege de sûnens écht net oars kin. No bart it al dat in inkelde skoalle tichtgiet by in útbraak.
Op it stuit is der gjin reden om fan de hjoeddeistige line ôf te wiken, seit de minister. Neffens him kin de ûnderwiissektor it folhâlde as elk him op skoalle oan de maatregels hâldt.
15:10
Sikehuzen yn Noard Nederlân skale reguliere soarch ôf
De reguliere soarch yn Noard-Nederlân sil stadichoan ôfskaald wurde mei sa'n 20 persint. Hjirmei wurdt romte kreëarre foar de opfang fan coronapasjinten, sawol op de ic's as op de 'gewoane' ôfdieling. Wannear't it presys barre sil, is noch net dúdlik.
Op it stuit is de sikehûskapasiteit yn Noard-Nederlân noch tarikkend, foar pasjinten sawol út de regio en dêr bûten.
15:05
Nederlân freget Dútske sikehuzen wer pasjinten oer te nimmen
Nederlân freget Dútske sikehuzen opnij om help om de tanimmende stream coronapasjinten oan te kinnen. De ferwachting is dat freed of sneon de earste pasjinten nei Dútslân oerpleatst wurde. It Landelijk Coördinatiecentrum Patiënten Spreiding (LCPS) wol net wachtsje oant der yn de Nederlânske sikehuzen gjin kapasiteit mear is.
It LCPS tinkt dat gemiddeld yn Nederlân al sa'n 20 persint fan de reguliere soarch skrast is.
14:15
195 nije coronabesmettingen
Der binne de ôfrûne 24 oeren yn Fryslân 195 nije coronabesmettings by kaam. Dat meldt it RIVM. Dat binne der mear as woansdei; doe wiene it der 124. Allinnich moandei wie it oantal besmettings heger yn Fryslân yn ien dei: 294. Dat kaam benammen troch in administrative ynhelslach.
Ljouwert en Súdwest-Fryslân útsjitters
De measte nije coronagefallen waarden it ôfrûne etmiel fêststeld yn de gemeente Ljouwert. Dêr krigen 39 minsken in positive test werom. Yn Súdwest-Fryslân testen 37 minsken posityf op it firus. Yn De Fryske Marren wiene it der 21.
Yn de gemeenten Eaststellingwerf en Skylge binne de ôfrûne 24 oeren in persoan mei corona yn it sikehûs opnaam. Der is yn Fryslân sûnt tiisdei gjinien ferstoarn oan it firus.
Besjoch ús dossierside foar in folslein oersjoch fan de coronasifers yn Fryslân.
Coronabesmettings yn Fryslân yn de ôfrûne 24 oeren
Gemeente | Aantal besmettingen |
Achtkarspelen | 10 |
It Amelân | 1 |
Dantumadiel | 5 |
Eaststellingwerf | 9 |
Flylân | 0 |
De Fryske Marren | 21 |
Harns | 4 |
Hearrenfean | 14 |
Ljouwert | 39 |
Noardeast-Fryslân | 10 |
Opsterlân | 4 |
Skiermûntseach | 0 |
Skylge | 8 |
Smellingerlân | 11 |
Súdwest-Fryslân | 37 |
Tytsjerksteradiel | 8 |
Waadhoeke | 12 |
Weststellingwerf | 2 |
Totaal: | 195 |
14:05
Dit wykein gjin frouljusfuotbal
Yn de earedifyzje komme de froulju dit wykein net yn aksje. De fuotbalwedstriden dy't foar freed en snein pland stiene, wurde ferpleatst nei it wykein fan 30 oktober oant 1 novimber.
Nei de strangere coronamaatregelen fan ôfrûne tiisdei, like it derop dat de earedifyzje stillein wurde soe. De heechste difyzje fan it frouljusfuotbal heart neffens de KNVB net by it proffuotbal, mar by it amateurfuotbal, en amateursportkompetysjes lizze sûnt tiisdei stil. Minister Van Ark fan Sport sei lykwols woansdei dat de frouljuskompetysje deselde útsûnderingsposysje krije moast as it betelle manljusfuotbal.
