Liveblog
|
29 maaie 2020
Coronanijs fan 29 maaie: Rêstichste coronawike yn Fryslân sûnt de útbraak
Folgje hjir al it lêste nijs oer it coronafirus.
Bywurke: 2 novimber 2020, 16:51
freed 29 maaie 2020
23:00
Ein fan dit liveblog
We binne oan de ein kaam fan dit liveblog fan freed 29 maaie. Dit wie it wichtichste nijs fan dizze dei:
Elkenien tank foar it folgjen!
22:17
Pinksterwykein 'generale repetysje' foar Staatsbosbeheer
It pinksterwykein is spannend foar Staatsbosbeheer. Sy sjogge it as in generale repetysje foar de simmerfakânsje. De natuerorganisaasje hat foar it pinsterwykein gjin gebieten ôfsletten, mar sil ekstra tafersjoch hâlde om't it nei alle gedachten wer drok wurde sil yn de Fryske natuer.
Staatsbosbeheer hat te meitsjen mei in grut tekoart oan tafersjochhâlders, mar sil nettsjinsteande dat ekstra skerp wêze dit wykein. By de hotspots sa as de bosken by Riis, Oranjewâld en Bakkefean wurdt grutte drokte ferwachte.
22:12
Noch gjin besite yn finzenis Ljouwert
Finzenen yn Ljouwert meie de kommende tiid noch gjin besite ûntfange. Minister Sander Dekker fan Rjochtsbeskerming hat freed bekend makke dat der fan 2 juny ôf in proef komt yn trije finzenissen, mar de PI yn Ljouwert sit dêr net by. De proef mei de besite sil útfierd wurde yn de finzenissen fan Alphen aan den Rijn, Veenhuizen en Arnhem.
Detinearren meie ien oere yn 'e wike ien besiker ûntfange. Dat bart skieden troch pleksyglês en besikers moatte yn it foar in fragelist ynfolje. It ministearje wol mei de proef earst sjen hoe't dy útpakt, mei it each op nije positive coronabesmettingen. As dat tafalt, sil de regeling nei alle gedachten útwreide wurde. Dêroer wurdt op 16 juny mear dúdlik.
21:17
Gruttere terrassen op Ruterskertier yn Ljouwert
De bussen fan Arriva sille yn it wykein omride om gruttere terrassen op it Ruterskertier yn Ljouwert mooglik te meitsjen. Dat is freedtemiddei bekend wurden nei oerlis fan de gemeente en plysje mei ûndernimmers út de útgeansstrjitte yn de Ljouwerter binnenstêd. Dy lêsten binne freedtemiddei al begûn mei wurksumheden, om te sjen hoe't se harren oardelmeterterrassen foarmjouwe wolle.
De tiid driuwt, want de terrassen geane al op pinkstermoandei iepen. Neffens Ton Eijer fan muzykkafee Scooters binne gruttere terrassen needsaaklik om foldwaande omset te meitsjen yn in tiid fan coronamaatregels.
20:08
Fideodeiboek fan GGZ
Ed Toeange fan GGZ Fryslân lit yn syn vlog sjen hoe't it persoaniel oefenet foar it momint dat der in coronapasjint by harren komt. Op dit stuit is der by de GGZ noch gjin corona, mar mocht dat noch komme dan wolle se dêr klear foar wêze. Mear vlogs fan Ed Toeange en de oare vloggers fan de rige 'Berjochten út it hert' sjen? Dat kin fia dizze dossierside.
Ed Toeange
19:59
Ofskied nimme yn coronatiid
Se hiene oant yn detail bepraat hoe't it moast. As minskemins woe Minne Hovenga dat it ôfskied en kondolearjen op syn eigen pleats plakfine soe, sadat elkenien wolkom wie. Mar corona makke alles oars. Op 30 april is Minne Hovenga ferstoarn oan in harsentumor. Middenyn de tiid fan alle coronabeheinings. Troch de sykte hie syn frou Esther al leard om kontinu by te stellen, teloarstellings te ferwurkjen, om te skeakeljen en wer troch te gean.
19:14
Filmhûs De Koornbeurs wurdt wenkeamer
Foar de fanatike bioskoopbesiker in bekend fenomeen: je moatte efkes opstean, om't ien yn deselde rige syn plakje siket of nei it húske moat. Yn coronatiid kin dat fansels net en dus ha se by teäter De Koornbeurs yn Frjentsjer fan harren filmhûs in wenkeamer makke. Fan 1 juny ôf meie bioskopen wer iepen.
