The Passion komt takom jier nei Ljouwert

Ljouwert is op 13 april 2017 it dekôr fan de sânde edysje fan The Passion. De produksje fan de EO, KRO, NCRV en NPO wurdt live op telefyzje útstjoerd. It spektakel lûkt alle kearen tûzenen besikers en wurdt op telefyzje en fia sosjale media besjoen troch sa'n trije miljoen minsken.
Mei The Passion wurdt it lijensferhaal fan Jezus ferteld. By it spektakel sjouwe dielnimmers in grut ferljochte krús troch it sintrum nei it haadpoadium op it Wilhelminaplein by it Fries Museum. Bekende artysten sjonge passende besteande Nederlânske lieten.
"Leeuwarden heet The Passion van harte welkom!" sei boargemaster Ferd Crone woansdeitemoarn. "We slaan met Provincie Fryslân en de gezamenlijke Leeuwarder kerken de handen ineen om publiek en televisiekijkend Nederland in 2017 te ontvangen op het Wilhelminaplein. Dit plein vormt een fantastische decor voor het bijzondere verhaal van de laatste uren van Jezus."
Neffens de provinsje past it binnenheljen fan The Passion goed yn de strategy om yn de oanrin nei Kulturele Haadstêd 2018 eveneminten nei de stêd te lûken. De kosten bedrage 200.000 euro. De gemeente Ljouwert en de provinsje diele de kosten.
It is de sânde kear dat The Passion opfierd wurdt. Earder wienen de stêden Gouda, Rotterdam, Den Haag, Grins, Enschede en Amersfoort gasthear foar it evenemint.
Grutsk
"Friezen zijn van oudsher trotse mensen. Ik ben trots op The Passion, het evenement dat saamhorigheid brengt. En dat hebben we hard nodig, zeker in deze tijd van tegenstellingen. Tussen jong en oud. Tussen stad en platteland. Wij brengen het eeuwenoude verhaal van verbinding dit jaar met een Fries tintje vanuit Leeuwarden" sei Taco Rijssemus fan KRO-NCRV.
De útstjoering is op Wite Tongersdei op 13 april 2017 om 20.30 oere op NPO 1. Sjoggers kinne ek online dielnimme oan de firtuele prosesje. Watfoar artysten meidogge is noch net bekend.