LIVEBLOG: De earste dei fan De Reuzen yn Ljouwert

We krije in soad berjochtsjes en tillefoantsjes fan sjoggers dy't fragen ha oer ús tv-útstjoering en de ferbining. We lizze hjir út hoe't it kin dat der sa no en dan 'blokjes' yn byld binne. We binne ôfhinklik fan it 4G-netwurk dat hjoed flink belêste wurdt troch alle besikers. We ha eigen dongels en ekstra kapasiteit, mar ek dat is krekt net genôch om yn HD filmje te kinnen. Fansels ha wy ek tv-weinen mei in eigen ferbining. Dy meie allinnich net fan de organisaasje yn it sintrum komme. Wy kinne dus neat mear dwaan om de reuzen foar jim yn byld te bringen.

Timo Brinkman soarget foar de rezjy. Mei al dy minsken yn de stêd is it ek foar ús in hiele útdaging om alle ferbiningen tip-top te hâlden. It kin dus sa wêze dat der sa no en dan in lyts dipke yn it byld sit. Dit hat alles te krijen mei de grutte fraach nei ynternet.

De dûker is de grutste fan de trije reuzen. Hy is 11 meter heech en is 3000 kilo swier.

Arriva set no ekstra bussen yn om minsken op te heljen. De treinen sitte sá fol, dat se stasjon oerslaan moatte en dus trochride. Benammen op sosjale media smyt dat in soad negative reaksjes op yn de rjochting fan Arriva.

Dêr binne al trije treinen fan Arriva trochriden mei minsken út Snits foarby riden.

De gemeente Ljouwert hat justerjûn en fannacht fiif auto's yn it sintrum fan de stêd fuortsleept. De auto's stiene parkeard yn de Grutte Tsjerkestrjitte. Dêr wie in parkearferbod ynsteld fanwege it evenemint De Reuzen. Dy moatte troch de strjitte en dêrom moasten auto's juster al fuort. Dat wie neffens de gemeente op buorden yn de strjitte dúdlik oanjûn. De auto's binne nei in terrein oan de Snitsertrekwei brocht. De eigeners kinne se dêr ophelje, mar moatte dan in boete betelje. Dy kin oprinne oant 450 euro. Fan de fiif fuortsleepte auto's wiene twa fan gemeentlike amtners. De gemeente hat ek 35 foutparkearde fytsen fuorthelje litten.

Op yndustryterrein de Hemrik ûntstiet no in file foar de yngong fan it parkearterrein.

Ek by Arriva grutte drokte. Minsken dy't wachtsje op it stasjon fan Mantgum sjogge no al de trein oan harren foarby riden. De trein wie yn Snits al propfol. Der kin gjin ien mear by.

It wurdt hjoed in prima dei. Earst noch in soad bewolking, mar de sinne wint terrein. Foaral fan 'e middei en jûn flink wat sinne. De temperatueren rinne fan 'e middei op nei sa'n 21 oant 23 graden en dêrmei is it in normale waarme simmerdei. De wyn komt út it westen oant noardwesten en is meast matich, krêft 3 of 4. Ut en troch noch frij krêftich, krêft 5. Jûn om 20.00 oere sa'n 18 graden en de kommende nacht giet de temperatuer werom nei 14 of 15 graden.

We krije berjochten dat yn Grou de treinen al sa fol sitte, dat tsientallen minsken op it perron stean te wachtsjen op de folgjende trein.