Stuollen Koornbeurs
18:33
Rêstichste coronawike yn Fryslân sûnt de útbraak
It tal besmettingen nimt hieltyd mear ôf: foar it earst sûnt de útbraak fan it coronafirus yn Fryslân binne der minder as tsien positive tests yn ien wike te melden. Dat binne der mar fjouwer. De ôfrune wike binne der twa minsken ferstoarn oan de gefolgen fan COVID-19. It wie kwa sifers de rêstichste coronawike sûnt de útbraak.
Margreet de Graaf fan GGD Fryslân is wiis mei de sifers. "Dy bliuwe hiel leech, wy hawwe foardiel hân fan de maatregels. By ús is de ferwachte pyk nea kaam, it tal besmettingen giet no stadichoan fierder nei beneden. Wy ferwachtsje wol dat fan takom wike ôf de sifers wer wat omheech gean. Dat komt net om't der in nije útbraak is, mar om't it testbelied oanpast wurdt: eltsenien mei klachten kin him dan melde by in lanlik nûmer dat moandei bekend wurdt.
Margreet de Graaf
17:55
Flylân komt mei droktekaart
17:43
Ferromming yn finzenissen
De besiteregeling foar finzenissen en tbs-kliniken wurdt fan 2 juny ôf ferromme. Der restriksjes wiene de lêste tiid strang, mar takom wike wurdt dat foar in part weromdraaid. Trije Nederlânske finzenissen begjinne mei in proef wêrby't detinearden alle wiken in oere lang in besiker ûntfange meie. Dat is net yn Fryslân.
16:38
MCL slút corona-ôfdieling
It MCL yn Ljouwert slút freed de lêste spesjale corona-ôfdieling. Yn it sikehûs binne gjin pasjinten mear opnommen dy't posityf test ha op covid-19. De lêste pasjint hat freed de corona-ôfdieling ferlitten. Pasjinten dy't coronaferskynsels ha, kinne tenei opnommen wurde yn isolaasjekeamers op de reguliere ferpleechôfdielingen.
Op it hichtepunt fan de coronakrisis wiene yn it MCL trije ferpleechôfdielingen spesjaal ynrjochte foar de opfang fan coronapasjinten. Ek de intensive care hie de maksimale kapasiteit krigen. De lêste ôfdieling dy't sletten is, bliuwt wol standby en kin as it nedich is op koarte termyn wer iepene wurden.
15:58
Dartbûn lûkt stekker út ynternasjonaal darttoernoai yn Ljouwert
It grutte ynternasjonale darttoernoai fan de PDC dat yn septimber yn Ljouwert hâlden wurde soe, is ôfsein. Dat hat it profesjonele dartbûn freed bekend makke. Fanwegen de coronakrisis kin it evenemint yn it WTC Expo net mear trochgean. Neffens algemien direkteur Peter Ourensma fan it WTC Expo koe it eins net oars dat it darttoernoai mei de hjoeddeiske coronamaatregels net trochgean koe. Dêrfoar soe der fierstente folle publyk op ôfkomme.
15:51
Alde boaten
Omdat rederij Doeksen troch de coronamaatregels mar in beheinde kapasiteit hat, set it bedriuw twa âlde boaten yn: de MS Friesland en de MS Holland. Freed kamen se foar it earst yn aksje. Leafhawwers fan nostalgy hjitten de boaten wolkom yn de haven fan Skylge.
15:35
Earste nammen 'tinkbyldich eilân' Oerol bekend
De earste nammen fan Het Imaginaire Eiland fan Oerol binne bekend. Koreograaf Nicole Beutler makket spesjaal foar it alternative online festival de poëtyske dûnsfilm Still life on the island, mei fyftjin dûnsers. Silbersee, Gouden Haas en NKK NXT bringe de opera Kaapdiegoeiekoop. Fierders binne der ferskate workshops, kolleezjes en masterclasses te folgjen.
Oerol koe fanwege de coronakrisis dit jier net yn de gebrûklike foarm trochgean. De organisaasje hat dêrom yn koarte tiid in alternatyf online festival betocht. Der wurdt fiif dagen lang, fan 15 oant en mei 19 juny, livestreamd fan Skylge ôf.
14:26
Mear romte foar Amelanner hoareka
Hoarekabedriuwen op It Amelân krije mear romte fan de gemeente. De terrassen meie grutter, as de ûndernimmers dat goed ôfstimme mei de omjouwing. En terrassen meie oant 2.00 oere nachts iepen bliuwe, dat wie earst net sa.
Mei de maatregels is der mear plak foar minsken op it eilân en ha de ûndernimmers mear kâns om omset te draaien. De gemeente seit wol mei klam dat de ferrommingen tydlik binne. Yn augustus komt der in evaluaasje.