De noch te ferkrijen goedkarring fan it protokol en alle praktyske útwurkingen dy't troch de klups en de KNVB dien wurde moatte, meitsje it ûnmooglik om kommend wykein al te spyljen. De bedoeling is dat it plande spylskema fan folgjende wike ôf wer folge wurdt.
13:40
Lêste jûn yn de hoareka
Sûn woansdeitejûn moatte alle hoarekagelegenheden fjouwer wiken ticht. Sa ek kafee De Laatste Stuiver op De Lemmer. Ferslachjouwer Jeroen Boersma gie lâns om de sfear fan de foarearst lêste kroechjûn wiis te wurden.
13:38
WHO: tanimmende tal coronagefallen soarchlik
De wrâldsûnensorganisaasje WHO fynt it rap tanimmende tal coronagefallen yn Europa 'tige soarchlik'. "It deistige tal gefallen rint op, it tal sikehûsopnamen rint op", seit regiodirekteur Hans Kluge. "Covid is no de op fjouwer nei wichtichste deadsoarsaak en de drompel fan tûzen deaden deis is no berikt." Mar Kluge sei dat "we net yn de situaasje fan maart en april binne".
12:34
Museumhoareka wurdt museumseal
No't de hoareka slute moat, jildt dat ek foar de gelegenheden by musea. By Museum Belvédère op It Hearrenfean meitsje se fan dyselde romte no in ekstra eksposysjeseal. Der komt in pop-uptentoanstelling mei skulpturen fan Gjalt Blaauw.
12:05
Coronablaastest wurdt folgjende moanne ynset
De coronablaastest, dy't ûntwikkele is yn Leiden, wurdt yn novimber op de earste testlokaasjes ynset. "De negatieve uitslag is nu al heel betrouwbaar", sa seit minister De Jonge fan Folkssûnens.
De test sjocht oft de lucht dy't immen útazemet mooglike oanwêzigens fan it coronafirus sjen lit. It apparaat jout daliks in útslach.
11:35
Europeeske Kommisje dringt oan op foarrang foar soarchpersoniel en 60-plussers
Soarchpersoniel, 60-plussers en medysk kwetsbere groepen soene neffens de Europeeske Kommisje foarrang krije moatte by it yninten tsjin it coronafirus wannear't de earste goedkarde faksins yn de EU beskikber binne. Ek oan essinsjele beroppen, minsken dy't gjin ôfstân hâlde kinne en efterstânsgroepen moat neffens harren prioriteit jûn wurde. Brussel kin it de lidsteaten lykwols net ferplichtsje.
De kommisje keapet de faksins by de farmaseuten út namme fan de lidsteaten om foar te kommen dat elts sels ûnderhanneljen giet. De faksins moatte foar eltsenien tagonklik en betelber wêze, en wurde ferdield oer alle lidsteaten op basis fan de befolkingsgrutte.
10:35
Skrassen Friejam-optredens
Troch de coronabeheiningen binne de konserten en aktiviteiten fan Friejam fan de kommende moannen skrast. Dat meldt it bestjoer fan Friejam, dat gjin mooglikheid sjocht om it troch gean te litten.
Sa't it no stiet, wurde de jamsesjes en konserten yn 2021 ferfette, ôfhinklik fan hoe't it firus him ûntwikkelet en de advizen fan it RIVM.
10:30
Meldpunt foar skoalsluting fanwege corona
Skoallen yn it basis- en fuortset ûnderwiis dy't om corona tydlik slute moatte, moatte harren melde by in spesjaal meldpunt. Dat seit de ûnderwiisynspeksje. Ek wurdt der ûndersyk dien nei de gefolgen fan it coronafirus foar it ûnderwiis. De resultaten fan dat ûndersyk sille wurde brûkt om, wannear nedich, nij belied te meitsjen om bygelyks learefterstannen foar te kommen.
Ek skoallen dy't al ticht binne of ticht west hawwe troch it firus, wurde oproppen dit noch te melden.
10:11
Tal WW-útkearings rint al fiif moannen werom
It tal WW-útkearingen yn Fryslân is yn septimber fierder ôfnaam. Flak nei de corona-útbraak wie der in grutte groei yn it tal WW-útkearings, mar yntusken sakket dat al in pear moannen efterelkoar.
