Alde timmerwurkpleats fan de ûndergong rêden

11 septimber 2018, 13:33 • 1 minút lêstiid

Mei ynset fan in restauraasjebedriuw en ynwenners is in hiel âlde timmerwurkpleats rêden yn Ferwâlde. De wurkpleats út de 19e iuw is foar it grutste part noch yntakt, mar rekke sa bot fertutearze dat it der net mear feilich wie. Bou- en restauraasjebedriuw Van der Vegt kocht de wurkpleats en brocht it ûnder yn in goede doelen stichting om sa de wurkpleats, ynklusyf it part dêr't yn wenne waard, wer yn oarder te meitsjen.

En ek al moat it noch offisjeel iepene wurde; fan 1 juny ôf binne de doarren al wer iepen foar it publyk. It doarp is dêr bliid mei, want it is goed foar de leefberens. De timmerwurkpleats wie yn 2005 foar it lêst iepen as ûnderdiel fan de Aldfaers Erf rûte.