14:13
De Wynser oerset wer yn de feart
14:11
Lanlik 28 deaden
Sûnt juster binne der 28 nije deaden meld by it RIVM. It totale tal deaden troch it coronafirus yn Nederlân leit no op 5.931.
Der binne njoggen nije minsken opnommen yn de sikehûzen.
13:48
Rinrûten haven Skylge
13:48
Stilswijen Saxenoord oer grutte coronaútbraak "wie net handich"
Wensoarchsintrum Saxenoord yn Frjentsjer is it swierst troffen fan alle fersoargingshuzen yn Noard-Nederlân, mei tsientallen coronabesmettingen ûnder bewenners en personiel. Dat waard freed pas bekend, nei berjochtjouwing fan de LC. Soarchkoepel Patyna hold de útbraak stil en dat moat eins net, fynt Margreet de Graaf fan de GGD. "We meitsje no ôfspraken mei sektoaren om dêr iepen oer te wêzen."
Lês hjir it folsleine ferhaal.
12:49
GGD wiis mei lyts tal pasjinten, wol kâns op tanimming troch nij testbelied
It tal besmettingen nimt hieltyd mear ôf: foar it earst sûnt de útbraak fan it coronafirus yn Fryslân binne der minder as tsien positive tests yn ien wike te melden. Dat binne der mar fjouwer. De ôfrune wike binne der twa minsken ferstoarn oan de gefolgen fan COVID-19.
Margreet de Graaf fan GGD Fryslân is wiis mei de sifers. "Dy bliuwe hiel leech, wy hawwe foardiel hân fan de maatregels. By ús is de ferwachte pyk nea kaam, it tal besmettingen giet no stadichoan fierder nei beneden. Wy ferwachtsje wol dat fan takom wike ôf de sifers wer wat omheech gean. Dat komt net om't der in nije útbraak is, mar om't it testbelied oanpast wurdt: eltsenien mei klachten kin him dan melde by in lanlik nûmer dat moandei bekend wurdt.
Lês hjir mear.
11:54
Prinsetún ticht
Der komme fan freed ôf befeiligers by de tagongen fan de Prinsetún yn Ljouwert, om te bepalen oft der noch plak is foar minsken dy't it park yn wolle. As it te drok wurdt, geane de yngongen tydlik ticht. De gemeente treft noch mear maatregels.
10:33
Wer mear coronapasjinten yn de noardlike sikehûzen
Der lizze op dit stuit 2 minsken mei it coronafirus op de intensive cares yn de Fryske sikehuzen, en 11 op oare ferpleechôfdielingen. Dat is krekt wat mear as earder dizze wike. doe't de sikehuzen ek mei sifers nei bûten kamen. Yn it hiele noarden lizze 5 minsken op de IC's en 49 minsken op oare ferpleechôfdielingen. Dat is ek wat mear as earder dizze wike.
Sjoch hjir de folsleine sifers.
10:07
Veiligheidsregio Fryslân warskôget foar Pinkster
09:35
Eigen besoarchservice by Drachten: stipe foar lokale ûndernimmers
De ûndernimmersferiening is yn Drachten úteinset mei in besoarchservice: Bezorgen in Drachten. Yn koarte tiid binne der al mear as hûndert pakketsjes besoarge. It is in moaie oplossing no't net eltsenien yn coronatiid nei de winkel doart, mar ek op de lange termyn is it goed om Drachten digitaal op de kaart te setten, fine de winkellju.
Lês hjir it folsleine ferhaal.
09:33
KNVB: fuotbaljen is feilich
Fuotbal is in feilige sport, ek yn de coronatiid. Dat is de konklúzje fan de KNVB nei in ûndersyk mei Inmotio, in bedriuw dat spesjalisearre is yn folgsystemen en data-analyze. Op basis fan analyze fan 482 wedstriden út de earedifyzje yn de seizoenen 2018-2019 en 2019-2020 konkludearje de ûndersikers dat proffuotballers yn in wedstriid mar in pear kear langer as tritich sekonden binnen oardel meter fan elkoar binne.
08:52
Streekein Festival wie foar novimber pland, mar is út foarsoarch skrast
It Streekein Festival yn Gersleat stie foar 6 oant en mei 8 novimber op de planning. Dat duorret noch in hiel skoft, mar dochs hat de organisaasje fanwegen it coronafirus besletten dat it feest dit jier net trochgiet. "Er zijn helaas best veel beperkingen om het feest te houden. En de risico die wij nemen is groot," sa skriuwt de organisaasje. "De gezondheid en veiligheid van iedereen heeft nu de hoogste prioriteit." Takom jier hopet Streekein wer gewoan útein te setten.