It komt ûnder oare troch stipemaatregels fan de oerheid, dêrtroch komme der minder minsken yn de WW. Dêrnjonken ferlit in soad jeugd de WW nei in pear moannen, omdat sy wurk fine of omdat de koartduorjende WW-útkearing ôfrint.
10:00
Safolle mooglik thúswurkje
Undernimmers- en wurkjouwersorganisaasjes roppe bedriuwen en wurknimmers op om safolle mooglik thús te wurkjen om fierdere sprieding fan it coronafirus tsjin te gean. Hjirmei hoopje de organisaasjes in folsleine lockdown te foarkommen.
Neffens VNO-NCW-foarsitter Ingrid Thijssen moat "alles uit de kast worden getrokken" om "het tij te keren". It beheinen fan de ferfiersbewegingen en it thúswurkjen is neffens har in "effectieve maatregel" om besmettings foar te kommen.
08:28
Finansjele skea Amelanner keunstmoanne rint bot op troch lette skrassen
De keunstmoanne op It Amelân giet takom moanne net troch. Troch de maatregels dy't it kabinet tiisdeitejûn nommen hat, kin de 24e edysje fan it evenemint net trochgean. Yn de moanne novimber is it Amelân gewoanwei ien grutte eksposysje foar alle soarten keunst. It skrassen fan de keunstmoanne komt op in let momint en mei dêrtroch rint de finansjele skea bot op. Der komme jierliks sa'n tûzen minsken op it evenemint ôf.
08:23
Modelspoormuseum beëiniget evenemint
It Nationaal Modelspoormuseum yn Snits hâldt op mei it Festijn van Bouwsteentjes. Dat evenemint soe noch oant takom snein duorje, mar nei de nije maatregels mei dat net mear. It museum hat oant woansdeitejûn let oerlein mei de gemeente Súdwest-Fryslân, mar der is gjin oplossing fûn.
Besikers kinne noch wol nei it museum ta, mar dan moatte se reservearje.
08:06
Frouljusfuotbal kin dochs trochgean
Sa'n fiif oeren nei't de KNVB bekend makke dat de earedifyzje foar froulju de kommende wiken stillizze soe, sei sportminister Van Ark yn de Twadde Keamer dat de kompetysje wol trochgean moat. "Wat voor mannen geldt, geldt ook voor vrouwen."
Ta blydskip fan Jessica Roosenburg, foarsitter fan it frouljusteam fan SC Hearrenfean. "Het was een mega-achtbaan voor iedereen. We gingen van links naar rechts in de emotie. De meiden geven er alles voor, die willen niets liever dan voetballen."
08:05
Gjin filmfestival
It Noordelijk Film Festival giet dit jier net troch. De organisaasje soe mei in oanpast programma komme, mar nei de nijste coronamaatregels kin it festival net holden wurde. Der komme wol films yn bioskopen. Dêr meie dan tritich minsken nei ta.
08:04
Meldpunt foar tekoart oan beskermingsmiddels
Soarchmeiwurkers dy't konstatearje dat der yn har organisaasje saken net yn oarder binne oangeande beskermingsmiddels, kinne dat tenei oanjaan by in meldpunt. NU'91, de beropsorganisaasje foar ferpleechkundigen en fersoargers, hat dat meldpunt yn it libben roppen nei oanlieding fan in peiling, dy't troch 2.800 soarchmeiwurkers ynfolle is. In soad meiwurkers joegen oan dat de situaasje yn har organisaasje net yn oarder is.
07:20
Sneltest is betrouber
De rappe coronatest dy't TNO ûntwikkele hat op fersyk fan it ministearje is like betrouber as in PCR-test, dy't gewoanwei brûkt wurdt. In praktykproef mei de sneltest lit sjen dat de útslach yn 99 persint fan de gefallen oerienkomt mei de PCR-test. Neffens de TNO stiet no neat mear yn it paad foar in fierdere ynfiering.
De rappe test jout útslach nei trije kertier of in oere. By de PCR-test is dat ien of twa dagen.
07:00
Wolkom!
Goeiemoarn en wolkom by dit liveblog fan tongersdei 15 oktober. Yn dit liveblog melde we it lêste coronanijs út Fryslân en de rest fan it lân. It liveblog fan woansdei 14 oktober is hjir nei te lêzen.