Dieltsjes fan sinnepanielen yn omjouwing delkaam nei brân yn Ie

Meardere ploegen út de omjouwing fan Ie binne yntusken dwaande mei it bestriden fan it fjoer.

Om derfoar te soargjen dat de brânwacht eventueel ek nei oare ynsidinten yn de omjouwing kin, wurdt de kazerne fan Ternaard tydlik beset troch in ienheid út Hallum.

Om de gearwurking tusken de ferskillende helptsjinsten better ferrinne te litten, wurdt de brân yn Ie no beskôge as in 'GRIP 1-situaasje'.

Yn in NL-Alert wurde minsken yn de omjouwing fan de brân oan de Tibsterwei yn Ie oproppen om út de reek te bliuwen.

"Sluit ramen en deuren. Zet ventilatie uit. Blijf op afstand. Geef hulpdiensten de ruimte", is it boadskip dat ferstjoerd is.

Yn de loads dy't no yn brân stiet yn Ie, binne flessen mei acetyleen oanwêzich. De brânwacht warskôget dat dizze flessen eksplodearje kinne. Minsken moatte dan ek minimaal 300 meter ôfstân hâlde fan de brân.

It bedriuw dat troch de brân troffen is, is in meganisaasjebedriuw. Der steane meardere trekkers opslein yn de loads.

It is noch net dúdlik oft der minsken ferwûne rekke binne. Ek de oarsaak fan de brân is noch net bekend.

It fjoer slacht behoarlik om him hinne yn Ie. De brânwacht is drok dwaande mei it bestriden fan de brân.

Yntusken hat de brânwacht opskaald nei 'tige grutte brân'. De flammen slaan út in loads fan it meganisaasjebedriuw yn Ie.

By de brân komt in protte reek frij. Minsken wurde oproppen om út dy reek te bliuwen.

Der is brân útbrutsen by in meganisaasjebedriuw yn Ie. De brânwacht hat opskaald nei 'grutte brân'.

It fjoer is al útslaand. Meardere ienheden fan de brânwacht binne ûnderweis om de brân te bestriden.

De brêge by Skûlenboarch kin wer brûkt wurde troch ferkear. Tongersdeitemoarn koenen de earste auto's en fytsers der wer del.

De brêge hat goed tsien moannen ticht west nei in oanfarring mei in frachtskip. De folsleine motor fan de brêge rekke dêrby skansearre.

De brêge is de ferbining tusken Jistrum en it buorskip Skûlenboarch.

In motorrider is tongersdeitejûn troch noch ûnbekende oarsaak efterop in auto riden op de Brêgeloane by Stynsgea.

De ambulânse kaam teplak om help te ferlienen, mar neffens in korrespondint wie de motorrider net ferwûne.

De plysje docht ûndersyk nei it ûngelok.

In 23-jierrige Ljouwerter is feroardiele foar it bedriigjen fan twa jonges mei in pistoal dat 3D-printe is. De fertochte ferklearre dat er it pistoal mei fiif kûgelpatroanen yn in parkje fûn hie.

Mei in freon siet er nachts om 00.30 oere hinne by de Rengerslaan op in parkje. De twa jonges soene har doe oanfallen hawwe. De Ljouwerter helle doe it pistoal foar it ljocht: hy skeat yn de loft om de jonges ôf te skrikken.

De jonge waard oppakt en hat 25 dagen fêstsitten. Hy hie oars hannelje moatten, joech de offisier fan justysje oan, en it pistoal nei it plysjeburo bringe moatten.

De fertochte hat in wurkstraf fan 180 oeren oplein krigen. Dêrneist 25 dagen jeugddetinsje, mar dy hat er al yn foararrest útsitten. Fierder komt de Ljouwerter ûnder tafersjoch fan jongereinreklassearring en moat er behannele wurde.

Wa't yn Harns of Mullum de auto op in ferkeard plak delset hat, kin oer in pear wiken in bekeuring krije troch dizze auto. De gemeente Harns brûkt fan 1 jannewaris ôf in spesjale scanauto om ferkeardparkearders oan te pakken.

De auto hat kamera's dy't de kentekens fan auto's scanne en kontrolearje oft der sprake is fan in jildich parkearrjocht. As dat net sa is, komt in BOA op it plak om de situaasje te beoardieljen.

Hanthaveners kinne de wein brûke om flugger en effisjinter in kontrôle te dwaan. De gemeente fynt it neilibjen fan it parkearbelied fan grut belang foar de leefberens.

As de auto dochs goed stiet, wurdt it kenteken út it systeem fuorthelle. Persoanlike gegevens wurde net opslein.

Gemeente Noardeast-Fryslân siket de rjochthawwers of neibesteanden fan sa'n 3.900 grêven. It giet om de gemeentlike begraafplakken yn Burdaard, Boerum, Dokkum, Kollum, Muntsjesyl, Aldwâld, Mitselwier en Ternaard.

De gemeente wol de grêfrjochten op 'e nij útjaan. De aksje einiget op 1 april 2028. As der dan noch gjin rjochthawwers fûn binne, ferfalle de grêfrjochten. Dan wurde de grêven en tinktekens romme.

Op dizze side hat de gemeente listen pleatst mei de grêven en nammen dêr't it om giet.

In gokferslave frou út Grins is feroardiele foar oplichting mei VVV-bonnen en paysafekaarten. Under oare tabakssaken yn Dokkum en Kollum waarden dêr slachtoffer fan.

De no 34-jierrige frou die har foar as meiwurker fan de gemeente. Se sei dat se tastimming hie om kaarten ôf te heljen. Dêrfoar hie se ek formulieren ferfalske. De bonnen levere se wer yn en mei it jild gokte se fierder.

Yn oktober ferline jier rûn se lykwols tsjin 'e lampe oan by in supermerk yn Drachten. In winkelmeiwurker fertroude de boel net. It die bliken dat de frou al faker feroardiele wie foar soartgelikense praktiken.

Sy besiket no wol har libben wer op de rit te krijen. Se is feroardiele ta in wurkstraf en in selstraf dy't lyk wie oan it foararrest, fan 76 dagen. Fierder moat se har behannelje litte en meiwurkje oan skuldhelpferliening.

Op de A32 tusken Grou en Akkrum is fan 'e moarn in file ûntstien yn de rjochting fan Akkrum troch in ûngelok. By it ûngelok wiene trije auto's belutsen.

Der is gjinien ferwûne rekke. Ferkear koe oer ien rydstripe trochrride. Dat soarge foar in file. In berger sil de auto's fuorthelje.

In auto is woansdeitejûn op 'e kop yn de boskjes bedarre. Dat barde by in iensidich ûngefal oan de Sewei op De Jouwer.

Plysje en ambulânse binne nei it plak ta kommen. De ynsitters koene sels út de auto komme en binne opfongen troch ambulânsepersoniel.

It is net dúdlik hoe't de auto fan de dyk reitsje koe.

Wolkom yn it 112-livebloch fan hjoed. Hjir fynst in oersjoch fan ûnder oare ûngelokken, brannen en ferkearsynformaasje yn ús provinsje.

It 112-nijs fan juster kinst hjirûnder weromlêze.