08:12
Kommissaris fan de Kening seit tank
07:40
"Der is neat yn te heljen, je kinne allinne fierder sjen"
By bewegingssintrum Reset yn Burgum binne se in pear wike lyn wer begûn mei it jaan fan fysioterapy. Dat wie dêrfoar net mooglik fanwege de coronamaatregels. It fitness-diel mocht doe noch net iepen, mar dêr liket op 1 july feroaring yn te kommen. Bûten sporte mei al wol en dat kin yn Burgum op in survivalbaan.
Sytse Evert Adema fan Reset merkt dat de minsken werom komme. "Guon minsken binne der wol minder fan wurden troch in skoft net te kommen. It hat wol dúdlik makke dat it net in lúkse is, mar needsaaklik foar in goeie kwaliteit fan libben." Der wurde ek mear lessen bûten dien. "Der binne entûsjaste coaches dy't it oppakt hawwe. Apparatuer ferpleatse is gjin opsje by ús, wy sitte op de twadde ferdjipping. Mar oare dingen kinne wol wer."
Thús wurdt der ek mear sport, foar in byldskerm. Mar Adema tinkt wol dat in échte coach mear sfear makket en dat minsken dat ek wichtich fine. "Wy hawwe no in soad petearen oer hoe't minsken it thús dogge. It is somtiden ek wol dreech om de dissipline op te bringen."
Duorsum hâlde
Hy is bliid dat de boel 1 july wer iepen kin. "It ferskil tusken 1 july en 1 septimber is hiel grut. It is in útdaging om de boel draaiende te hâlden. Je moatte mei-inoar sjen hoe't je it oerlibje kinne en in duorsum bedriuw hâlde kinne. Der is neat yn te heljen, je kinne allinne fierder sjen. Oant no ta falt it ta hoe trou minsken binne, ik haw der mar betrouwen yn."
Sytse Evert Adema fan Reset yn Burgum
06:55
'Nationale Balkon Beweegdag' yn Smellingerlân
It is freed 'Nationale Balkon Beweegdag.' It giet om in inisjatyf fan it Nationaal Ouderenfonds, dat bedoeld is om âlderein oan it beweegjen te krijen. Yn de rin fan de moarn is de offisjele start yn de Johan Cruijff Arena yn Amsterdam en mear as 150 wensoarchlokaasjes yn Nederlân dogge der oan mei. Sa ek in oantal yn Drachten, de aktiviteiten der wurde organisearre troch Sportbedrijf Smallingerland.
Sportcoach Berber Swart fynt it in goed plan: "De âlderein sit al in hiel skoft thús, dus it is wol goed om eltsenien wat oan it beweegjen te krijen. Doe't dizze nasjonale dei kaam, koene wy dêr mei ús idee moai by oanslute."
En hoe sil dat no gean? Swart leit út: "It idee is om foar it balkon te stean, en dan kinne de minsken op it balkon meidwaan. Der is in sjongster en wy draaie mei de bingo lytse ûnderdielen en oefeningen dy't wy dwaan kinne, lykas 'hoofd-schouders-knie-en-teen.' Wy hawwe noch mear op de planning bûten dizze dei, wy sille mear soarchsintra benei komme yn de kommende tiid."
Sportcoach Berber Swart
06:43
Rydbewiis ferlingje
06:37
Hoareka bliuwt flak foar iepening noch mei in soad fragen sitten
Der libje nochal wat fragen oer hoe't it no komt yn de hoareka. Want mei de ferrommingen fan de coronamaatregels dy't der hieltyd mear komme, ûntstiet ek in bulte oan regelingen en dêrmei betizing. Dêrneist hat de ôfdieling Fryslân fan de Keninklike Hoareka in oanfraach dien by de Feilichheidsregio, om op 1 juny om njoggen oere moarns iepen te gean yn stee fan tolve oere. Mar dat mocht lykwols net trochgean.
Lês hjir it folsleine ferhaal.
06:32
Dosint oer 1,5 meter-skoalle
Leararen fan it mbo en hbo sitte mei de hannen yn it hier. De basisskoallen binne alwer iepen, mar foar it beropsûnderwiis is alles noch ûnwis. De skoallen meie ynkoarten wol wer iepen, mar de lessen wurde de kommende tiid noch online jûn. Dosint Conrad Berghoef fan ROC Friese Poort is klear mei de situaasje.
Hy skreau in earlike Tweet oer syn ûnderfining op dit stuit. Syn folsleine ferhaal is hjir te lêzen.
tongersdei 28 maaie 2020
07:00
Wolkom by dit liveblog
Goeiemoarn, en wolkom by dit liveblog fan freed 28 maaie 2020 oer it coronafirus. Dit wie it wichtichste nijs fan tongersdei:
It folsleine liveblog fan tongersdei kinst hjir weromlêze.