Gerrit Hiemstra skriuwt Grut Frysk Diktee oer de ympakt fan it klimaat

Gerrit Hiemstra skriuwt Grut Frysk Diktee
Gerrit Hiemstra skriuwt Grut Frysk Diktee © Omrop Fryslân
Op tiisdei 23 april sit de Steateseal fan it Provinsjehûs wer fol mei swittende minsken dy't de dikteetekst fan it Grut Frysk Diktee sûnder flaters besykje te skriuwen. Waar- en klimaatsaakkundige Gerrit Hiemstra skriuwt dit jier de dikteetekst.
Ferline jier waard de tekst skreaun troch sjongeres Iris Kroes, doe gie it oer in bepaalde faze yn it libben. Dit jier weaget Gerrit Hiemstra him oan it skriuwen fan de dikteetekst dy't gean sil oer de ympakt fan it klimaat.
Ferline jier waard it diktee skreaun troch Iris Kroes
Ferline jier waard it diktee skreaun troch Iris Kroes © Fotobureau Hoge Noorden, Jacob van Essen
"Ik woe it oer it klimaat ha", seit Hiemstra. "Mar dat is in hiel grut ûnderwerp mei in hiel soad ferskillende ynfalshoeken. Uteinlik haw ik keazen om foaral oer it minsklike aspekt te skriuwen. It komt derop del dat we ôfskied nimme moatte fan it klimaat fan eartiids en dêr hawwe in soad minsken grutte muoite mei."

Fan bekende Friezen oant Harkemase Boys

Njonken de tweintich kandidaten dy't harren kwalifisearje kinne, sille ek fiif teams ûnderling de striid mei-inoar oangean. De teams fan dit jier binne Bekende Friezen, Yung Frysk, Harkemase Boys, Freonen fan Fryske organisaasjes en studinten Frysk fan de Universiteit fan Amsterdam.
Grut Frysk Diktee 2023
Grut Frysk Diktee 2023 © Fotobureau Hoge Noorden, Jacob van Essen
Minsken dy't op 23 april graach meidwaan wolle oan it Grut Frysk Diktee, moatte harren dêrfoar kwalifisearje. Fan 5 oant 31 maart kin elkenien online meidwaan oan it kwalifikaasjediktee op www.fryskdiktee.nl.
Ut de bêste dielnimmers wurde tweintich kandidaten selektearre dy't meidwaan meie oan de grutte finale yn de Steateseal.
It Grut Frysk Diktee wurdt op woansdei 24 april om 19.30 oere útstjoerd by Omrop Fryslân. De organisaasje fan it diktee is yn hannen fan de Afûk, it Taalsintrum Frysk (Cedin), de Fryske Akademy, Provinsje Fryslân en Omrop Fryslân. Mear ynformaasje oer it Grut Frysk Diktee is hjir te finen.